ធនាគារអភិវឌ្ឍន៍អាស៊ី (ADB) អនុម័តកញ្ចប់ថវិកាចំនួន ៦២,៩លានដុល្លារ ដើម្បីជួយកម្ពុជាលើកកម្ពស់សន្តិសុខស្បៀង និងជំរុញកំណើនសេដ្ឋកិច្ចប្រកបដោយបរិយាបន្ន ដោយការកែលម្អសុខភាព និងខ្សែចង្វាក់តម្លៃ ក៏ដូចជាការធ្វើពាណិជ្ជកម្មផ្លូវការ និងផលិតផលបសុសត្វ។
សេចក្ដីប្រកាសព័ត៌មានរបស់ធនាគារអភិវឌ្ឍន៍អាស៊ី ដែលបានផ្សព្វផ្សាយនៅថ្ងៃទី១៣ ខែធ្នូ ឆ្នាំ២០២២ បានឱ្យដឹងថា គម្រោងកែលម្អសុខភាព និងខ្សែចង្វាក់តម្លៃបសុសត្វឆ្លងព្រំដែន ក្នុងមហាអនុតំបន់មេគង្គ (GMS) នឹងផ្ដល់អត្ថប្រយោជន៍ដោយផ្ទាល់ដល់ពលរដ្ឋយ៉ាងហោចណាស់ ៤០ ០០០គ្រួសារ នៅរាជធានីភ្នំពេញ ខេត្តកំពង់ចាម ឧត្ដរមានជ័យ ព្រៃវែង សៀមរាប និងតាកែវ តាមរយៈការជំរុញការវិនិយោគលើហេដ្ឋារចនាសម្ពន្ធ សមត្ថភាពស្ថាប័ននិងបច្ចេកទេស និងគោលនយោបាយគាំទ្រសំខាន់ៗ។ ក្រៅពីនោះ គម្រោងនេះក៏នឹងអភិវឌ្ឍហេដ្ឋារចនាសម្ពន្ធនៅខេត្តកណ្ដាល កំពង់ធំ និងពោធិ៍សាត់ ដើម្បីបំពេញតម្រូវការទូទាំងប្រទេស សម្រាប់វ៉ាក់សាំងបសុសត្វ និងការបង្កាត់ពូជសិប្បនិម្មិត។
សេចក្តីប្រកាសព័ត៌មាន ADB បន្តថា គម្រោងនេះក៏នឹងលើកកម្ពស់ផលិតភាព និងភាពធន់នៃអនុវិស័យបសុសត្វ ដោយកាត់បន្ថយហានិភ័យនៃជំងឺសត្វឆ្លងដែន ជំងឺឆ្លងពីសត្វ និងភាពស៊ាំនឹងថ្នាំសម្លាប់មេរោគ បង្កើតការត្រួតពិនិត្យសុខភាពសត្វ និងការផ្តល់សេវា ធ្វើឱ្យប្រសើរឡើងនូវសុវត្ថិភាពម្ហូបអាហារ និងជំរុញកិច្ចសហប្រតិបត្តិការអនុតំបន់ក្នុងមហាអនុតំបន់មេគង្គ។
ADB បញ្ជាក់ថា៖ «គម្រោងនេះនឹងត្រូវបានផ្ដល់ហិរញ្ញប្បទានដោយប្រាក់កម្ចីចំនួន ៥0លានដុល្លារ ពីធនធានសម្បទានរបស់ ADB, ជំនួយមូលនិធិអភិវឌ្ឍន៍អាស៊ី [ADF] ចំនួន១២លានដុល្លារ និងជំនួយឥតសំណងចំនួន ៩សែនដុល្លារ ពីមូលនិធិបម្រែបម្រួលអាកាសធាតុ [CCF]»។
អ្នកជំនាញជាន់ខ្ពស់ផ្នែកបម្រែបម្រួលអាកាសធាតុរបស់ ADB ប្រចាំតំបន់អាស៊ីអាគ្នេយ៍ លោក Srinivasan Ancha ត្រូវបានស្រង់ប្រសាសន៍ដាក់ក្នុងសេចក្តីប្រកាសព័ត៌មាននេះដែរថា អនុវិស័យបសុសត្វមានសារៈសំខាន់ណាស់ចំពោះជីវភាពរស់នៅតាមតំបន់ជនបទ ប្រកបដោយនិរន្តរភាព និងសន្តិសុខស្បៀងនៅក្នុងប្រទេសកម្ពុជា ហើយវាផ្តល់ឱកាសជាច្រើនសម្រាប់កសិករលក្ខណៈគ្រួសារ រួមទាំងស្ត្រី និងកសិអាជីវកម្មខ្នាតតូចនិងមធ្យម។
លោកបន្តថា៖ «សត្វពាហនៈ និងក្របី ស្ទើរតែទាំងអស់ គឺជាកម្មសិទ្ធិរបស់កសិករលក្ខណៈគ្រួសារ ទោះបីជាផលិតកម្មជ្រូក និងបសុបក្សី កំពុងមានលក្ខណៈជាពាណិជ្ជកម្មកាន់តែខ្លាំងឡើងក៏ដោយ ជំនួយរបស់ ADB នឹងអនុញ្ញាតឱ្យអនុវិស័យនេះអាចទាញយកសក្ដានុពលនៃកំណើនខ្ពស់ នាំមកដោយការកើនឡើងនៃការប្រើប្រាស់សាច់ក្នុងស្រុក ដែលកើតឡើងដោយសារកំណើនសេដ្ឋកិច្ច នគរូបនីយកម្ម ចំនួនប្រជាជនកើនឡើង ឱកាសពាណិជ្ជកម្ម និងការធ្វើឱ្យប្រសើរជាលំដាប់ក្នុងការគ្រប់គ្រងជំងឺ និងអាហារូបត្ថម្ភសម្រាប់សត្វ»។
បើតាមសេចក្តីប្រកាសព័ត៌មានរបស់ ADB គឺធនាគារវិនិយោគហេដ្ឋារចនាសម្ព័ន្ធអាស៊ី (AIIB) ក៏នឹងផ្ដល់ប្រាក់កម្ចីចំនួន ៤៣លានដុល្លារ ដល់គម្រោងនេះ ដែលចំនួននេះនឹងត្រូវគ្រប់គ្រងដោយ ADB។ គម្រោងនេះ គឺស្របតាមផែនការអភិវឌ្ឍន៍ជាតិរបស់រដ្ឋាភិបាល និងយុទ្ធសាស្ត្រភាពជាដៃគូ ប្រចាំប្រទេសរបស់ ADB សម្រាប់ប្រទេសកម្ពុជា ឆ្នាំ២០១៩-២០២៣៕
