ក្រុមសិទ្ធិមនុស្សបាននិយាយថា កញ្ញា ឈឹម ស៊ីថរ នឹងបន្តស្ថិតក្នុងការឃុំខ្លួនបណ្ដោះអាសន្នពីបទ «ញុះញង់» បន្ទាប់ពីតុលាការក្រុងភ្នំពេញបានបដិសេធបណ្ដឹងសុំនៅក្រៅឃុំរបស់ប្រធានសហជីពប្រចាំក្រុមហ៊ុនណាហ្គាវើលដ៍រូបនេះ។
កញ្ញា ឈឹម ស៊ីថរ ត្រូវបានចាប់ខ្លួនកាលពីចុងខែវិច្ឆិកា បន្ទាប់ពីត្រលប់មកពីសន្និសីទការងារជាអន្តរជាតិនៅប្រទេសអូស្រ្តាលី។
កញ្ញាត្រូវចាប់ឃុំខ្លួនជាលើកទី១ កាលពីខែមករា ពាក់ព័ន្ធនឹងការតវ៉ារបស់កម្មករដែលកំពុងបន្តធ្វើកូដកម្មទាមទារឱ្យក្រុមហ៊ុនណាហ្គាវើលដ៍ចេញមុខដោះស្រាយបញ្ចប់វិវាទការងារ និងបានចូលធ្វើការងារវិញ។ កញ្ញាត្រូវបានដោះលែងឱ្យនៅក្រៅឃុំ នៅខែមីនា បន្ទាប់ពីសន្យាថានឹងឈប់ចូលរួមក្នុងបាតុកម្ម។
អង្គការលីកាដូ ដែលជាអង្គការសិទ្ធិមនុស្សក្នុងស្រុក បាននិយាយកាលពីថ្ងៃចន្ទថា មេធាវីរបស់ខ្លួនដែលស្ថិតក្នុងចំណោមក្រុមមេធាវីរបស់កញ្ញា ឈឹម ស៊ីថរ បានទទួលដំណឹងពីតុលាការថា កញ្ញានឹងបន្តស្ថិតនៅក្នុងការឃុំខ្លួន។
កញ្ញា ឈឹម ស៊ីថរ ត្រូវបានចាប់ខ្លួននៅអាកាសយានដ្ឋានអន្តរជាតិភ្នំពេញ កាលពីថ្ងៃទី២៦ ខែវិច្ឆិកា បន្ទាប់ពីត្រលប់មកពីប្រទេសអូស្ត្រាលី។
សមត្ថកិច្ចបាននិយាយថា កញ្ញាត្រូវបានហាមឃាត់មិនឱ្យធ្វើដំណើរចេញទៅក្រៅប្រទេស ដោយផ្អែកលើលក្ខខណ្ឌនៅក្រៅឃុំរបស់តុលាការ។ ទោះយ៉ាងណា មេធាវីការពារក្តីរបស់កញ្ញាបាននិយាយថា មិនបានទទួលដំណឹងអំពីលក្ខខណ្ឌនៅក្រៅឃុំនោះឡើយ។
មេធាវីម្នាក់ទៀតរបស់កញ្ញា ឈឹម ស៊ីថរ គឺលោក សំ ចំរើន បានថ្លែងថា លោកកំពុងជាប់រវល់ ហើយភ្លាមៗ លោកមិនអាចធ្វើអត្ថាធិប្បាយឡើយ។
ក្រុមហ៊ុន ណាហ្គាខប (NagaCorp) បានបញ្ឈប់កម្មករចំនួន១ ៣០០នាក់ ចំពេលមានការរីករាលដាលនៃជំងឺកូវីដ-១៩ ហើយក្រុមហ៊ុនរងការចោទប្រកាន់ថាមានចេតនារំលាយសហជីព ដោយកំណត់គោលដៅលើមេដឹកនាំសហជីព ដែលកម្មករនិយាយថាគួរតែត្រូវបានការពារពីការបញ្ឈប់ពីការងារ។
កម្មករជាង១០០នាក់បន្តតវ៉ាប្រឆាំងនឹងការបញ្ឈប់ពីការងារ ខណៈការតវ៉ាប្រឆាំងនឹងក្រុមហ៊ុនណាហ្គាវើលដ៍មានរយៈពេលជិតមួយឆ្នាំមកហើយ។
កូដកររាប់សិបនាក់បានឈរនៅខាងក្រៅក្រុមហ៊ុនណាហ្គាវើលដ៍ ក្នុងសម្លៀកបំពាក់ពណ៌ទឹកក្រូច ដូចឯកសណ្ឋានអ្នកទោស កាលពីថ្ងៃចន្ទ ដើម្បីគាំទ្រកញ្ញា ឈឹម ស៊ីថរ។ នេះបើយោងតាមវីដេអូផ្សាយផ្ទាល់ដែលបង្ហាញដោយកម្មករម្នាក់ឈ្មោះ ម៉ម សុវ៉ាធីន។
ក្រៅពីមេដឹកនាំសហជីពមួយចំនួនដូចជាកញ្ញា ឈឹម ស៊ីថរ ដែលនៅតែប្រឈមមុខនឹងការចោទប្រកាន់ពីបទញុះញង់ មនុស្សមួយចំនួនទៀតត្រូវបានសាកសួរជុំវិញបណ្តឹងរបស់ក្រុមហ៊ុន ណាហ្គាខប (NagaCorp) ដែលមិនមានភាពច្បាស់លាស់ចំនួន៣ករណី រួមមាន រំលោភលើលំនៅឋាន, ធ្វើឱ្យខូចខាតដោយចេតនាស្ថានទម្ងន់ទោស និងចាប់ឃុំឃាំងនិងបង្ខាំងដោយខុសច្បាប់។ សហជីពក៏ត្រូវបានកោះហៅសាកសួរ ជុំវិញបណ្តឹងរបស់ក្រុមហ៊ុនសុំឱ្យតុលាការចេញសេចក្តីសម្រេចលើវិវាទការងារដែលបានអូសបន្លាយ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ NagaWorld Union Leader Stays in Jail as Bail Denied