សមត្ថកិច្ចជំនាញបានចាប់ឃាត់ខ្លួន និងកំពុងសួរនាំជនសង្ស័យជាជនជាតិចិន ៤នាក់និងស្ត្រីខ្មែរម្នាក់ ពាក់ព័ន្ធនឹងករណីរកឃើញគ្រាប់បែកដៃមួយគ្រាប់នៅមុខក្រុមហ៊ុនណាហ្គាវើលដ៍២ ក្នុងខណ្ឌចំការមន រាជធានីភ្នំពេញ។
នៅថ្ងៃទី១៥ ខែធ្នូ ម្សិលមិញនេះ ស្រ្តីជាអ្នកបោសសំរាមម្នាក់ បានប្រទះឃើញគ្រាប់បែកមួយគ្រាប់ នៅមុខក្រុមហ៊ុនណាហ្គា ខណៈអ្នកស្រីកំពុងបោសសម្អាតវិថីរដ្ឋសភា។
ជុំវិញករណីនេះ អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានឱ្យដឹងនៅថ្ងៃសុក្រនេះថា កងកម្លាំងនគរបាលដ្ឋានខណ្ឌចំការមន និងនាយកដ្ឋានព្រហ្មទណ្ឌនៅក្រសួងមហាផ្ទៃ បានធ្វើការឃាត់ខ្លួនជនសង្ស័យចំនួន៥នាក់ ក្នុងនោះមានជនជាតិចិនចំនួន៤នាក់ រួមមានឈ្មោះ YANG JIAKANG, TU LINAN, YANG YUDONG, CHEN DI និងឈ្មោះ សួង ស្រីអូន ជនជាតិខ្មែរ។
លោកបន្តថា បច្ចុប្បន្ន ជនសង្ស័យទាំងនោះកំពុងស្ថិតក្រោមការសាកសួរ និងស៊ើបអង្កេតពីសំណាក់សមត្ថកិច្ចនាយកដ្ឋានព្រហ្មទណ្ឌនៃក្រសួងមហាផ្ទៃ។
លោកថា៖ «កងកម្លាំងនគរបាលដ្ឋានខណ្ឌចំការមន និងនាយកដ្ឋានព្រហ្មទណ្ឌនៅក្រសួងមហាផ្ទៃ បានធ្វើការឃាត់ខ្លួនជនសង្ស័យបាន៥នាក់ហើយ ក្នុងនោះយើងបានបញ្ជូនទៅនាយកដ្ឋានព្រហ្មទណ្ឌក្រសួងមហាផ្ទៃ»។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍បន្ថែមថា ក្រៅពីការចាប់ឃាត់ខ្លួនជនសង្ស័យទាំងនោះ សមត្ថកិច្ចក៏បានចាប់យកវត្ថុតាងរថយន្ត០១គ្រឿងម៉ាក LANG ROVER DEFENDER ស៊េរីទំនើបមួយគ្រឿងផងដែរ។
លោកបន្តថា ក្រោយការសាកសួរចប់ សមត្ថកិចនឹងបញ្ជូនជនសង្ស័យទាំងនោះទៅតុលាការ។
លោកថា៖ «ចំពោះឡានដែលរកឃើញតាមកាមេរ៉ាតាមដងផ្លូវហ្នឹង ដែលយើងសង្ស័យថាធ្លាក់គ្រាប់បែកហ្នឹង យើងរកឃើញហើយ! ឆ្លងតាមការរកឃើញហ្នឹង កាន់តែធ្វើឱ្យសមត្ថកិច្ចមានពន្លឺថែមទៀត ដើម្បីដៅរកមុខសញ្ញាសង្ស័យ ចាប់ខ្លួន និងបញ្ជូនទៅតុលាការ»។
បើតាមលោក ខៀវ សុភ័គ ដែលបានបញ្ជាក់កាលពីថ្ងៃម្សិលមិញ ករណីរកឃើញគ្រាប់បែកនៅមុខក្រុមហ៊ុនកាស៊ីណូណាហ្គានេះ មិនមែនជារឿងភេរវកម្ម ឬរឿងនយោបាយនោះទេ តែអាចជារឿងដែលជនបង្កចាញ់ល្បែងច្រើនជាង។
លោកថា៖ «ដូច្នេះ ក្នុងជំហានដំបូងនេះ យើងរកឃើញថា វាអាចមិនមែនជារឿងភេរវកម្មអីទេ ហើយក៏មិនមែនជារឿងនយោបាយ គំរាមកំហែងអី អត់មានទេ! សន្និដ្ឋានទីមួយ វាអាចជាជម្លោះឈ្លោះគ្នា ឬក៏ការគំរាមគ្នាក្នុងរឿងល្បែងស៊ីសងនេះ ដូចថាចាញ់ល្បែងគំរាមគ្នា អាចអ៊ីចឹងច្រើនជាង»។
ប្រធានសមាគមការពារសិទ្ធិមនុស្សអាដហុក លោក នី សុខា បានលើកឡើងថា ការរកឃើញគ្រាប់បែកនេះនៅកណ្ដាលទីក្រុងភ្នំពេញ និងជិតរដ្ឋសភានេះ អាចបង្កជាហានិភ័យសម្រាប់សង្គម។ ករណីនេះ លោកស្នើឱ្យសមត្ថកិច្ចធ្វើការស៊ើបអង្កេតឱ្យបានម៉ត់ចត់ មុនសម្រេចផ្ដន្ទាទោសទៅលើជនប្រព្រឹត្ត។
លោកថា៖ «ថាតើពួកគេពិតជាបានប្រព្រឹត្តនូវអំពើដែលបង្កដាក់គ្រាប់បែកបំផ្ទុះមែនឬក៏អត់? យើងគ្រាន់តែស្នើឱ្យសមត្ថកិច្ចបង្ហាញពីភស្តុងតាង មុននឹងផ្ដន្ទាទោសឱ្យបានត្រឹមត្រូវ»។
គួរបញ្ជាក់ថា ក្រោយការប្រទះឃើញគ្រាប់បែកដៃនេះ សមត្ថកិច្ច និងមន្ត្រីជំនាញស៊ីម៉ាក បានធ្វើការត្រួតពិនិត្យ និងបានបំផ្ទុះចោលឬកម្ទេចចោលភ្លាមៗនៅព្រឹកថ្ងៃព្រហស្បតិ៍ម្សិលមិញ ដោយមិនបង្កឱ្យនរណាម្នាក់រងគ្រោះថ្នាក់នោះទេ៕