ក្រុមហ៊ុនជួញដូរសត្វស្វាសម្រាប់គោលដៅវេជ្ជសាស្ត្រមួយរបស់អាមេរិក បានឱ្យដឹងថា ការផ្គត់ផ្គង់សត្វស្វារបស់ខ្លួនពីកម្ពុជាត្រូវបានបញ្ឈប់ បន្ទាប់ពីសហរដ្ឋអាមេរិកបានចោទប្រកាន់ក្រុមហ៊ុនផ្គត់ផ្គង់កម្ពុជាមួយពីបទ «ជួញដូរសត្វស្វាព្រៃដោយខុសច្បាប់» ខណៈក្រុមហ៊ុនបុត្រសម្ពន្ធចំនួនពីររបស់ខ្លួនក៏ប្រឈមនឹងការជាប់ពាក់ព័ន្ធនឹងករណីនេះផងដែរ។
ថ្នាក់ដឹកនាំក្រុមហ៊ុន វ៉ាន់នី បាយអូ រីស៊ើច (Vanny Bio-Research) ដែលមានកសិដ្ឋានចិញ្ចឹមស្វាក្នុងខេត្តពោធិ៍សាត់ និងទីតាំងផ្សេងទៀត បានប្រឈមនឹងការចោទប្រកាន់ពីបទ «សមគំនិត និងការរត់ពន្ធដោយខុសច្បាប់» ខណៈមន្ត្រីក្រសួងកសិកម្មកម្ពុជាពីររូបក៏ត្រូវបានចោទប្រកាន់ក្នុងសំណុំរឿងនេះផងដែរ ដែលក្នុងនោះមានម្នាក់ត្រូវបានចាប់ខ្លួននៅទីក្រុងញូវយ៉ក កាលពីខែមុន។
បន្ទាប់ពីមានការចាប់ខ្លួនប្រធាននាយកដ្ឋានសត្វព្រៃ និងជីវចម្រុះ នៃរដ្ឋបាលព្រៃឈើ លោក គ្រី ម៉ះផល កាលពីខែមុន នៅអាកាសយានដ្ឋានអន្តរជាតិ ចន អេហ្វ កេណ្ណេឌី (John F. Kennedy) ក្នុងរដ្ឋញូវយ៉ក សហរដ្ឋអាមេរិក ក្រសួងកសិកម្មក៏បានចេញសេចក្តីប្រកាសព័ត៌មានមួយ ដោយបង្ហាញការភ្ញាក់ផ្អើល និងខកចិត្តជាខ្លាំងចំពោះការចាប់ខ្លួននេះ ដោយអះអាងថា នឹងស្វែងរកយុត្តិធម៌ដល់មន្ត្រីរបស់ខ្លួនដែលត្រូវបានចាប់ខ្លួននៅសហរដ្ឋអាមេរិកនេះផងដែរ។
យោងតាមការអះអាងដោយសហរដ្ឋអាមេរិក សត្វស្វាព្រៃរាប់ពាន់ក្បាលត្រូវបានចាប់ និងនាំយកទៅកាន់កសិដ្ឋានរបស់ក្រុមហ៊ុន វ៉ាន់នី បាយអូ រីស៊ើច ដើម្បីរៀបចំសម្រាប់ការនាំចេញ។
កម្មករមួយចំនួនធ្វើការនៅកសិដ្ឋានក្នុងខេត្តពោធិ៍សាត់ កាលពីខែមុន ក៏បានលើកឡើងថា សត្វស្វាព្រៃត្រូវបានគេនាំចូលទៅក្នុងទីតាំងនោះ ខណៈភ្នំមួយចំនួននៅក្បែរនោះត្រូវបានស្គាល់ថាជាកន្លែងសម្រាប់បរបាញ់សត្វស្វារបស់អ្នកស្រុក។
សំណុំរឿងនេះ បច្ចុប្បន្នបានឈានដល់ក្រុមហ៊ុន Inotiv, Inc. ជាក្រុមហ៊ុនស្រាវជ្រាវឱសថមួយដែលមានមូលដ្ឋាននៅក្នុងរដ្ឋ Indiana ខណៈខ្លួនបានឱ្យដឹងនៅក្នុងសេចក្តីថ្លែងការណ៍មួយថា ក្រុមហ៊ុន វ៉ាន់នី បាយអូ រីស៊ើច គឺជាអ្នកផ្គត់ផ្គង់ដ៏សំខាន់របស់ខ្លួន។
នៅក្នុងសេចក្តីថ្លែងការណ៍ ក្រុមហ៊ុនដដែលនេះបន្ថែមថា បច្ចុប្បន្ន ខ្លួនលែងទទួលសត្វស្វាពីកម្ពុជាទៀតហើយ។
ក្រុមហ៊ុនបន្តថា៖ «យើងបានទទួលដំណឹងថា កម្ពុជាបច្ចុប្បន្នបានបញ្ឈប់ការនាំចេញសត្វស្វាហើយ។ ដូច្នេះ យើងមិនបាននាំចូលសត្វស្វាណាមួយពីកម្ពុជាឡើយ។ យើងមិនដឹងថាតើពួកគេមានបំណងបន្តអនុញ្ញាតឱ្យមានការដឹកជញ្ជូននេះឡើងវិញនៅពេលណានោះទេ»។
ទោះជាយ៉ាងណា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កញ្ញា អ៊ឹម រចនា បានឱ្យដឹងនៅថ្ងៃអង្គារនេះថា ការនាំចេញ គឺមិនត្រូវបានបញ្ឈប់នោះទេ។
កញ្ញាថា៖ «ក្រសួងកសិកម្ម រុក្ខាប្រមាញ់ និងនេសាទ សូមធ្វើការបញ្ជាក់ថា រដ្ឋាភិបាលកម្ពុជាមិនបានផ្អាកការនាំចេញសត្វស្វាក្ដាមទៅកាន់ទីផ្សារអន្តរជាតិនោះទេ»។
សម្រាប់សេចក្តីថ្លែងការណ៍របស់ក្រុមហ៊ុន Inotiv, Inc. កាលពីថ្ងៃចន្ទវិញ ក៏បានឱ្យដឹងថា ក្រុមហ៊ុននឹងឈប់លក់សត្វស្វាកម្ពុជាដល់អតិថិជន ស្របពេលដែលមានការចោទប្រកាន់ពីការជួញដូរសត្វព្រៃខុសច្បាប់នេះ។
សេចក្តីថ្លែងការណ៍ដដែលបន្ថែមថា៖ «ក្រុមហ៊ុនសូមធ្វើការថ្កោលទោសយ៉ាងខ្លាំងចំពោះរាល់ការជួញដូរ និងការនាំចូលដែលគ្មានការអនុញ្ញាតណាមួយនៃប្រភេទសត្វកម្រជិតផុតពូជ ខណៈការកាត់បន្ថយចំនួនសត្វស្វាដែលប្រើសម្រាប់គោលដៅវេជ្ជសាស្ត្រ ជាពិសេសសម្រាប់ការធ្វើពិសោធក៏គួរតែត្រូវបានធ្វើឡើងផងដែរ»។
យោងតាមការបញ្ជាក់ដោយក្រុមហ៊ុន សត្វស្វាប្រមាណ ៦០% ដែលនាំចូលមកសហរដ្ឋអាមេរិក ក្នុងអំឡុងរយៈពេល១២ខែ (គិតត្រឹមថ្ងៃទី៣០ ខែកញ្ញា ) គឺនាំមកពីប្រទេសកម្ពុជា។
ក្រុមហ៊ុនក៏បាននិងកំពុងសហការយ៉ាងពេញលេញជាមួយការិយាល័យមេធាវីរបស់សហរដ្ឋអាមេរិក រួមទាំងការផ្គត់ផ្គង់ឯកសារ និងព័ត៌មានពីក្រុមហ៊ុនបុត្រសម្ពន្ធចំនួនពីរ ស្តីពីការនាំចូលសត្វស្វាមកកាន់សហរដ្ឋអាមេរិកផងដែរ។
ទាក់ទិនករណីនេះ អង្គការលើកកម្ពស់សិទ្ធិសត្វរបស់អាមេរិក People for the Ethical Treatment of Animals (PETA) ក៏បានអំពាវនាវដល់រាល់មន្ទីរពិសោធដែលបានទិញសត្វស្វាពីក្រុមហ៊ុន Inotiv, Inc. ឱ្យធ្វើការផ្ទេរសត្វស្វាដែលត្រូវបានរកឃើញថាត្រូវបានជួញដូរដោយខុសច្បាប់ទៅកាន់ទីជម្រកផងដែរ។
ថ្លែងឱ្យដឹងនៅក្នុងសេចក្តីថ្លែងការណ៍មួយ អនុប្រធានជាន់ខ្ពស់របស់អង្គការ PETA អ្នកស្រី Kathy Guillermo បានលើកឡើងថា៖ «ក្រោមទិដ្ឋភាពច្បាប់ មន្ទីរពិសោធណាមួយដែលរក្សាទុកនូវសត្វស្វាដែលត្រូវបានជួញដូរដោយខុសច្បាប់នៅពេលនេះ គឺអាចចាត់ទុកបានថាជារឿងខុសច្បាប់ ដែលអាចចាត់វិធានការបាន។ សត្វស្វា មិនគួរត្រូវបានកំណត់ជាគោលដៅនៅក្នុងមន្ទីរពិសោធសម្រាប់ហេតុផលណាមួយឡើយ ខណៈសកម្មភាពដ៏ឃោរឃៅនេះត្រូវតែបញ្ចប់ជាបន្ទាន់ ហើយមន្ទីរពិសោធក៏គួរតែចាប់ផ្តើមបញ្ជូនសត្វដែលត្រូវបានជួញដូរដោយខុសច្បាប់ទាំងនោះទៅកាន់ទីជម្រកដែលមានសុវត្ថិភាពផងដែរ»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ US Monkey Importer Says It No Longer Gets Animals From Cambodia
