ស្រ្តីជាជនរងគ្រោះ និងជាម្តាយទារក ក្នុងករណីគ្រោះថ្នាក់ចរាចរណ៍ ស្នើតុលាការពន្លឿននីតិវិធីក្នុងការស្វែងរកយុត្តិធម៌ និងចាត់វិធានការទៅលើជនបង្ក ក្រោយកូនរបស់ខ្លួនបានទទួលមរណភាព។
កាលពីថ្ងៃទី៥ ខែធ្នូ មានករណីគ្រោះថ្នាក់ចរាចរណ៍មួយបង្កឡើងដោយរថយន្ដបុកម៉ូតូមួយគ្រឿងនៅលើស្ពានជ្រោយចង្វារ បណ្ដាលឱ្យមនុស្ស ៣នាក់ រងរបួសធ្ងន់ ក្នុងនោះក៏មានទារកអាយុ២ខែម្នាក់ផងដែរ។
ក្រោយហេតុការណ៍នេះក៏មានឯកសារចែកចាយលើបណ្ដាញសង្គមបញ្ជាក់ថា ជនរងគ្រោះបានផ្ដិតមេដៃទទួលយកសំណង២ ៥០០ដុល្លារ និងដកពាក្យបណ្ដឹងដើម្បីបញ្ចប់រឿងនោះ។ ប៉ុន្តែស្ត្រីជាជនរងគ្រោះបញ្ជាក់ម្តងហើយម្តងទៀតថា គាត់ពិតជាមិនបានផ្តិតមេដៃទទួលយក «សំណង២ ៥០០ដុល្លារដើម្បីបញ្ចប់រឿង» ដូចការផ្សាយរបស់ស្នងការដ្ឋាននគរបាលរាជធានីភ្នំពេញកាលពីថ្ងៃទី៦ ខែធ្នូ ឡើយ។
អ្នកស្រី មុច ស្រីល័ក្ខ មានមុខរបរជាអ្នករើសអេតចាយ ដែលជាជនរងគ្រោះក្នុងករណីគ្រោះថ្នាក់ចរាចរណ៍កាលពីថ្ងៃទី៥ ខែធ្នូ បានឱ្យដឹងនៅថ្ងៃសុក្រនេះថា កូនរបស់អ្នកស្រីបានបាត់បង់ជីវិតជិតមួយសប្ដាហ៍ ខណៈអ្នកស្រីក៏នៅមិនទាន់ជារបួស និងត្រូវការទៅពេទ្យជាប្រចាំទៀតផង។
ស្រ្តីរូបនេះបន្តថា អ្នកស្រី និងមេធាវី បានដាក់ពាក្យបណ្ដឹងទៅកាន់សាលាដំបូងរាជធានីភ្នំពេញ រយៈពេល៦ថ្ងៃមកហើយ ដើម្បីទាមទាររកយុត្តិធម៌តាមផ្លូវច្បាប់ និងទាមទារឱ្យមានចំណាត់ការទៅលើជនបង្ក ប៉ុន្តែរហូតមកដល់ថ្ងៃនេះ អ្នកស្រីនៅមិនទាន់ឃើញតុលាការមានចំណាត់ការយ៉ាងណានៅឡើយ។
អ្នកស្រីថា៖ «ចង់បានលុយសំណងលើសពីហ្នឹងផង ចង់ឱ្យគាត់ហ្នឹង[ត្រូវបានផ្តន្ទាទោស]ទៅតាមផ្លូវច្បាប់ កុំឱ្យថ្ងៃក្រោយទៅ គាត់បង្កទៅជាអ៊ីចឹងទៀត! និងសំណាងដែលខ្ញុំនិងបងម្នាក់ហ្នឹងនៅមានជីវិត បើសិនជាបាត់បង់ជីវិតទាំង៣នាក់ទៅ អាណោចអាធ័មប៉ុនណា»។
អ្នកនាំពាក្យអយ្យការអមសាលាដំបូងរាជធានីភ្នំពេញ លោក ប្លង់ សុផល បានឆ្លើយតបយ៉ាងខ្លីថា ខាងតំណាងអយ្យការកំពុងធ្វើការស៊ើបអង្កេតលើសំណុំរឿងនេះ និងមិនទាន់អាចឆ្លើយថាពេលណានឹងបញ្ចប់ការស៊ើបអង្កេតនោះនៅឡើយដែរ។
លោកថា៖ «លទ្ធផលនៃការស៊ើបអង្កេត គឺជាការសម្ងាត់! ហើយអ្នកដែលចូលរួមក្នុងការស៊ើបអង្កេតនេះមានកាតព្វកិច្ចតាមច្បាប់ ក្នុងការរក្សាការសម្ងាត់នៃវិជ្ជាជីវៈនេះ»។
វីអូឌី មិនទាន់អាចសុំការអត្ថាធិប្បាយពីលោក គី តិច ប្រធានក្រុមមេធាវីស្ម័គ្រចិត្តរបស់លោកនាយករដ្ឋមន្ត្រី ហ៊ុន សែន ដែលជាមេធាវីតំណាងឱ្យអ្នកស្រី មុច ស្រីល័ក្ខ បានទេ នៅថ្ងៃសុក្រនេះ។
ប៉ុន្តែមេធាវីរូបនេះធ្លាប់បានលើកឡើងថា ក្រុមមេធាវីកំពុងការពារតាមផ្លូវច្បាប់ដល់គ្រួសារជនរងគ្រោះ និងកំពុងស្នើសុំឱ្យអយ្យការអមសាលាដំបូងរាជធានីភ្នំពេញ ស្រាវជ្រាវ កំណត់បទល្មើស ចោទប្រកាន់ទៅតាមអំពើដែលជនបង្កបានប្រព្រឹត្ត និងកំពុងស្នើឱ្យជនបង្កចូលខ្លួនមកទទួលខុសត្រូវចំពោះមុខច្បាប់ផងដែរ។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា ជាទូទៅ មន្រ្តីជំនាញ គឺមានសមត្ថកិច្ចបើកការស៊ើបអង្កេតលើបណ្ដឹងអាជ្ញា ជុំវិញករណីគ្រោះថ្នាក់ចរាចរណ៍ដែលធ្វើឱ្យមនុស្សស្លាប់និងរងបួសនេះ ហើយក្នុងនាមលោកជាសង្គមស៊ីវិល ទទូចឱ្យមានការស្វែងរកយុត្តិធម៌ តាមរយៈការពន្លឿននីតិវិធីស៊ើបអង្កេតផងដែរ។
លោកថា៖ «យើងជាអង្គការសង្គមស៊ីវិល យើងចង់ និងទទូចឱ្យតុលាការហ្នឹងដំណើរការនីតិវិធីហ្នឹងឱ្យបានឆាប់រហ័ស»។
តាមមាត្រា៨៥ នៃច្បាប់ចរាចរណ៍ផ្លូវគោក ចែងថា ជនណាដែលបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាពត្វកិច្ចដែលបទប្បញ្ញត្តិស្តីពីចរាចរណ៍ផ្លូវគោកតម្រូវ បណ្ដាលឱ្យស្លាប់អ្នកដទៃ ត្រូវផ្តន្ទាទោសដាក់ពន្ធនាគារពី១ឆ្នាំ ទៅ៣ ឆ្នាំ ពិន័យជាប្រាក់ពី៤ ០០០ ០០០ (បួនលាន) រៀល ទៅ ១៥ ០០០ ០០០ (ដប់ប្រាំលាន) រៀល និងអាចត្រូវផ្តន្ទាទោស ដោយទោសបន្ថែមមួយឬច្រើន ដូចមានចែងក្នុងមាត្រា៥៣ (ប្រភេទទោសបន្ថែម) នៃក្រមព្រហ្មទណ្ឌ។
នៅក្នុងមាត្រា៨៥ដដែលក៏បានចែងថា ក្នុងអំពើល្មើសនេះ ត្រូវផ្តន្ទាទោសដាក់ពន្ធនាគារ ពី ២ឆ្នាំ ទៅ ៥ឆ្នាំ និងពិន័យជាប្រាក់ពី ១០លាន ទៅ ២៥លានរៀល បើអ្នកបើកបរស្ថិតក្នុងស្ថានភាពស្រវឹង បណ្ដាលឱ្យមនុស្សស្លាប់ ការរត់គេចពីកន្លែងកើតហេតុដើម្បីគេចពីការទទួលខុសត្រូវ ជាដើម៕