មនុស្សយ៉ាងហោចណាស់ ១៦នាក់ស្លាប់ ខណៈមួយចំនួនទៀតបាត់ខ្លួន ក្នុងឧបទ្ទវហេតុរអិលបាក់ដី នៅកន្លែងបោះតង់មួយក្បែរមជ្ឈមណ្ឌលកម្សាន្ត Genting Highlands ក្នុងប្រទេសម៉ាឡេស៊ី នៅព្រឹកថ្ងៃសុក្រនេះ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន CNA នៅថ្ងៃទី១៦ ខែធ្នូ ឆ្នាំ២០២២នេះ។
ក្រុមអ្នកជួយសង្គ្រោះកំពុងរុករកមនុស្សចំនួន១៧នាក់ទៀតដែលកំពុងបាត់ខ្លួននៅកន្លែងបោះតង់ ក្បែរកសិដ្ឋានសរីរាង្គ (Father’s Organic Farm) ក្នុងទីក្រុងហ្គោតុងចាយ៉ា (Gohtong Jaya) រដ្ឋសេឡាងហ្គ័រ (Selangor)។
ក្រសួងអភិវឌ្ឍន៍រដ្ឋាភិបាលក្នុងតំបន់របស់ប្រទេសម៉ាឡេស៊ី បានលើកឡើងថា មនុស្សចំនួន៦១នាក់ត្រូវបានរកឃើញថាមានសុវត្ថិភាព ក្នុងចំណោមមនុស្សសរុបចំនួន៩៤នាក់ដែលជាប់នៅក្រោមគំនរដីដែលបានរអិលបាក់។
អធិការនគរបាលស្រុក លោក ស៊ូហ្វ៊ាន អាប់ឌុលឡា (Suffian Abdullah) បាននិយាយថា ជនរងគ្រោះដែលស្លាប់ គឺជាជនជាតិម៉ាឡេស៊ី រួមទាំងកុមារម្នាក់អាយុប្រហែល៥ឆ្នាំផងដែរ។
លោកបានប្រាប់សន្និសីទសារព័ត៌មានមួយថា កងកម្លាំងសង្គ្រោះជិត៤០០នាក់មកពីទីភ្នាក់ងារផ្សេងៗគ្នា ត្រូវបានដាក់ពង្រាយដើម្បីបន្តរុករកជនរងគ្រោះដែលបាត់ខ្លួន។
ជនរងគ្រោះម្នាក់ឈ្មោះ តេ លីន ហ្ស័ន (Teh Lynn Xuan) អាយុ២២ឆ្នាំ បាននិយាយថា នាងទៅបោះតង់ជាមួយមនុស្ស៤០នាក់ផ្សេងទៀត នៅពេលមានការរអិលបាក់ដី។
Teh Lynn Xuan បានប្រាប់សារព័ត៌មាន Berita Harian ជាភាសាម៉ាឡេស៊ីថា៖ «ខ្ញុំបានឮសំឡេងខ្លាំងដូចរន្ទះ។ វាជាសំឡេងថ្មដែលកំពុងធ្លាក់។ យើងមានអារម្មណ៍ថាតង់ចាប់ផ្ដើមរង្គើ ហើយដីបានធ្លាក់ចុះនៅជុំវិញយើង។ សំណាងហើយដែលខ្ញុំអាចចេញពីតង់ ហើយទៅកន្លែងដែលមានសុវត្ថិភាព។ ម្តាយខ្ញុំ និងខ្ញុំ អាចវារចេញពីតង់ ហើយយើងមានសុវត្ថិភាព»។
ប្រធាននាយកដ្ឋានពន្លត់អគ្គិភ័យ និងសង្គ្រោះប្រចាំរដ្ឋសេឡាងហ្គ័រ (Selangor) លោក ណូរ៉ាហ្សាម ខាមីស (Norazam Khamis) បាននិយាយថា ការរអិលបាក់ដីបានធ្លាក់ពីកម្ពស់ប្រមាណ ៣០ម៉ែត្រ ពីលើទីតាំងបោះជំរុំ ហើយបានគ្របដណ្ដប់លើផ្ទៃដីប្រហែល១ហិកតា។
នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) បាននិយាយថា លោកមានការតក់ស្លុតចំពោះឧបទ្ទវហេតុនេះ។
លោកថា៖ «ខ្ញុំបានស្នើឱ្យស្ថាប័នរដ្ឋាភិបាលទាំងអស់ធ្វើប្រតិបត្តិការស្វែងរក និងជួយសង្គ្រោះជនរងគ្រោះដោយប្រុងប្រយ័ត្ន និងជាប្រព័ន្ធ»។
គ្រោះមហន្តរាយនេះបានកើតឡើងប្រហែល ៥០គីឡូម៉ែត្រភាគខាងជើងនៃទីក្រុងគូឡាឡាំពួ ក្នុងទីប្រជុំជនបាតាំងកាលី (Batang Kali) នៅខាងក្រៅតំបន់ជួរភ្នំដ៏ពេញនិយម Genting Highlands ដែលត្រូវបានគេស្គាល់ថាជារមណីយដ្ឋានដ៏ស្រស់ស្អាតបែបធម្មជាតិ។
គួរបញ្ជាក់ថា កាលពីឆ្នាំមុន មនុស្សប្រហែល២១ ០០០នាក់បានផ្លាស់ទីលំនៅដោយសារជំនន់ទឹកភ្លៀង នៅក្នុងរដ្ឋចំនួន៧ នៅទូទាំងប្រទេសម៉ាឡេស៊ី។
នៅឆ្នាំ១៩៩៣ ការរអិលបាក់ដីបានសម្លាប់មនុស្សចំនួន៤៨នាក់ ដែលបង្កឡើងដោយភ្លៀងធ្លាក់ខ្លាំង និងបណ្តាលឱ្យអគារលំនៅដ្ឋានកម្ពស់១២ជាន់រលំ៕
