ប្រទេសរុស្ស៊ី បានច្រានចោល «បទឈប់បាញ់នៅថ្ងៃបុណ្យណូអែល» បន្ទាប់ពីសង្គ្រាមជិត១០ខែនៅអ៊ុយក្រែន ហើយបានច្រានចោលការអំពាវនាវរបស់ទីក្រុងកៀវ ដែលទាមទារឱ្យចាប់ផ្ដើមដកទ័ពនៅថ្ងៃបុណ្យណូអែល ដែលជាជំហានមួយដើម្បីបញ្ចប់ជម្លោះដ៏ធំបំផុតរបស់អឺរ៉ុប ចាប់តាំងពីសង្គ្រាមលោកលើកទីពីរ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី១៥ ខែធ្នូ ឆ្នាំ២០២២នេះ។
កាលពីថ្ងៃពុធម្សិលមិញ រុស្ស៊ីបានបើកការវាយប្រហារទ្រង់ទ្រាយធំ ដោយយន្តហោះគ្មានមនុស្សបើក (ដ្រូន) ទៅលើរដ្ឋធានីរបស់ប្រទេសអ៊ុយក្រែន។ អគាររដ្ឋបាលចំនួន២ ត្រូវបានវាយប្រហារ។ ទោះយ៉ាងណា ប្រព័ន្ធការពារដែនអាកាសរបស់អ៊ុយក្រែន បានវាយបកចំពោះការវាយប្រហារនោះ។ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskiy) បាននិយាយថា ដ្រូនចំនួន១៣គ្រឿងត្រូវបានបាញ់ទម្លាក់។
លោក Zelenskiy បាននិយាយនៅក្នុងសុន្ទរកថាតាមវីដេអូថា៖ «មិនមានភាពស្ងប់ស្ងាត់នៅខ្សែបន្ទាត់ខាងមុខឡើយ មានតែសំណង់បាក់បែក»។
នៅពេលសួរថា តើទីក្រុងម៉ូស្គូបានឃើញសំណើរបស់ទីក្រុងកៀវចំពោះ «បទឈប់បាញ់នៅបុណ្យណូអែល» ឬទេ? អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) បានប្រាប់អ្នកសារព័ត៌មានថា៖ «មិនបានឃើញ។ យើងមិនបានទទួលសំណើអំពីបទឈប់បាញ់ពីនរណាម្នាក់ឡើយ»។
លោកបន្តថា ប្រធានបទនេះ [បទឈប់បាញ់] មិនមាននៅក្នុងរបៀបវារៈនោះទេ។
លោក Zelenskiy បាននិយាយនៅសប្តាហ៍នេះថា រុស្ស៊ីគួរតែចាប់ផ្តើមដកទ័ពនៅថ្ងៃបុណ្យណូអែល ដែលជាជំហានមួយដើម្បីបញ្ចប់ជម្លោះ ប៉ុន្តែទីក្រុងមូស្គូបានច្រានចោលសំណើនេះ ដោយនិយាយថា អ៊ុយក្រែនត្រូវទទួលស្គាល់ចំពោះការបាត់បង់ទឹកដីទៅខាងរុស្ស៊ី មុនពេលមានចំណាត់ការណាមួយ។
ប្រទេសរុស្ស៊ីដែលហៅសង្គ្រាមនៅអ៊ុយក្រែនថាជា «ប្រតិបត្តិការយោធាពិសេស» បានបាញ់ស្រោចមីស៊ីលលើហេដ្ឋារចនាសម្ពន្ធថាមពលរបស់អ៊ុយក្រែនចាប់តាំងពីខែតុលាមក ដោយបានកាត់ផ្តាច់ការផ្គត់ផ្គង់ថាមពល និងធ្វើឱ្យប្រជាជនអ៊ុយក្រែន មិនមានកម្ដៅក្នុងអំឡុងរដូវរងានេះ។
មនុស្សរាប់ម៉ឺននាក់ត្រូវបានសម្លាប់ រាប់លាននាក់ផ្សេងទៀតបានផ្លាស់ទីលំនៅ ហើយទីក្រុងនានាបានក្លាយទៅជាគំនរបាក់បែក ចាប់តាំងពីរុស្ស៊ីបានលុកលុយអ៊ុយក្រែនកាលពីថ្ងៃទី២៤ ខែកុម្ភៈ ឆ្នាំ២០២២ ដោយរដ្ឋាភិបាលក្រុងមូស្គូនិយាយថា ជាប្រតិបត្តិការយោធាពិសេស ដើម្បីការពារអ្នកនិយាយរុស្ស៊ីពីអ្នកស្តាំនិយមអ៊ុយក្រែន។ ទីក្រុងកៀវ និងសម្ពន្ធមិត្ត ហៅទង្វើនេះថាជាសង្គ្រាមឈ្លានពាន៕
