មន្ត្រីសិទ្ធិមនុស្សបានឱ្យដឹងថា ពលរដ្ឋចំនួន៧នាក់ត្រូវបានតុលាការឃុំខ្លួនបណ្ដោះអាសន្ននៅថ្ងៃទី១២ ខែធ្នូនេះ ពាក់ព័ន្ធរឿងជម្លោះដីធ្លីជាមួយក្រុមហ៊ុនចម្ការកៅស៊ូមួយ នៅឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្ដរមានជ័យ។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត ប្រាប់វីអូឌីថា កាលពីថ្ងៃទី១០ ខែធ្នូ កម្លាំងកងរាជអាវុធហត្ថខេត្តឧត្ដរមានជ័យ បានចាប់ខ្លួនពលរដ្ឋ ៧នាក់ បញ្ជូនទៅតុលាការ ពាក់ព័ន្ធរឿងជម្លោះដីធ្លីជាមួយក្រុមហ៊ុនចម្ការកៅស៊ូ «សុខ សំណាង»។ លោកថា នៅថ្ងៃចន្ទនេះ តុលាការបានឃុំខ្លួនពលរដ្ឋទាំង៧នាក់នោះនៅពន្ធនាគារខេត្តជាបណ្តោះអាសន្ន។
មន្ត្រីការពារសិទ្ធិមនុស្សរូបនេះបន្តថា នេះមិនមែនជាលើកទី១នោះទេ ដែលកម្លាំងកងរាជអាវុធហត្ថខេត្តឧត្តរមានជ័យចាប់ខ្លួនពលរដ្ឋ ជុំវិញរឿងជម្លោះដីធ្លីជាមួយក្រុមហ៊ុនចម្ការកៅស៊ូនេះ។ លោកថា តាមព័ត៌មានដែលលោកទទួលបាន គឺការចាប់ខ្លួននេះមានទាំងការប្រើអំពើហិង្សាលើពលរដ្ឋផងដែរ។
លោក អំ សំអាត លើកឡើងថា បញ្ហាជម្លោះដីធ្លី អាជ្ញាធរគួរតែដោះស្រាយតាមសន្តិវិធី មិនគួរណាប្រើប្រាស់អំពើហិង្សា និងចាប់ខ្លួនពលរដ្ឋដាក់ពន្ធនាគារនោះទេ ដែលនាំឱ្យមានការរិះគន់បន្ថែមទៀតថា កម្ពុជានៅតែបន្តរំលោភសិទ្ធិមនុស្ស។
លោកបន្ថែមថា៖ «ខ្ញុំយល់ថា បើសិនយើងព្យាយាមដោះស្រាយតាមសន្តិវិធីឱ្យអស់ពីលទ្ធភាពនោះ វាប្រសើរជាងប្រើប្រាស់កម្លាំងចាប់បង្ខំ បង្កឱ្យមានអំពើហិង្សា និងការចាប់ខ្លួនដាក់ពន្ធនាគារ ដែលវានាំឱ្យមានការរិះគន់បន្ថែមទៀតពាក់ព័ន្ធការរំលោភសិទ្ធិមនុស្ស ហើយក៏មិនអាចដោះស្រាយវិវាទដីធ្លីនេះបានដែរ។ ផ្ទុយទៅវិញ វាកាន់តែបង្កភាពលំបាកដល់ប្រជាពលរដ្ឋបន្ថែមទៀត»។
ពលរដ្ឋដែលសុំមិនឱ្យប្រាប់ឈ្មោះ ដោយបារម្ភពីសុវត្ថិភាព ប្រាប់វីអូឌីថា ក្នុងហេតុការណ៍កាលពីថ្ងៃទី១០ ខែធ្នូនោះ គឺកម្លាំងកងរាជអាវុធហត្ថបានចុះដុតផ្ទះពលរដ្ឋ និងចាប់ខ្លួនពលរដ្ឋចំនួន៨នាក់ ហើយបានប្រើហិង្សាឱ្យពលរដ្ឋម្នាក់រងបួសធ្ងន់ផងដែរ។
ពលរដ្ឋបន្ថែមថា៖ «ពេលនេះ យើងមិនទាន់ដឹងពីស្ថានភាពសុខភាពបងប្រុសម្នាក់ឈ្មោះ “ដា” ដែលវាយត្រូវខ្លាំងហ្នឹង ថាសុខភាពគាត់ឥលូវយ៉ាងម៉េចហើយទេ! ព្រោះពេលហ្នឹងគេវាយនឹងដំបងដែក ហើយឈាមស្រោចពេញខ្លួន ហើយសន្លប់ ហើយគេលើកដាក់លើឡាន មិនដឹងថាគេបានបញ្ជូនគាត់ទៅពេទ្យឬក៏អត់»។
វីអូឌី មិនទាន់អាចសុំការបញ្ជាក់ពីកងរាជអាវុធហត្ថខេត្ត និងតុលាការខេត្តឧត្តរមានជ័យ បានទេ នៅថ្ងៃចន្ទនេះ។
កាលពីថ្ងៃទី១២ ខែកញ្ញា ឆ្នាំ២០២២ មានការផ្សព្វផ្សាយតាមបណ្ដាញសង្គមអំពីសកម្មភាពប៉ះទង្គិចគ្នាមួយរវាងកម្លាំងសន្តិសុខ និងកម្លាំងសមត្ថកិច្ចប្រដាប់ដោយកាំភ្លើងដែលការពារដីក្រុមហ៊ុនចម្ការកៅស៊ូ «សុខ សំណាង» ជាមួយប្រជាពលរដ្ឋដែលកំពុងចូលកាន់កាប់និងអាស្រ័យផលនៅលើដីមានជម្លោះ ស្ថិតនៅភូមិអូរក្រូច ឃុំត្រពាំងប្រាសាទ ស្រុកត្រពាំងប្រាសាទ ខណៈអាជ្ញាធរចុះឈូសឆាយផ្ទះ និងផលដំណាំរបស់ពលរដ្ឋ។
កាលពីថ្ងៃទី៧ ខែធ្នូ ពលរដ្ឋដែលកំពុងមានជម្លោះដីធ្លីជាមួយក្រុមហ៊ុនចម្ការកៅស៊ូ «សុខ សំណាង» អះអាងថា អាជ្ញាធរបានគំរាមចាប់ខ្លួន និងឈូសឆាយលំនៅឋានរបស់ពួកគាត់ចោល ប្រសិនបើពួកគាត់មិនព្រមរុះរើផ្ទះចេញពីដីដែលកំពុងមានជម្លោះជាមួយក្រុមហ៊ុន។
បើតាមពលរដ្ឋ ក្រោយមានជម្លោះដីធ្លីជាមួយក្រុមហ៊ុនរយៈពេលជាង១ឆ្នាំមកនេះ គឺធ្លាប់មានការប៉ះទង្គិចគ្នារវាងពលរដ្ឋនិងសមត្ថកិច្ចជាច្រើនដងហើយ និងមានពលរដ្ឋប្រមាណ២០នាក់ហើយត្រូវបានចាប់ខ្លួន៕