ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានថ្លែងប្រាប់សភាអាមេរិក នៅថ្ងៃពុធម្សិលមិញនេះថា ជំនួយក្នុងទំហំទឹកប្រាក់រាប់សិបពាន់លានដុល្លារ ដែលពួកគេបានអនុម័តដើម្បីជួយក្នុងការប្រយុទ្ធប្រឆាំងនឹងការឈ្លានពានរបស់រុស្ស៊ី មិនមែនត្រឹមតែជាកិច្ចការសប្បុរសធម៌ប៉ុណ្ណោះទេ ប៉ុន្តែវាក៏ជាការវិនិយោគលើសន្តិសុខពិភពលោកផងដែរ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
នៅក្នុងដំណើរចាកចេញទៅក្រៅប្រទេសជាលើកដំបូងរបស់ខ្លួន គិតចាប់តាំងពីរុស្ស៊ីបើកការឈ្លានពានកាលពីខែកុម្ភៈ ប្រធានាធិបតីអ៊ុយក្រែនរូបនេះបានបន្តប្រាប់សមាជិកសភា ដោយសង្ឃឹមថា ពួកគេនឹងបន្តគាំទ្រអ៊ុយក្រែនដោយឈរលើមូលដ្ឋានទ្វេភាគី។
លោក វ៉ូឡូឌីមៀ ហ្សេលេនស្គី បន្ថែមថា៖ «ជំនួយជាថវិការបស់អ្នកមិនមែនដើរតួត្រឹមតែកិច្ចការសប្បុរសធម៌នោះទេ វាគឺជាការវិនិយោគលើសន្តិសុខ និងលទ្ធិប្រជាធិបតេយ្យពិភពលោកផងដែរ»។
ជាមួយគ្នានេះ លោកក៏បានឱ្យដឹងផងដែរថា៖ «វាគឺជាកិត្តិយសដ៏អស្ចារ្យមួយសម្រាប់ខ្ញុំ ក្នុងការមកដល់សភាសហរដ្ឋអាមេរិក ហើយនិយាយទៅកាន់អ្នករាល់គ្នា និងប្រជាជនអាមេរិកទាំងអស់។ បើទោះបីជាស្ថិតក្នុងស្ថានភាពលំបាកយ៉ាងណាក៏ដោយ អ៊ុយក្រែនមិនបានដួលរលំនោះទេ។ អ៊ុយក្រែននៅតែរស់រាន និងអាចដើរទៅមុខបាន»។
គួរបញ្ជាក់ថា កញ្ចប់ជំនួយផ្នែកយោធារបស់អាមេរិក ផ្ដល់ឱ្យអ៊ុយក្រែន គិតរហូតមកដល់ពេលនេះ គឺមានចំនួនប្រមាណជា ២១,២ពាន់លានដុល្លារហើយ គិតចាប់តាំងពីរុស្ស៊ីបានបើកការឈ្លានពានទ្រង់ទ្រាយធំរបស់ខ្លួនមកលើប្រទេសមួយនេះកាលពីខែកុម្ភៈ៕
