ប្រទេសកូរ៉េខាងជើង បានឱ្យដឹងនៅថ្ងៃអង្គារនេះថា ខ្លួនបានបញ្ជាឱ្យអង្គភាពយោធាទាំងឡាយបាញ់កាំភ្លើងធំជាច្រើនគ្រាប់បន្ថែមទៀតចូលទៅក្នុងសមុទ្រ ដើម្បីឆ្លើយតបទៅនឹងសមយុទ្ធយោធារបស់ប្រទេសកូរ៉េខាងត្បូងដែលកំពុងបន្តធ្វើឡើងនៅតាមព្រំដែន។ នេះបើតាមការរាយការណ៍ដោយទីភ្នាក់ងារព័ត៌មានរបស់កូរ៉េខាងជើង KCNA ដែលត្រូវបានយកមកចុះផ្សាយបន្តដោយសារព័ត៌មាន Reuters។
ការបញ្ជាឱ្យបាញ់កាំភ្លើងធំជាច្រើនគ្រាប់បន្ថែមទៀតនេះ ធ្វើឡើងបន្ទាប់ពីកងទ័ពកូរ៉េខាងត្បូង និងសហរដ្ឋអាមេរិក បានធ្វើសមយុទ្ធបាញ់គ្រាប់ពិតនៅជិតព្រំដែន ខណៈពួកគេលើកឡើងថា សមយុទ្ធនេះ គឺពិតជាមានសារៈសំខាន់ដើម្បីរារាំងប្រទេសកូរ៉េខាងជើង ដែលបានសាកល្បងបាញ់មីស៊ីលក្នុងចំនួនដ៏ច្រើនសន្ធឹកសន្ធាប់ក្នុងឆ្នាំនេះ។
ទោះជាយ៉ាងណា កូរ៉េខាងជើង បានរិះគន់យ៉ាងខ្លាំងដល់ការធ្វើសមយុទ្ធយោធារួមគ្នានេះ ដោយខ្លួនចាត់ទុកថា វាជាភស្តុតាងនៃគោលនយោបាយអរិភាពពីសហរដ្ឋអាមេរិក និងកូរ៉េខាងត្បូង។
ទីភ្នាក់ងារព័ត៌មាន KCNA បានស្រង់សម្ដីអ្នកនាំពាក្យកងទ័ពកូរ៉េខាងជើងមួយរូបដែលបានថ្លែងថា៖ «សត្រូវត្រូវតែបញ្ឈប់ជាបន្ទាន់នូវសកម្មភាពយោធាទាំងឡាយនៅក្បែរតំបន់ជួរមុខ»។
ប្រភពដដែលបន្តថា ក្រៅពីការបាញ់គ្រាប់កាំភ្លើងធំ កងទ័ពកូរ៉េខាងជើងក៏បានចេញការប្រកាសអាសន្នមួយដល់អង្គភាពគ្រប់លំដាប់ថ្នាក់ ខណៈកងទ័ពនានាក៏ត្រូវបានបញ្ជាឱ្យបង្កើនការឃ្លាំមើលផងដែរ។
គួរបញ្ជាក់ថា ប្រទេសកូរ៉េខាងជើង ក្នុងឆ្នាំ២០២២នេះ បានបង្កើនសកម្មភាពយោធារបស់ខ្លួនយ៉ាងខ្លាំង ដែលរួមមានទាំងការបាញ់មីស៊ីលបាលីស្ទីក, ការធ្វើសមយុទ្ធផ្លូវអាកាស និងការបាញ់កាំភ្លើងធំរាប់រយគ្រាប់។
ទាក់ទិននឹងករណីនេះ រដ្ឋមន្ត្រីការបរទេសនៃក្រុមប្រទេសមានសេដ្ឋកិច្ចជឿនលឿនទាំង៧ (G7) កាលពីពេលកន្លងទៅ ក៏ធ្លាប់បានស្នើក្រុមប្រឹក្សាសន្តិសុខអង្គការសហប្រជាជាតិ ចាត់វិធានការសំខាន់ៗនានា ដើម្បីឆ្លើយតបទៅនឹងសកម្មភាពរបស់ប្រទេសកូរ៉េខាងជើងនេះផងដែរ៕