ប្រធានាធិបតីចិន លោក ស៊ី ជីនពីង និងព្រះមហាក្សត្រ Salman នៃប្រទេសអារ៉ាប៊ីសាអូឌីត បានចុះហត្ថលេខាលើកិច្ចព្រមព្រៀងយុទ្ធសាស្ត្រជាបន្តបន្ទាប់ ដែលក្នុងនោះរួមមានទាំងកិច្ចព្រមព្រៀងមួយដែលពាក់ព័ន្ធនឹងក្រុមហ៊ុនបច្ចេកវិទ្យាយក្សរបស់ចិន Huawei ខណៈសកម្មភាពនេះត្រូវបានរំពឹងថានឹងពង្រឹងទំនាក់ទំនងនយោបាយ និងសេដ្ឋកិច្ចរវាងប្រទេសទាំងពីរបន្ថែមទៀត។ នេះបើតាមការចុះផ្សាយដោយសារព័ត៌មាន Al Jazeera។
ការចុះហត្ថលេខាលើកិច្ចព្រមព្រៀងទាំងនេះត្រូវបានធ្វើឡើងក្នុងអំឡុងដំណើរទស្សនកិច្ចរយៈពេល៣ថ្ងៃរបស់ប្រធានាធិបតីចិនមកកាន់ប្រទេសអារ៉ាប់ និងបណ្ដាប្រទេសជាប់ឈូងសមុទ្រពែក្ស (Gulf) ដោយសកម្មភាពនេះក៏កំពុងតែត្រូវបានឃ្លាំមើលយ៉ាងយកចិត្តទុកដាក់ដោយសហរដ្ឋអាមេរិកផងដែរ។
ជាមួយគ្នានេះ លោក ស៊ី ជីនពីង ក៏គ្រោងនឹងជួបពិភាក្សាគ្នាដោយឡែកជាមួយនឹងមេដឹកនាំនៃបណ្ដាប្រទេសជាសមាជិកក្រុមប្រឹក្សាសហប្រតិបត្តិការបណ្ដាប្រទេសអារ៉ាប់ជាប់ឈូងសមុទ្រពែក្ស (GCC) មុនពេលចាកចេញនៅថ្ងៃសុក្រនេះផងដែរ។
យោងតាមប្រព័ន្ធផ្សព្វផ្សាយរដ្ឋអារ៉ាប៊ីសាអូឌីត បានឱ្យដឹងថា កិច្ចព្រមព្រៀងទាំងឡាយដែលភាគីទាំងពីរត្រូវចុះហត្ថលេខាមានតម្លៃប្រមាណជា ៣០ពាន់លានដុល្លារ ហើយក្នុងនោះ កិច្ចព្រមព្រៀងជាមួយក្រុមហ៊ុនយក្ស Huawei Technologies គឺទាក់ទងទៅនឹងការផ្ទុកទិន្នន័យមជ្ឈមណ្ឌលទិន្នន័យ និងការសាងសង់អគារបំពាក់ដោយបច្ចេកវិទ្យាខ្ពស់មួយចំនួននៅក្នុងទីក្រុងទាំងឡាយនៃប្រទេសអារ៉ាប៊ីសាអូឌីត។
ទីភ្នាក់ងារព័ត៌មានរដ្ឋចិន Xinhua បានរាយការណ៍ថា លោកប្រធានាធិបតី ស៊ី ជីនពីង និងព្រះមហាក្សត្រ Salman នៃប្រទេសអារ៉ាប៊ីសាអូឌីត ក៏បានយល់ព្រមរៀបចំកិច្ចប្រជុំរវាងមេដឹកនាំនៃប្រទេសទាំងពីររៀងរាល់ពីរឆ្នាំម្តងផងដែរ។
គួរបញ្ជាក់ថា ចិនគឺជាប្រទេសនាំចូលប្រេងឆៅធំជាងគេនៅលើពិភពលោក ខណៈប្រទេសនេះពឹងផ្អែកយ៉ាងខ្លាំងលើអារ៉ាប៊ីសាអូឌីត។
ពាណិជ្ជកម្មទ្វេភាគីរវាងប្រទេសទាំងពីរមានចំនួនសរុបប្រមាណជា៨០ពាន់លានដុល្លារ ក្នុងឆ្នាំ២០២១ និង ២៧ពាន់លានដុល្លារនៅក្នុងត្រីមាសទីបី នៃឆ្នាំ២០២២នេះ៕