រដ្ឋលេខាធិការក្រសួងកសិកម្ម ដែលទើបតែងតាំងថ្មី លោក យ៉ង សាំងកុមារ គ្រោងនឹងជួបពិភាក្សាជាមួយដៃគូពាក់ព័ន្ធ ក្នុងខែធ្នូនេះ ដើម្បីធ្វើយ៉ាងណាជួយដល់ប្រជាកសិករដែលផលិតស្រូវឱ្យទទួលបានតម្លៃសមរម្យ និងនាំចេញទៅក្រៅប្រទេសទទួលបានផលវិជ្ជមានខ្ពស់នៅលើទីផ្សារអន្តរជាតិ។
លោកបណ្ឌិត យ៉ង សាំងកុមារ អតីតប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន និងជាអ្នកជំនាញផ្នែកកសិកម្មផងនោះ កាលពីពេលថ្មីៗនេះ បានចូលរួមជីវភាពនយោបាយជាមួយគណបក្សកាន់អំណាច និងត្រូវបានព្រះមហាក្សត្រតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងកសិកម្ម ហើយរដ្ឋមន្ត្រីក្រសួងនេះ បានផ្តល់ភារកិច្ចដល់លោក យ៉ង សាំងកុមារ កាលពីថ្ងៃទី៦ ខែធ្នូ ដើម្បីឱ្យជួយដោះស្រាយបញ្ហាស្រូវអង្ករនៅកម្ពុជា។
លោក យ៉ង សាំងកុមារ មានប្រសាសន៍នៅថ្ងៃព្រហស្បតិ៍នេះថា លោកនឹងចូលបម្រើការងារជាផ្លូវការនៅក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១២ ខែធ្នូ ឆ្នាំ២០២២នេះ។ លោកបន្តថា នៅពេលលោកចូលបម្រើការងារជាផ្លូវការ គឺលោកមានគម្រោងជួបជាមួយដៃគូពាក់ព័ន្ធ ដូចជា មន្ត្រីថ្នាក់ជាតិ ថ្នាក់ក្រោមជាតិ និងម្ចាស់ម៉ាស៊ីនកិនស្រូវ រួមទាំងកសិករ ដើម្បីជជែកគ្នាលើបញ្ហាប្រឈមនាពេលកន្លងមក ទាក់ទងនឹងវិស័យស្រូវអង្ករនៅកម្ពុជា។
លោកបញ្ជាក់ថា ដើមចមដែលនាំឱ្យលោកមានគម្រោងជួបដៃគូពាក់ព័ន្ធ ដោយសារលោកចង់ឱ្យវិស័យស្រូវអង្ករនៅកម្ពុជាទទួលបានផលវិជ្ជមានខ្ពស់ ហើយប្រជាកសិករដែលធ្វើកសិកម្មដាំស្រូវ នឹងលក់បានតម្លៃសមរម្យស្របតាមតម្លៃលើទីផ្សារជាដើម។
លោកមានប្រសាសន៍ថា៖ «គោលបំណងនៃការងាររបស់យើង គឺធ្វើម៉េចឱ្យកសិករគាត់ទទួលបានប្រាក់ចំណូលសមរម្យ ដោយដៃម្ខាងកាត់បន្ថយថ្លៃដើមនៃការផលិត និងដៃម្ខាងធ្វើម៉េចឱ្យគាត់ទទួលបានទីផ្សារតម្លៃសមរម្យ ក៏ប៉ុន្តែទន្ទឹមនឹងហ្នឹង អ្នកពាក់ព័ន្ធផ្សេងទៀត ម្ចាស់រោងម៉ាស៊ីនកិនស្រូវ អ្នកនាំអង្ករចេញ ក៏គាត់ទទួលបានស្រូវល្អ ស្រូវដែលមានគុណភាព ដែលធ្វើឱ្យគាត់ចំណេញ ដែលអាចធ្វើឱ្យគាត់យកទៅប្រកួតប្រជែងបានក្នុងការនាំចេញទៅក្រៅប្រទេស»។
កាលពីថ្ងៃទី៦ ខែធ្នូ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានថ្លែងក្នុងកិច្ចសំណេះសំណាលជាមួយអ្នកសារព័ត៌មាន ស្តីពី «វិស័យកសិកម្មនៅកម្ពុជា» ថា លោកបានប្រគល់ភារកិច្ចជូនលោកបណ្ឌិត យ៉ង សាំងកុមារ ឱ្យជួយដោះស្រាយបញ្ហាស្រូវអង្ករ ដើម្បីឱ្យតម្លៃស្រូវនៅថេរ ប៉ុន្តែករណីនេះអាស្រ័យទៅលើការសម្រួលនូវចរាចរណ៍ស្រូវ ចូលទៅក្នុងរោងម៉ាស៊ីនកិនស្រូវ ដែលត្រូវរៀបចំឱ្យមានការសហការគ្នារវាងកសិករច្រូតកាត់ និងរោងម៉ាស៊ីនកិនស្រូវ ដោយបង្កើតឱ្យមានការប្រមូលផលជាវគ្គ ដើម្បីកុំឱ្យមានការជាន់គ្នាក្នុងពេលតែមួយ។
ដោយឡែក ចំពោះបញ្ហាខ្វះទុនបង្វិលទិញស្រូវរបស់រោងម៉ាស៊ីនកិនស្រូវឯណោះវិញ រដ្ឋមន្ត្រីកសិកម្មបានបញ្ជាក់ថា ក្រសួងកសិកម្មនឹងសហការជាមួយធនាគារអភិវឌ្ឍន៍ជនបទ និងកសិកម្ម ជួយជំរុញក្នុងការផ្ដល់កម្ចីឱ្យទៅរោងម៉ាស៊ីនកិនស្រូវ ដើម្បីទិញស្រូវពីប្រជាកសិករ កុំឱ្យកកស្ទះជាដើម ។
លោកមានប្រសាសន៍ថា៖ «ខ្ញុំបានប្រគល់ភារកិច្ចជូនឯកឧត្ដម យ៉ង សាំងកុមារ ឱ្យគាត់ជួយមើលរឿង ធ្វើតាមរយៈកិច្ចសន្យាកសិកម្ម ដែលគម្រោងមួយធំ ដែលគាត់ត្រូវធ្វើការងារជាមួយកសិករ និងជាមួយរោងម៉ាស៊ីន ដើម្បីរៀបចំនូវផែនការក្នុងការផលិត ជាមួយនឹងការប្រមូលទិញមកវិញ»។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា ការគ្រោងជួបជាមួយភាគីអ្នកពាក់ព័ន្ធ ដើម្បីដោះស្រាយបញ្ហាទីផ្សារ និងតម្លៃស្រូវ ពីសំណាក់លោក យ៉ង សាំងកុមារ នេះជាសញ្ញាវិជ្ជមានមួយក្នុងការជួយដល់ប្រជាកសិករ។ ជាមួយគ្នានេះដែរ លោកជំរុញដល់ក្រសួងត្រូវធ្វើការផ្សព្វផ្សាយព័ត៌មានឱ្យបានទូលំទូលាយ និងមានការជួបជជែករវាងអ្នកទិញនិងអ្នកដាំដុះ ដើម្បីដោះស្រាយបញ្ហាស្រូវអង្ករឱ្យទទួលបានប្រសិទ្ធភាពខ្ពស់។
លោកមានប្រសាសន៍ថា៖ «ត្រូវតែបើកឱ្យមានការពិគ្រោះយោបល់ជាសាធារណៈ និងការផ្សព្វផ្សាយព័ត៌មានឱ្យបានទូលំទូលាយអំពីទីផ្សារ និងតម្រូវការនៃការនាំចេញរបស់ប្រទេសនីមួយៗដែលត្រូវទិញអង្ករបានពីប្រទេសកម្ពុជា ឬក៏ពីមុខរបររបស់ប្រជាពលរដ្ឋ។ អ្វីដែលត្រូវគិតទៀតនេះ ត្រូវរៀបចំឱ្យមានក្រុមជជែកពិភាក្សាអំពីរបៀបនៃការដាំដុះ ហើយនឹងអ្នកទិញថាតម្រូវការ និងចំនួនអ្នកទិញ តម្រូវការ ថាតើគាត់ជួបបញ្ហាអ្វីខ្លះដែលត្រូវចូលរួមជាមួយគ្នាក្នុងការដោះស្រាយ ឬបំពេញលក្ខខណ្ឌតាមការឆ្លើយតបនៃការត្រូវការនៃការនាំចេញ»។
លោកបន្ថែមថា៖ «ហើយមួយវិញទៀត បន្ថែមនូវថវិកាជាតិ ដើម្បីឱ្យបានច្រើនទៅលើវិស័យកសិកម្មដែរ ពិសេសការគាំពារ ជាពិសេសការគាំទ្រថវិកាជាតិទៅលើវិស័យកសិកម្មឱ្យបានច្រើនដែរ ពិសេសការគាំពារជាថវិកាដល់ការរៀបចំឡសម្ងួតស្រូវនៅតាមស្រុកនីមួយៗ ហើយត្រូវមាន[រោង]ម៉ាស៊ីនក្នុងការទទួលទិញ ហើយពិសេសបន្ថែមនូវថវិកាជាតិបន្ថែមទៀត»។
នៅក្នុងខែវិច្ឆិកា ឆ្នាំ២០២២ កសិករមួយចំនួននៅតាមបណ្ដាខេត្តមួយចំនួន ដូចជា ខេត្តបាត់ដំបង និងបន្ទាយមានជ័យ ជាដើម បានបង្ហោះសារជាបន្តបន្ទាប់នៅលើបណ្ដាញសង្គមហ្វេសប៊ុក ពាក់ព័ន្ធនឹងករណីតម្លៃស្រូវចុះថោក ឬគ្មានទីផ្សារលក់ចេញ ស្របពេលការចំណាយដើមទុន រួមមាន ថ្នាំ ជី ប្រេងសាំង កម្លាំងពលកម្ម និងសម្ភារប្រើប្រាស់ផ្សេងៗទៀត មានតម្លៃថ្លៃ។
ក្រោយមក នៅថ្ងៃទី២១ ខែវិច្ឆិកា ធនាគាអភិវឌ្ឍន៍ជនបទ និងកសិកម្ម បានចេញសេចក្ដីប្រកាសព័ត៌មានមួយថា រដ្ឋាភិបាលតាមរយៈក្រសួងសេដ្ឋកិច្ច បានបញ្ចេញថវិកា ១០លានដុល្លារ លើមូលនិធិសម្រាប់ទិញស្រូវ ៨៣លានដុល្លារ តាយរយៈធនាគារអភិវឌ្ឍន៍ជនបទ និងកសិកម្ម ដើម្បីគាំទ្រដល់រោងម៉ាស៊ីនកិនស្រូវ និងក្រុមហ៊ុនកែច្នៃនាំអង្ករចេញ។ ប្រភពដដែលអះអាងថា ការសម្រេចនេះ ដើម្បីជំរុញការប្រមូលទិញស្រូវ និងជួយរក្សាស្ថិរភាពតម្លៃស្រូវជូនប្រជាកសិករនៅកម្ពុជា ស្របពេលរដូវប្រមូលផលស្រូវរបស់កសិករកំពុងសម្រុកខ្លាំង៕