សាលាឧទ្ធរណ៍រាជធានីភ្នំពេញ នៅថ្ងៃពុធម្សិលមិញនេះ បានតម្កល់សេចក្ដីសម្រេចក្នុងសំណុំរឿង«បរិហារកេរ្តិ៍»របស់អនុប្រធានគណបក្សភ្លើងទៀន លោក សុន ឆ័យ និងសម្រេចបង្កើនប្រាក់សំណងជំងឺចិត្តដែលតុលាការបង្គាប់ឱ្យផ្ដល់ជូនទៅបក្សកាន់អំណាចដល់ចំនួន១លានដុល្លារអាមេរិក។
លោក សុន ឆ័យ ត្រូវបានគណៈកម្មាធិការជាតិរៀបចំការបោះឆ្នោត (គ.ជ.ប.) និងគណបក្សប្រជាជនកម្ពុជា ប្ដឹងពាក់ព័ន្ធនឹងករណីដែលលោកបានថ្លែងរិះគន់អំពីការបោះឆ្នោតជ្រើសរើសក្រុមប្រឹក្សាឃុំសង្កាត់នៅកម្ពុជា កាលពីថ្ងៃទី៥ ខែមិថុនា ដោយថា លទ្ធផលបោះឆ្នោតមិនបានឆ្លុះបញ្ចាំងពីឆន្ទៈរបស់ពលរដ្ឋ មានការបំភិតបំភ័យ មានការទិញ និងមានការលួចសន្លឹកឆ្នោត។
ទាក់ទិននឹងករណីនេះ សាលាដំបូងរាជធានីភ្នំពេញ កាលពីខែតុលាកន្លងទៅ បានប្រកាសសាលក្រមឱ្យលោក សុន ឆ័យ ចាញ់ក្ដីក្នុងសំណុំរឿងបរិហារកេរ្តិ៍ ដែលប្ដឹងដោយ គ.ជ.ប. និងគណបក្សប្រជាជនកម្ពុជា ដោយបានសម្រេចឱ្យរូបលោកផ្ដល់សំណងជំងឺចិត្តដល់គណបក្សកាន់អំណាចមួយនេះចំនួន «៣ពាន់លានរៀល» ឬស្មើប្រមាណ «៧៥ម៉ឺនដុល្លារ»។
ក្រៅពីការសម្រេចនេះ ចៅក្រមជំនុំជម្រះ ក៏បានបង្គាប់ឱ្យលោក សុន ឆ័យ បង់ប្រាក់ពិន័យចំនួន៨លានរៀលចូលថវិការដ្ឋ។ បន្ថែមពីលើនេះ លោកក៏ត្រូវបានតុលាការតម្រូវឱ្យបង់ប្រាក់ពិន័យចំនួន៩លានរៀលបន្ថែមទៀតចូលថវិការដ្ឋ ក្នុងបណ្ដឹងបរិហារកេរិ៍្តរបស់គ.ជ.ប. ផងដែរ។
ទោះជាយ៉ាងណា សាលាឧទ្ធរណ៍រាជធានីភ្នំពេញ នៅថ្ងៃពុធម្សិលមិញ បានតម្កល់សេចក្ដីសម្រេចក្នុងសំណុំរឿងទាំងពីរនេះ របស់លោក សុន ឆ័យ និងបានបង្កើនប្រាក់ពិន័យរហូតដល់ ១០លានរៀល ក្នុងសំណុំរឿងនីមួយៗ ខណៈចៅក្រមក៏បានសម្រេចបង្កើនប្រាក់សំណងជំងឺចិត្តឱ្យទៅបក្សកាន់អំណាចដល់ ៤ពាន់លានរៀល ឬស្មើប្រមាណ ១លានដុល្លារអាមេរិកផងដែរ។
លោក កែត ឃី ដែលជាមេធាវីការពារសិទ្ធិមួយរូបរបស់លោក សុន ឆ័យ បានថ្លែងប្រាប់វីអូឌីថា ការសម្រេចនេះ គឺជារឿងដែលអយុត្តិធម៌មួយ។
លោកថា៖ «វាមិនត្រឹមត្រូវនោះទេ។ វាពិតជាអយុត្តិធម៌ខ្លាំងណាស់សម្រាប់កូនក្ដីរបស់ខ្ញុំ។ យើងនឹងរៀបចំពាក្យបណ្ដឹងបន្តទៀតទៅកាន់តុលាការកំពូល»។
សវនាការជំនុំជម្រះលើបណ្ដឹងជំទាស់របស់លោក សុន ឆ័យ បានបញ្ចប់ទៅនៅវេលាម៉ោងប្រមាណជា ៦ល្ងាច។ ទោះជាយ៉ាងណា ទាំងលោក សុន ឆ័យ និងមេធាវីការពារ លោក ជូង ជូងី បានចាកចេញពីបន្ទប់សវនាការមុនពេលប្រកាសសាលក្រម។
សាលាដំបូងរាជធានីភ្នំពេញ កាលពីខែមុន ក៏បានចេញដីកាសម្រេចរឹបអូសជាបណ្តោះអាសន្ននូវផ្ទះ២កន្លែងរបស់លោក សុន ឆ័យ នៅរាជធានីភ្នំពេញ និងខេត្តសៀមរាប ផងដែរ។
គួរបញ្ជាក់ថា ក្រុមសិទ្ធិមនុស្ស និងអ្នកសង្កេតការណ៍បោះឆ្នោតមួយចំនួន ក៏ធ្លាប់បានកត់សម្គាល់ពីភាពមិនប្រក្រតីនានាក្នុងអំឡុងការបោះឆ្នោតកាលពីខែមិថុនា ឆ្នាំ២០២២ ជាពិសេសការបំភិតបំភ័យលើបេក្ខជនគណបក្សប្រឆាំងអំឡុងពេលឃោសនាបោះឆ្នោត និងវត្តមានមន្ត្រីរដ្ឋដែលមិនពាក់ព័ន្ធនឹងកិច្ចការងារបោះឆ្នោតនៅជុំវិញការិយាល័យបោះឆ្នោតក្នុងអំឡុងពេលបោះឆ្នោតផងដែរ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Appeal Court Increases Son Chhay’s Defamation Damages to $1M
