ប្រជាសហគមន៍អះអាងថា ទាហាននៃបញ្ជាការដ្ឋានរថក្រោះកងទ័ពជើងគោក បានដាក់គ្រឿងចក្រទៅភ្ជួរលើដីសហគមន៍ «ឧត្ដមស្រែពស់ និងព្រៃមេត្តាធម្មជាតិ» ស្ថិតនៅឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ជាថ្មីទៀត បើទោះជាអាជ្ញាធរបានកាត់ឆ្វៀលដីនោះឱ្យទៅប្រជាសហគមន៍គ្រប់គ្រង និងអាស្រ័យផលរួចទៅហើយក៏ដោយ។
កាលពីថ្ងៃទី២០ ខែសីហា ឆ្នាំ២០២១ រដ្ឋាភិបាលបានចេញអនុក្រឹត្យមួយកាត់ដីទំហំជាង ២៦០ហិកតា (២៦២,២៤ហិកតា) ពីដែនជម្រកសត្វព្រៃភ្នំឱរ៉ាល់ ស្ថិតនៅភូមិសាស្ត្រភូមិពោធិ៍មាស ឃុំត្រពាំងជោរ ដើម្បីបែងចែកទៅឱ្យគ្រួសារកងទ័ពនៃបញ្ជាការដ្ឋានរថក្រោះកងទ័ពជើងគោក និងពលរដ្ឋចំនួន៤១គ្រួសារ សម្រាប់ធ្វើលំនៅឋាន និងបង្កបង្កើនផល។
ក្រោយមានអនុក្រឹត្យនេះ ក្រុមទាហានបានដាក់គ្រឿងចក្រធ្វើសកម្មភាពឈូសឆាយដីព្រៃនៅតំបន់ភូមិសាស្ត្រភូមិពោធិ៍មាស ប៉ុន្តែត្រូវបានពលរដ្ឋរាប់រយនាក់តវ៉ាប្រឆាំង ដោយថា ការឈូសឆាយនោះបានប៉ះពាល់ដល់ដីព្រៃ «ឧត្ដមស្រែពស់ និងព្រៃមេត្តាធម្មជាតិ» អស់រាប់រយហិកតា ហើយក្រុមទាហានបានផ្អាកសកម្មភាពវិញ បន្ទាប់ពីអភិបាលខេត្តកំពង់ស្ពឺ លោក វ៉ី សំណាង ចុះទៅសម្របសម្រួលដោះស្រាយ និងកាត់ឆ្វៀលដីទំហំ ៨៨៧ហិកតា ឱ្យប្រជាសហគមន៍ការពារ និងអាស្រ័យផល។
សមាជិកសហគមន៍ឧត្ដមស្រែពស់ និងព្រៃមេត្តាធម្មជាតិ លោក ខន សារិទ្ធ បានឱ្យដឹងថា បើទោះជាអាជ្ញាធរបានប្រគល់ដីនោះមកឱ្យសហគមន៍គ្រប់គ្រងនិងការពារ ប៉ុន្តែក្រុមទាហានទាំងនោះនៅតែបន្តដាក់គ្រឿងចក្រធ្វើសកម្មភាពឈូសឆាយព្រៃ និងកាយក្រវាត់ព្រំដីសហគមន៍ជាបន្តបន្ទាប់ ហើយនៅថ្ងៃចន្ទម្សិលមិញនេះ ក្រុមទាហានបានបន្តដាក់ត្រាក់ទ័រចំនួន ២គ្រឿងទៀត ទៅភ្ជួរលើដីដែលរដ្ឋាភិបាលបានកំណត់ថាជាដីរបស់សហគមន៍ អស់ប្រមាណ ២ហិកតា។
លោកបន្តថា អំឡុងពេលដែលត្រាក់ទ័រកំពុងភ្ជួរដីនោះ សហគមន៍បានទៅឃាត់សកម្មភាពនោះជាច្រើនដងដែរ ប៉ុន្តែអ្នកបើកត្រាក់ទ័រនោះមិនបានឈប់នោះទេ ដោយពួកគេថា ការភ្ជួរដីនោះធ្វើទៅតាមបញ្ជារបស់ក្រុមទាហាន។
លោកថា៖ «កាលមុនមួយសាហើយ គេកាយព្រំ ប្រជាពលរដ្ឋទៅហាមឃាត់ គេផ្អាក! ឥលូវគេមកភ្ជួរសាថ្មី អាហ្នឹងមិនមែនឈូសទេ គេភ្ជួរដីដែលឈូស ហើយនឹងដុតចោលទៅ គេចាប់ផ្ដើមភ្ជួរ»។
លោកបន្តថា៖ «មិនគួរណាភ្ជួរទេ ព្រោះមានខាងក្រសួងមហាផ្ទៃ គាត់ចេញ សជណ ឱ្យចុះដោះស្រាយ ចុះសិក្សាស្រាវជ្រាវអ៊ីចឹង ហើយអត់ទាន់មានដំណោះស្រាយស្រួលបួលផង គាត់[ទាហាន]មិនគួរណាគាត់មកភ្ជួរ មកឈូសឆាយបន្តអ៊ីចឹងទេ»។
សមាជិកសហគមន៍ម្នាក់ទៀត លោក ឡោក សុខលី បានបង្ហាញការព្រួយបារម្ភនូវការដែលក្រុមទាហាននៅតែបន្តរំលោភលើដីសហគមន៍នេះ។ ទោះជាយ៉ាងណា លោកថា សហគមន៍នៅបន្តការពារព្រៃឈើដែលនៅសល់ប្រមាណតែ ៣០ហិកតា ក្នុងចំណោមដីជាង៨០០ហិកតា ដែលអាជ្ញាធរខេត្តកាត់ឆ្វៀលឱ្យប្រជាសហគមន៍ការពារនោះ ដើម្បីជាជម្រកសម្រាប់សត្វព្រៃ។
លោកថា៖ «សហគមន៍យើងទាំងអស់គ្នានៅតែធ្វើការទាមទារតវ៉ា ដើម្បីរកដំណោះស្រាយសមស្រប ព្រោះចង់រក្សាដីព្រៃទុកដាំដើមឈើឡើងវិញ រក្សាឱ្យសត្វចូលមកជ្រកនៅព្រៃសហគមន៍យើងវិញ»។
ទាហានម្នាក់ដែលសុំមិនបញ្ចេញឈ្មោះ តែត្រូវពលរដ្ឋអះអាងថាឈ្មោះ ធី និងជាទាហានដឹកនាំសកម្មភាពឈូសឆាយដីរំលោភដីសហគមន៍ឧត្តមស្រែពស់ បានប្រាប់វីអូឌីនៅថ្ងៃអង្គារថា លោកមិនបានភ្ជួរដីសហគមន៍នោះទេ។
លោកថា៖ «សួរក្រសួងបរិស្ថាន គេកាត់ឆ្វៀលដីសហគមន៍ប៉ុន្មាន ដីអនុក្រឹត្យប៉ុន្មាន គេធ្វើរួចអស់ហើយជាមួយខេត្ត! សួរប៉ុណ្ណេះទៅដឹងហើយ! ព្រោះបងគ្រប់គ្រងតែ ស.ជ.ណ ដីអនុក្រឹត្យដែលរដ្ឋាភិបាលចេញឱ្យដាំដុះប៉ុណ្ណោះ។ បើដីសហគមន៍ បងអត់មានប៉ះពាល់ទេ»។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត សង្កេតឃើញថា អាជ្ញាធរ និងមន្ត្រីពាក់ព័ន្ធពុំទាន់ជួយគាំទ្រដល់សហគមន៍ដែលមានបំណងការពារព្រៃឈើពេញលេញនៅឡើយទេ ហើយការមិនបានគាំទ្រពេញលេញនេះ ជាហេតុធ្វើឱ្យព្រៃរបស់សហគមន៍មួយចំនួនបានបាត់បង់។ លោកជំរុញឱ្យអាជ្ញាធរពន្លឿននីតិវិធីក្នុងការដោះស្រាយបញ្ចប់បញ្ហាវិវាទនេះ និងកំណត់ព្រំដីឱ្យបានច្បាស់លាស់ ដើម្បីចៀសវាងកើតមានបញ្ហាបែបនេះបន្តទៀត។
លោកថា៖ «កន្លងមកនេះ យើងសង្កេតឃើញថា បើមានបញ្ហាអ៊ីចឹងៗ ភាគច្រើនអត់មានដំណោះស្រាយដល់ប្រជាពលរដ្ឋ អ៊ីចឹងជារឿងមួយដែលយើងព្រួយបារម្ភថានឹងបាត់បង់ព្រៃឈើ និងធនធានធម្មជាតិ»។
វីអូឌី មិនអាចសុំការអត្ថាធិប្បាយជុំវិញករណីនេះពីអភិបាលខេត្តកំពង់ស្ពឺ លោក វ៉ី សំណាង បាននៅឡើយទេ។
កាលពីថ្ងៃទី២៩ ខែវិច្ឆិកា ឆ្នាំ២០២២នេះ អភិបាលខេត្តកំពង់ស្ពឺ លោក វ៉ី សំណាង ធ្លាប់បានគូសបញ្ជាក់ថា អាជ្ញាធរថ្នាក់ខេត្ត កំពុងស្វែងរកដំណោះស្រាយលើបញ្ហានេះ ហើយភាពយឺតយ៉ាវក្នុងការដោះស្រាយបញ្ចប់វិវាទដីធ្លីនេះ ដោយសាររដ្ឋបាលខេត្តកំពុងខ្វះថវិកា ឬខ្វះបង្គោលរបងសម្រាប់បោះកំណត់ព្រំ រវាងដីសហគមន៍ និងដីទាហាន។ យ៉ាងណា លោកថា លោកនឹងខិតខំដោះស្រាយបញ្ចប់ករណីនេះឱ្យបានឆាប់។
លោក វ៉ី សំណាង ក៏បានអំពាវនាវដល់សប្បុរសជន ឬអ្នកស្រឡាញ់ធនធានធម្មជាតិ ជួយជាថវិកា ឬបង្គោលព្រំដល់ប្រជាសហគមន៍ សម្រាប់បោះការពារដីព្រៃសហគមន៍ឧត្តមស្រែពស់ និងព្រៃមេត្តាធម្មជាតិ ដើម្បីឈានទៅរកការបញ្ចប់ជម្លោះដីធ្លីនេះឱ្យបានឆាប់៕
