អ៊ីរ៉ង់បានឱ្យដឹងថា ខ្លួនបានប្រហារជីវិតលើអ្នកទោសដំបូងគេមួយរូប ដែលត្រូវបានកាត់ទោសពីបទឧក្រិដ្ឋកម្មមួយកើតចេញពីការតវ៉ាដែលកំពុងបន្តធ្វើឡើងនៅទូទាំងប្រទេស។ នេះបើតាមការរាយការណ៍ដោយទីភ្នាក់ងារសារព័ត៌មាន Tasnim នៅថ្ងៃព្រហស្បតិ៍នេះ និងត្រូវបានយកមកចុះផ្សាយបន្តដោយសារព័ត៌មាន Al Jazeera។
ប្រភពដដែលបន្តថា បុគ្គលរូបនោះត្រូវបានកាត់ទោសពីបទធ្វើឱ្យសន្តិសុខម្នាក់រងរបួសដោយប្រើប្រាស់កាំបិតវែង និងការធ្វើសកម្មភាពដែលបង្កឱ្យមានការបិទផ្លូវមួយក្នុងរដ្ឋធានីតេហេរ៉ង់ (Tehran)។
ទីភ្នាក់ងារសារព័ត៌មាន Tasnim បានកំណត់អត្តសញ្ញាណអ្នកដែលត្រូវបានប្រហារជីវិតនោះថា ឈ្មោះ Mohsen Shekari ប៉ុន្តែមិនបានផ្ដល់ព័ត៌មានលម្អិតទាក់ទងនឹងបុគ្គលនេះបន្ថែមនោះទេ។
ប្រភពដដែលបន្តថា ការកាត់ទោសនេះកើតឡើងបន្ទាប់ពីតុលាការកំពូលបានច្រានចោលបណ្តឹងឧទ្ធរណ៍ដែលធ្វើឡើងដោយចុងចោទ ខណៈអ៊ីរ៉ង់ក៏បានចាត់ទុកការកាត់ទោសនេះ គឺជារឿងត្រឹមត្រូវ ដោយថា សកម្មភាពរបស់ចុងចោទ គឺជា «ឧក្រិដ្ឋកម្មនៃការរៀបចំឱ្យមានសង្គ្រាមប្រឆាំងនឹងព្រះ»។
គួរបញ្ជាក់ថា ប្រទេសអ៊ីរ៉ង់ ក្នុងរយៈពេលប៉ុន្មានឆ្នាំចុងក្រោយនេះ ត្រូវបានសង្កេតឃើញថាមានការកើតឡើងនូវការតវ៉ាជាបន្តបន្ទាប់ ពោលគឺចាប់តាំងពីមានករណីរបស់ស្ត្រីអ៊ីរ៉ង់ម្នាក់ ឈ្មោះ Mahsa Amini អាយុ២២ឆ្នាំ ដែលបានស្លាប់កាលពីថ្ងៃទី១៦ ខែកញ្ញា បន្ទាប់ពីត្រូវបានឃុំខ្លួនដោយនគរបាលផ្នែកសីលធម៌របស់ប្រទេស។
យោងតាមអង្គការលើកលែងទោសអន្តរជាតិ (Amnesty International) បានលើកឡើងថា អាជ្ញាធរអ៊ីរ៉ង់ បច្ចុប្បន្នកំពុងតែព្យាយាមស្វែងរកការកាត់ទោសប្រហារជីវិតលើមនុស្សយ៉ាងហោចណាស់ ២១នាក់ ក្នុងគោលបំណងដើម្បីបំភិតបំភ័យដល់អ្នកដែលចូលរួមក្នុងការបះបោរក្នុងប្រទេស។
អង្គការលើកលែងទោសអន្តរជាតិ បន្តថា៖ «អាជ្ញាធរអ៊ីរ៉ង់ ត្រូវតែលុបចោលការកាត់ទោសប្រហារជីវិតទាំងអស់ជាបន្ទាន់ បញ្ឈប់ការស្វែងរកការដាក់ទោសប្រហារជីវិត និងទម្លាក់ការចោទប្រកាន់ទាំងអស់ប្រឆាំងនឹងអ្នកដែលត្រូវបានចាប់ខ្លួន ពាក់ព័ន្ធនឹងការចូលរួមដោយសន្តិវិធីក្នុងការតវ៉ាទាំងឡាយ»៕
