មហាសន្និបាតអង្គការសហប្រជាជាតិ បានអនុម័តលើសេចក្តីសម្រេចមួយ ដោយជំរុញឱ្យកូរ៉េខាងជើងដោះលែងជាបន្ទាន់ នូវជនបរទេសទាំងអស់ដែលខ្លួនបានចាប់ពង្រត់។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន NHK នៅថ្ងៃទី១៦ ខែធ្នូ ឆ្នាំ២០២២នេះ។
មហាសន្និបាតបានអនុម័តលើសេចក្តីសម្រេចនេះ នៅថ្ងៃព្រហស្បតិ៍ មិ្សលមិញ។ ជារៀងរាល់ឆ្នាំ សហភាពអឺរ៉ុបដាក់ជូនសេចក្តីសម្រេចនេះទៅកាន់មហាសន្និបាតអង្គការសហប្រជាជាតិ។ ប្រទេសជាង៦០ រួមទាំងប្រទេសជប៉ុន និងកូរ៉េខាងត្បូង បានគាំទ្រសេចក្តីសម្រេចនេះ។
សេចក្តីសម្រេចនេះនិយាយថា អង្គការសហប្រជាជាតិ ថ្កោលទោសយ៉ាងខ្លាំងក្លាបំផុតចំពោះការរំលោភសិទ្ធិមនុស្សជាប្រព័ន្ធ និងយូរអង្វែងរបស់កូរ៉េខាងជើង។
អង្គការសហប្រជាជាតិ ក៏បង្ហាញពីការព្រួយបារម្ភយ៉ាងខ្លាំងចំពោះទុក្ខវេទនាយ៉ាងធ្ងន់ធ្ងរដែលកើតឡើងចំពោះអ្នកដែលត្រូវបានចាប់ពង្រត់ ផ្ទុយពីឆន្ទៈរបស់ខ្លួន និងក្រុមគ្រួសាររបស់ពួកគេ។
សេចក្តីសម្រេចនេះក៏រិះគន់កូរ៉េខាងជើងចំពោះការប្រើប្រាស់ធនធានជាតិសម្រាប់ការអភិវឌ្ឍមីស៊ីល ដែលមិនមែនធ្វើឡើងសម្រាប់សុខុមាលភាពរបស់ប្រជាជនខ្លួន។
ពាក់ព័ន្ធនឹងសេចក្តីសម្រេចនេះ ចិន និងរុស្ស៊ី បាននិយាយថា ខ្លួនមិនគាំទ្រសេចក្តីសម្រេចនេះទេ ខណៈឯកអគ្គរដ្ឋទូតកូរ៉េខាងជើង ប្រចាំអង្គការសហប្រជាជាតិ លោក គីម សុង (Kim Song) បាននិយាយថា វាជាការបង្កហេតុដែលមានហេតុផលនយោបាយ ហើយកូរ៉េខាងជើងបដិសេធសេចក្តីសម្រេចនេះ។ លោកបានដើរចេញពីមហាសន្និបាត នៅពាក់កណ្តាលកិច្ចប្រជុំ៕
