សត្វផ្សោតអ៊ីរ៉ាវ៉ាឌី (Irrawaddy) មួយក្បាល ត្រូវបានប្រទះឃើញងាប់នៅក្នុងទន្លេមេគង្គ នៅចុងសប្ដាហ៍នេះ ដែលបង្ហាញពីការកើនឡើងគួរឱ្យព្រួយបារម្ភនៃការបាត់បង់ប្រភេទសត្វផ្សោតជិតផុតពូជ។
អង្គការមូលនិធិសត្វព្រៃពិភពលោក (WWF) បានបង្ហោះនៅលើទំព័រហ្វេសប៊ុករបស់ខ្លួនថា សត្វផ្សោតនេះត្រូវបានប្រទះឃើញងាប់កាលពីថ្ងៃអាទិត្យ ដែលមានអាយុចន្លោះពី ១៥-២០ឆ្នាំ និងមានទម្ងន់ ១៦២គីឡូក្រាម។ សត្វផ្សោតដែលងាប់នេះ ត្រូវបានប្រទះឃើញនៅក្បែរអន្លង់មួយជាប់ព្រំប្រទល់រវាងខេត្តស្ទឹងត្រែង និងខេត្តក្រចេះ។
យោងតាមក្រុមអភិរក្ស សត្វផ្សោតនេះទំនងជាងាប់បន្ទាប់ពីជាប់នៅក្នុងមងនេសាទ ដោយឃើញមានស្នាមក្រឡាមងពេញខ្លួន។ អង្គការ WWF បានលើកឡើងនៅក្នុងសារបង្ហោះលើទំព័រហ្វេសប៊ុករបស់ខ្លួនថា នៅឆ្នាំនេះ មានសត្វផ្សោតងាប់ចំនួន៩ក្បាល និង ២៧ក្បាលក្នុងរយៈពេល៣ឆ្នាំចុងក្រោយនេះ។
នាយកប្រចាំប្រទេសនៃអង្គការ WWF លោក សេង ទៀក មានប្រសាសន៍ថា៖ «ព័ត៌មានអំពីការរកឃើញសត្វផ្សោតងាប់នីមួយៗ ពិតជាធ្វើឱ្យមានភាពសោកសង្រេងខ្លាំងណាស់ ហើយយើងសោកស្តាយខ្លាំងបំផុតគឺនៅពេលសត្វផ្សោតពេញវ័យ ដែលមានសុខភាពល្អ ដូចសត្វផ្សោតមួយក្បាលនាពេលនេះបានបាត់បង់ជីវិត ព្រោះវាប៉ះពាល់ធ្ងន់ធ្ងរដល់លទ្ធភាពនៃការបន្តពូជរបស់សត្វផ្សោតទន្លេមេគង្គដែលមានចំនួនសេសសល់តិចតួចស្រាប់»។
លោក ទេព អស្នារិទ្ធ ប្រធានផ្នែកកិច្ចការសាធារណៈរបស់អង្គការ WWF មានប្រសាសន៍ថា ជារឿយៗ មងនេសាទ ពាក់ព័ន្ធនឹងការងាប់របស់សត្វផ្សោត។ លោកបន្ថែមថា មងនេសាទប្រវែង ១៧៤ ០០០ម៉ែត្រ ត្រូវបានរឹបអូសក្នុងរយៈពេល៣ឆ្នាំចុងក្រោយនេះ និងមានការឆក់ត្រីចំនួន ១០៥ករណី នៅក្នុងអន្លង់ដែលមានសត្វផ្សោតរស់នៅ។
លោកបានបន្ថែមថា ក្នុងរយៈពេលប៉ុន្មានឆ្នាំចុងក្រោយនេះ មានសត្វផ្សោតជាច្រើនក្បាលបានងាប់ ដែលករណីនេះជារឿងគួរឱ្យព្រួយបារម្ភ។
លោក អ៊ុក វិបុល ប្រធាននាយកដ្ឋានអភិរក្សជលផល នៃក្រសួងកសិកម្ម រុក្ខាប្រមាញ់ និងនេសាទ បានថ្លែងថា ជាធម្មតា ក្នុងមួយឆ្នាំ សត្វផ្សោតចន្លោះពី ៤ ទៅ ៨ក្បាលងាប់។ លោកបន្តថា បច្ចុប្បន្ននេះ មានសត្វផ្សោតពេញវ័យចំនួន ៨៩ក្បាល ហើយសត្វផ្សោតដែលមានសក្តានុពល គឺមានរហូតដល់ ១០០ក្បាល ប្រសិនបើរាប់ទាំងកូន។
លោក អ៊ុក វិបុល បន្ថែមថា ជាធម្មតា សត្វផ្សោតងាប់ដោយសារមានអាយុច្រើន ប៉ុន្តែបច្ចុប្បន្ននេះ មានសត្វផ្សោតពេញវ័យកាន់តែច្រើនឡើងងាប់បន្ទាប់ពីជាប់មងនេសាទ ឬដោយសារការនេសាទខុសច្បាប់នៅពេលយប់។
លោកមានប្រសាសន៍ថា៖ «សត្វផ្សោតងាប់ជារៀងរាល់ឆ្នាំ ប៉ុន្តែក្នុងរយៈពេល៣ឆ្នាំចុងក្រោយនេះ សត្វផ្សោតពេញវ័យកាន់តែច្រើនបានងាប់ ដែលគួរឱ្យបារម្ភ»។
លោកបន្ថែមថា សត្វផ្សោតតិចតួចប៉ុណ្ណោះដែលមានអាយុច្រើន។
យោងតាមអង្គការ WWF សត្វផ្សោតទន្លេមេគង្គ Irrawaddy ត្រូវបានប្រទះឃើញចាប់ភាគខាងជើងខេត្តក្រចេះ រហូតដល់ព្រំដែនប្រទេសឡាវ ហើយស្ថិតក្នុងបញ្ជីក្រហមរបស់អង្គការសហភាពអន្តរជាតិដើម្បីការអភិរក្សធម្មជាតិ (IUCN)៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Another Dead Mekong Dolphin Puts Pressure on Population
កែតម្រូវ៖ «[…] មងនេសាទប្រវែង ១៧ ០០០ម៉ែត្រ […]។» ទៅជា «[…] មងនេសាទប្រវែង ១៧៤ ០០០ម៉ែត្រ […]។»
