មន្ត្រីអង្គការសុខភាពពិភពលោក (WHO) មួយរូប បានឱ្យដឹងនៅថ្ងៃអង្គារម្សិលមិញថា មនុស្ស ១០លាននាក់ ឬប្រមាណជាមួយភាគបួននៃចំនួនប្រជាជនអ៊ុយក្រែន អាចទទួលរងនូវជំងឺផ្លូវចិត្ត ដោយសារតែសង្គ្រាមនៅក្នុងប្រទេសដែលអូសបន្លាយអស់រយៈពេល១០ខែមកនេះ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងប្រាប់សន្និសីទសារព័ត៌មានមួយនៅទីក្រុងហ្សឺណែវ តាមរយៈប្រព័ន្ធវីដេអូ តំណាងអង្គការសុខភាពពិភពលោកនៅក្នុងប្រទេសអ៊ុយក្រែន លោក Jarno Habicht បានលើកឡើងថា៖ «អង្គការសុខភាពពិភពលោក បានប៉ាន់ប្រមាណថា មនុស្ស [ពលរដ្ឋអ៊ុយក្រែន] រហូតដល់ ១០លាននាក់ ស្ថិតនៅក្នុងហានិភ័យនៃទម្រង់នៃជំងឺផ្លូវចិត្តផ្សេងៗគ្នា ដោយរាប់ចាប់ពីការថប់បារម្ភ ភាពតានតឹង រហូតដល់ស្ថានភាពធ្ងន់ធ្ងរជាងនេះ»។
ប្រភពដដែលនេះបន្តថា ការកើនឡើងនៃករណីទាំងនេះ បន្ទាប់ពីសង្គ្រាមបានអូសបន្លាយអស់រយៈពេល១០ខែ ដែលជំរុញឱ្យទីភ្នាក់ងារអង្គការសហប្រជាជាតិដាច់ដោយឡែកមួយ បើកឱ្យមានសេវាកម្មគាំទ្រនានាតាមប្រព័ន្ធអនឡាញផងដែរ។
គួរបញ្ជាក់ថា ប្រព័ន្ធថែទាំសុខភាពរបស់ប្រទេសអ៊ុយក្រែន បានស្ថិតនៅក្រោមវិបត្តិ គិតចាប់តាំងពីរុស្ស៊ីបានបើកការឈ្លានពានក្នុងខែកុម្ភៈ។
គិតមកដល់ពេលបច្ចុប្បន្ននេះ ប្រព័ន្ធថែទាំសុខភាពរបស់អ៊ុយក្រែនមានការវាយប្រហារយ៉ាងហោចណាស់៧០០លើក ខណៈការវាយប្រហាររបស់រុស្ស៊ីលើហេដ្ឋារចនាសម្ពន្ធសំខាន់ៗក៏មានការកើនឡើងផងដែរ ដោយបានបណ្ដាលឱ្យទីតាំងមួយប្រឈមនឹងបញ្ហាដាច់ចរន្តអគ្គិសនីប្រើប្រាស់។
ទោះជាយ៉ាងណា វិមានក្រឹមឡាំង ធ្លាប់បានលើកឡើងកាលពីពេលកន្លងទៅថា ការវាយប្រហាររបស់ខ្លួនលើហេដ្ឋារចនាសម្ពន្ធរបស់អ៊ុយក្រែន គឺមិនមែនសំដៅទៅលើជនស៊ីវិលនោះទេ ដោយបន្ថែមថា អ៊ុយក្រែនអាចបញ្ចប់ទុក្ខវេទនារបស់ប្រជាជនខ្លួនបាន តាមរយៈការបំពេញតាមការទាមទាររបស់រុស្ស៊ីក្នុងការដោះស្រាយជម្លោះ៕
