រដ្ឋមន្ត្រីការបរទេសសហរដ្ឋអាមេរិក លោក អេនតូនី ប្លីនខេន (Antony Blinken) បានឱ្យដឹងនៅថ្ងៃអង្គារម្សិលមិញថា អាមេរិកមិនបានលើកទឹកចិត្ត ឬជំរុញឱ្យកងទ័ពអ៊ុយក្រែនធ្វើការវាយប្រហារនៅខាងក្នុងទឹកដីប្រទេសរុស្ស៊ីឡើយ ប៉ុន្តែពួកគេនៅតែរក្សាជំហររបស់ខ្លួនក្នុងការធ្វើឱ្យប្រាកដថា អ៊ុយក្រែនមានឧបករណ៍ដែលពួកគេត្រូវការគ្រប់គ្រាន់ដើម្បីការពារខ្លួនពីការឈ្លានពាន។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ការលើកឡើងដោយរដ្ឋមន្ត្រីការបរទេសអាមេរិកនេះត្រូវបានធ្វើឡើងបន្ទាប់ពីព្រលានយន្ដហោះរបស់រុស្ស៊ី ទី៣ រងនូវការឆាបឆេះកាលពីថ្ងៃអង្គារ ពីការវាយប្រហារដោយយន្តហោះគ្មានមនុស្សបើក ដែលកើតឡើងក្នុងរយៈពេលមួយថ្ងៃបន្ទាប់ពីអ៊ុយក្រែនបានបង្ហាញពីសមត្ថភាពថ្មីក្នុងការវាយប្រហាររយៈចម្ងាយឆ្ងាយចូលទៅក្នុងដែនអាកាសរុស្ស៊ី។
ទោះជាយ៉ាងណា ខាងភាគីអ៊ុយក្រែនពុំបានចេញមុខទទួលខុសត្រូវដោយផ្ទាល់ចំពោះការវាយប្រហារចុងក្រោយនេះឡើយ បើទោះបីជាមានការចោទប្រកាន់ពីសំណាក់ប្រទេសរុស្ស៊ីក្ដី។
ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំងបន្ទាប់ពីរុស្ស៊ីបានបើកការឈ្លានពានទ្រង់ទ្រាយធំមកលើប្រទេសក្បែរខាងរបស់ខ្លួនមួយនេះ ដែលធ្វើឡើងបន្ទាប់ពីមានការប្រកាសសង្គ្រាមមួយដោយប្រធានាធិបតីរុស្ស៊ី លោក វ្លាឌីមៀរ ពូទីន។
ទោះជាយ៉ាងណា រុស្ស៊ីធ្លាប់បានលើកឡើងកាលពីពេលកន្លងទៅថា សកម្មភាពរបស់ខ្លួននេះ គឺជាការអនុវត្ត «ប្រតិបត្តិការយោធាពិសេសមួយ» ដើម្បីបញ្ឈប់រដ្ឋាភិបាលអ៊ុយក្រែនពីការប្រព្រឹត្តអំពើប្រល័យពូជសាសន៍ប្រឆាំងនឹងប្រជាជនរបស់ខ្លួន ខណៈដែលការចោទប្រកាន់នេះត្រូវបានបណ្ដាប្រទេសមួយចំនួនចាត់ទុកថាជាការលើកឡើងដោយគ្មានមូលដ្ឋានច្បាស់លាស់៕