មន្រ្តីជាន់ខ្ពស់គណបក្សដែលធ្លាប់មានប្រវត្តិពីបក្សរាជានិយម នៅតែទទូចចង់ឱ្យមានជំនួបមួយកើតឡើងជាមួយស្ថាប័នជាតិរៀបចំការបោះឆ្នោត ដោយមើលឃើញថា បទបញ្ជានិងនីតិវិធីបម្រើឱ្យការបោះឆ្នោតជាតិ ឆ្នាំ២០២៣ ខាងមុខនេះ ប្រព្រឹត្តទៅនៅមានចំណុចដែលត្រូវកែសម្រួលត្រង់ខ្លឹមសារខ្លះទៀតនៅឡើយ ដែលមិនទាន់អាចធានាបានពីការជឿទុកចិត្តក្នុងដំណើរការបោះឆ្នោត។
លោក យ៉ែម បុញ្ញឫទ្ធិ អនុប្រធានគណបក្សខ្មែររួបរួមជាតិ ឱ្យវីអូឌីដឹងនៅថ្ងៃអង្គារថា គិតពីថ្ងៃដាក់លិខិតសុំជួប រហូតមកដល់ពេលនេះ លោកនៅមិនទាន់ទទួលបានដំណឹងជាផ្លូវការពីស្ថាប័ន គ.ជ.ប. វិញនៅឡើយទេ។ លោកបន្តថា ការណាត់ជួបដើម្បីពិគ្រោះយោបល់នេះ សម្រាប់លោក បុញ្ញឫទ្ធិ នៅតែមើលឃើញថា ទាំងបទបញ្ជានិងនីតិវិធីសម្រាប់ការបោះឆ្នោតជ្រើសតាំងតំណាងរាស្រ្ត ឆ្នាំ២០២៣ ខាងមុខនេះ មានចំណុចខ្លះនៅមានភាពឆ្គាំឆ្គង និងមិនច្បាស់លាស់ថែមទៀតផង។
បើតាមលោក យ៉ែម បុញ្ញឫទ្ធិ ការជួបពិគ្រោះយោបល់នេះ គណបក្សខ្មែររួបរួមជាតិ មិនមានបំណងអ្វីក្រៅពីចង់ឱ្យគោលការណ៍នេះក្លាយជាគោលការណ៍មួយដែលបម្រើឱ្យគ្រប់ភាគីពាក់ព័ន្ធចូលរួមក្នុងការបោះឆ្នោត សម្រាប់អាណត្តិនេះ អាចជឿទុកចិត្តបាន ជាពិសេសជានីតិវិធីមួយដែលបង្ហាញពីតម្លាភាពឱ្យបានស្មើគ្នាគ្រប់គណបក្សនយោបាយដែលចូលរួមការបោះឆ្នោត។
លោកបន្តថា៖ «ខ្ញុំយល់ឃើញថា វាជាការចាំបាច់ក្នុងការពន្យល់ និងឱ្យយល់ពីបំណងប្រាថ្នារបស់[គណបក្ស]ខ្មែររួបរួមជាតិ ក្នុងការកែលម្អឱ្យមានប្រសិទ្ធភាព។ ហើយចុងក្រោយនេះ ខ្ញុំក៏បានឃើញលិខិតរបស់គ.ជ.ប. ដែលបង្ហោះថានឹងមានជួបជុំថ្ងៃទី១៦ ធ្នូ នេះដែរ»។
កាលពីថ្ងៃទី២៤ ខែវិច្ឆិកា ឆ្នាំ២០២២ គណបក្សខ្មែររួបរួមជាតិ បានដាក់លិខិតមួយច្បាប់សុំជួបតំណាងស្ថាប័នជាតិរៀបចំការបោះឆ្នោត ប៉ុន្តែគេទើបនឹងឃើញ គ.ជ.ប. បានឆ្លើយតបនៅថ្ងៃទី២៨ ខែវិច្ឆិកា។ តាមរយៈលិខិតរបស់ខ្លួន គណបក្សខ្មែររួបរួមជាតិ ស្នើសុំពិគ្រោះយោបល់នេះ ដោយពិនិត្យឃើញសេចក្តីព្រាងបទបញ្ជា និងនីតិវិធីបម្រើឱ្យការបោះឆ្នោតជ្រើសតាំងតំណាងរាស្រ្ត ឆ្នាំ២០២៣ មានចំណុចខ្វះខាត និងកន្លែងខ្លះទៀតគួរមានការកែតម្រូវ ដើម្បីឱ្យមានភាពល្អប្រសើរ។
ឆ្លើយតបរឿងនេះ លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត អះអាងពីការបដិសេធចំពោះគណបក្សខ្មែររួបរួមជាតិ ថាគណបក្សក្រៅរដ្ឋាភិបាលមួយនេះលែងមានបំណងណាមួយ ដើម្បីស្នើសុំជួបពិគ្រោះយោបល់តទៅទៀតហើយ។ លោកបន្តថា បើពិនិត្យទៅលើឆន្ទៈនេះ មានន័យថា ការស្នើសុំពិគ្រោះយោបល់ដើម្បីពិនិត្យអំពីបទបញ្ជានិងនីតិវិធីនេះ អាចនឹងមិនកើតឡើងទៀតទេ។
លោកបន្តថា៖ «អ៊ីចឹងមន្រ្តីជំនាញរបស់គ.ជ.ប.ហ្នឹងឯង ក៏បានទាក់ទងទៅតំណាងគណបក្សហ្នឹង[ខ្មែររួបរួមជាតិ]។ ខាងគណបក្សហ្នឹង[ខ្មែររួបរួមជាតិ] ក៏បានទាក់ទងផ្ទាល់មាត់មកវិញ ថាមិនចាំបាច់មានការជួបទេ។ បាទ! តំណាងគណបក្សសម្រេចលុបការជួបហើយ»។
បើទោះបែបណា លោក យ៉ែម បុញ្ញឫទ្ធិ វិញ អះអាងថា មកដល់ពេលនេះ ក្នុងនាមជាអនុប្រធានគណបក្ស រូបលោកនៅមិនទាន់ទទួលបានដំណឹងនេះនៅឡើយទេ។ បើតាមមន្រ្តីជាន់ខ្ពស់រូបនេះ គណបក្សខ្មែររួបរួមជាតិ នៅតែរក្សាជំហរក្នុងការណាត់ជួបជាមួយស្ថាប័ន គ.ជ.ប. ដដែល ជាពិសេសបើអាចទៅរួច ធ្វើឱ្យបានមុនគម្រោងនៃការកោះអញ្ជើញរបស់គ.ជ.ប ដែលគ្រោងនឹងរៀបចំជួបគណបក្សនយោបាយ អង្គការ និងសមាគម ដែលនឹងប្រព្រឹត្តទៅនៅថ្ងៃទី១៦ ខែធ្នូ ខាងមុខនេះ។
ចំណែកលោក សោម សូរីដា អគ្គលេខាធិការរងគណៈកម្មាធិការជាតិរៀបចំការបោះឆ្នោត បញ្ជាក់ថា ស្ថាប័នជាតិមួយនេះមិនដែលបដិសេធពីបំណងនៃការសុំជួបពីភាគីណាមួយឡើយ ប្រសិនបើពិតជាទទួលបានលិខិតស្នើសុំដើម្បីជួបពិគ្រោះយោបល់ពិតមែន។
នៅក្នុងការបោះឆ្នោតជ្រើសតាំងតំណាងរាស្រ្ត អាណត្តិទី៦ ឆ្នាំ២០១៨ គណបក្សខ្មែររួបរួមជាតិ មិនបានទទួលអាសនៈសូម្បីមួយអាសនៈឡើយ ខណៈដែលគណបក្សប្រជាជនកម្ពុជា ជាអ្នកទទួលបានកៅអីនេះទាំង១២៣អាសនៈនៅក្នុងរដ្ឋសភា ក្រោយពីគណបក្សសង្រ្គោះជាតិ ត្រូវបានតុលាការរំលាយ នៅចុងឆ្នាំ២០១៧។ ដោយឡែក ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ កាលពីខែមិថុនា ឆ្នាំ២០២២ កន្លងទៅនេះវិញ គណបក្សខ្មែររួបរួមជាតិ ទទួលបានអាសនៈក្រុមប្រឹក្សាឃុំសង្កាត់ចំនួន១៣អាសនៈនៅទូទាំងប្រទេស។
លោក សេក សុជាតិ ស្ថាបនិកអង្គការអភិវឌ្ឍន៍ផ្នត់គំនិត យល់ឃើញថា ដើម្បីធ្វើឱ្យមានប្រសិទ្ធភាពការងារ គ.ជ.ប. គួរបើកឱ្យមានការចូលរួម និងពិគ្រោះយោបល់ឱ្យបានឆាប់ពីគ្រប់តួអង្គដែលពាក់ព័ន្ធ។ លោកបន្តថា បញ្ហាដែលគណបក្សនយោបាយរកឃើញ វាអាចជាតម្រុយមួយដ៏សំខាន់ក្នុងការតម្រស់ទិសឱ្យកិច្ចការនេះប្រព្រឹត្តទៅបានល្អប្រសើរជាងពេលបច្ចុប្បន្ន ជាពិសេសអាចបញ្ចៀសបានពីការរិះគន់ថាជាស្ថាប័នធ្វើការមិនឯករាជ្យ ជាដើម។
លោកបន្តថា៖ «យើងគិតទៅលើគុណភាពសេវាហ្នឹងក៏ពាក់ព័ន្ធនឹងការសម្រេចចិត្តបានលឿនដែរ។ បញ្ហានេះមិនមែនជាបញ្ហាដែលរសើបពេក រហូតដល់យើងត្រូវការពេលវេលាយូរដើម្បីធ្វើការសម្រេចចិត្ត។ នេះជាការងាររួមរបស់សង្គម ហើយក្នុងនាម គ.ជ.ប. ជាអាជ្ញាកណ្ដាលនៅក្នុងការកាត់សេចក្ដី គួរតែបើកចិត្តឱ្យទូលាយ ហើយពន្លឿននីតិវិធីធ្វើយ៉ាងណាក៏ដោយដើម្បីឆាប់ទទួលបានធាតុចូលពីភាគីពាក់ព័ន្ធ ដើម្បីធ្វើការសម្រេចចិត្តមុនការបោះឆ្នោតកៀកមកដល់នេះបាទ»។
បើទោះបែបណា នៅថ្ងៃទី១៦ ខែធ្នូ ខាងមុខនេះ គ.ជ.ប. នឹងមានជំនួបរួមជាមួយតួអង្គដែលពាក់ព័ន្ធ រួមមាន តំណាងគណបក្សនយោបាយ អង្គការ និងសមាគម ដើម្បីពិនិត្យទៅលើការផ្តល់យោបល់មួយចំនួន អំពីបទបញ្ជានិងនីតិវិធីបម្រើឱ្យការបោះឆ្នោតជាតិ ឆ្នាំ២០២៣។ យ៉ាងនេះក្តី អនុប្រធានគណបក្សខ្មែររួបរួមជាតិ នៅតែយល់ឃើញថា ការជួបនេះនឹងមិនលម្អិតនិងស៊ីជម្រៅជាងការជួបសន្ទនាជាលក្ខណៈសាម៉ីគណបក្សនយោបាយជាមួយនឹង គ.ជ.ប. ទេ។
កាលពីថ្ងៃទី១ ខែវិច្ឆិកា ឆ្នាំ២០២២ កន្លងទៅនេះ គ.ជ.ប. បានចេញសេចក្តីជូនដំណឹង ដោយទុកពេលឱ្យភាគីពាក់ព័ន្ធមានពេលត្រួតពិនិត្យ និងផ្តល់យោបល់ត្រលប់មកវិញ អំពីបទបញ្ជានិងនីតិវិធីបម្រើឱ្យការបោះឆ្នោតជ្រើសតាំងតំណាងរាស្រ្តនេះ ចាប់ពីថ្ងៃជូនដំណឹងរហូតដល់ថ្ងៃទី១៩ ខែវិច្ឆិកា។ សេចក្តីព្រាងបទបញ្ជានិងនីតិវិធីសម្រាប់ការបោះឆ្នោតនេះ មានកម្រាស់៣៣៧ទំព័រ ដែលមាន១០ជំពូក និងឧបសម្ពន្ធរួមបញ្ចូលផង។ ចំណែករដ្ឋាភិបាលបានកំណត់យកថ្ងៃបោះឆ្នោតជ្រើសតាំងតំណាងរាស្រ្ត លើកទី៧នេះ នៅថ្ងៃទី២៣ ខែកក្កដា ឆ្នាំ២០២៣៕