គណៈកម្មការទន្លេមេគង្គ បានឱ្យដឹងថា សំណល់ប្លាស្ទិកនៅតាមបណ្ដាប្រទេសទន្លេមេគង្គបានកើនឡើងចំនួន ៨លានតោនក្នុងមួយឆ្នាំ ដែល៣ភាគ៤នៃសំណល់ទាំងនោះត្រូវបានទុកចោល ឬទុកដាក់មិនបានត្រឹមត្រូវ ដែលបង្កដល់ការបំពុលដល់ទន្លេមេគង្គ និងបង្កគ្រោះថ្នាក់ដល់បរិស្ថាន និងសុខភាពមនុស្ស។
គណៈកម្មការនេះ កាលពីថ្ងៃពុធ បានចេញរបាយការណ៍ស្តីពីការបំពុលដោយប្លាស្ទិកនៅតាមទន្លេមេគង្គ ដោយផ្អែកលើការអង្កេតតាមដានក្នុងប្រទេសថៃ ឡាវ កម្ពុជា និងវៀតណាម។ ដោយលើកឡើងពីការត្រួតពិនិត្យ និងការសិក្សាពីលើកមុនរបស់ខ្លួន របាយការណ៍បានគូសបញ្ជាក់ថា សំណល់ប្លាស្ទិកចំនួន ១០០តោន ហូរនៅតាមដងទន្លេមេគង្គ ជារៀងរាល់ថ្ងៃ។
របាំងនៅតាមដងទន្លេមានជាប់ទៅដោយថង់ ដប និងសំរាមផ្សេងៗ ហើយមានគំនរសំរាមជាច្រើននៅតាមដងទន្លេ។ របាយការណ៍បន្តថា បណ្តាប្រទេសនៅតាមដងមេគង្គទាំង៤ រួមមាន ថៃ ឡាវ កម្ពុជា និងវៀតណាម មានសំណល់ប្លាស្ទិកប្រមាណ ៨លានតោន ក្នុងឆ្នាំ២០២០ និងមាន «សំណល់ដែលគ្រប់គ្រងមិនបានត្រឹមត្រូវ» យ៉ាងហោចណាស់ ៧៥%។
គណៈកម្មការទន្លេមេគង្គ បានលើកឡើងនៅក្នុងសេចក្តីថ្លែងការណ៍មួយថា៖ «គណៈកម្មការទន្លេមេគង្គ កំពុងព្រមានអំពីបញ្ហាប្រឈមនៃសំណល់ប្លាស្ទិក ដោយជំរុញឱ្យប្រទេសសមាជិកទាំង៤ បង្កើតយន្តការរួមនិងអចិន្ត្រៃយ៍ក្នុងការត្រួតពិនិត្យ និងសម្អាតជាតិពុលដែលជ្រាបចូលទៅក្នុងដី ខ្យល់ និងជលផល»។
ទោះយ៉ាងណា ការសិក្សារបស់គណៈកម្មការទន្លេមេគង្គ ជាការសិក្សាបឋមប៉ុណ្ណោះ ដោយសារតែខ្វះវិធីសាស្ត្រស្ទង់មតិស្តង់ដារ ហើយចាំបាច់ត្រូវមានការត្រួតពិនិត្យតាមបែបវិទ្យាសាស្ត្រជាទៀងទាត់ អំពីសំណល់ប្លាស្ទិកតាមដងទន្លេ។
នាយកប្រតិបត្តិគណៈកម្មការទន្លេមេគង្គ លោក អានុឡាក់ គិធិឃួន (Anoulak Kittikhoun) មានប្រសាសន៍ថា៖ «ការងាររបស់យើងមិនបញ្ចប់ត្រឹមនេះទេ។ មានការងារច្រើនទៀតដែលត្រូវធ្វើ ដើម្បីការពារអាងទន្លេមេគង្គ។ យើងនឹងពិនិត្យមើលយុទ្ធនាការបន្ថែមទៀត ដើម្បីលើកកម្ពស់ការយល់ដឹងជាសាធារណៈ និងរបៀបលើកទឹកចិត្តមន្ត្រីរដ្ឋាភិបាលពាក់ព័ន្ធឱ្យចាត់វិធានការសមស្រប»។
ការស្រាវជ្រាវដែលបានចេញផ្សាយនៅឆ្នាំ២០២១ បានបង្ហាញថា ជារៀងរាល់ថ្ងៃ ប្លាស្ទិករាប់រយតោនហូរពីរាជធានីភ្នំពេញតាមដងទន្លេមេគង្គ ទន្លេបាសាក់ និងទន្លេសាប ដែលបំពុលទឹក និងសុខុមាលភាពរបស់មនុស្ស។
ការស្រាវជ្រាវបានរកឃើញថា ប្លាស្ទិកចំនួន ២០៣តោន ហូរចេញតាមដងទន្លេពីរាជធានីភ្នំពេញ ជារៀងរាល់ថ្ងៃ ស្មើនឹង ៤២ភាគរយនៃសំណល់ប្លាស្ទិកទាំងអស់ដែលមាននៅរាជធានីភ្នំពេញ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Mekong River Body Raises ‘Alarm’ Over River Plastics