រដ្ឋាភិបាលថៃបាននិយាយថា រដ្ឋមន្ត្រីការបរទេសអាស៊ានចំនួន៣រូប និងប្រេសិតប្រចាំតំបន់ [អាស៊ាន] មួយរូបដែលមានភារកិច្ចដោះស្រាយវិបត្តិមីយ៉ាន់ម៉ា បានជួបជាមួយអ្នកការទូតកំពូលរបស់របបយោធាមីយ៉ាន់ម៉ា នៅក្នុងកិច្ចប្រជុំក្រៅផ្លូវការមួយក្នុងប្រទេសថៃ កាលពីថ្ងៃព្រហស្បតិ៍ម្សិលមិញ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន CNA នៅថ្ងៃទី២៣ ខែធ្នូ ឆ្នាំ២០២២នេះ។
កិច្ចប្រជុំនេះធ្វើឡើងភ្លាមៗបន្ទាប់ពីក្រុមប្រឹក្សាសន្តិសុខអង្គការសហប្រជាជាតិ បានអនុម័តលើសេចក្តីសម្រេចលើកដំបូងរបស់ខ្លួន ស្តីពីប្រទេសមីយ៉ាន់ម៉ា ដោយទាមទារឱ្យ «បញ្ចប់ជាបន្ទាន់នូវរាល់ទម្រង់នៃអំពើហិង្សា»។
សមាគមប្រជាជាតិអាស៊ីអាគ្នេយ៍ (អាស៊ាន) បានដឹកនាំកិច្ចខិតខំប្រឹងប្រែងផ្នែកការទូត ដើម្បីដោះស្រាយភាពចលាចលនៅក្នុងប្រទេសមីយ៉ាន់ម៉ា ចាប់តាំងពីយោធាបានដណ្តើមអំណាចកាលពីឆ្នាំមុន។
ទោះយ៉ាងណា មានការរីកចម្រើនតិចតួចចំពោះ «កិច្ចព្រមព្រៀង៥ចំណុច» រវាងអាស៊ាន និងរបបយោធាមីយ៉ាន់ម៉ា ដែលបានព្រមព្រៀងគ្នាកាលពីខែមេសា ឆ្នាំ២០២១ ដែលអំពាវនាវឱ្យបញ្ចប់អំពើហិង្សាជាបន្ទាន់ និងការចរចារវាងយោធា និងចលនាប្រឆាំងរដ្ឋប្រហារ។
អ្នកនាំពាក្យក្រសួងការបរទេសថៃ លោកស្រី កាញ់ចាណា ផាត់ថារ៉ាចូកេ (Kanchana Patarachoke) បាននិយាយថា មានការពិភាក្សា «ប្រកបដោយភាពស្មោះត្រង់ និងស្ថាបនា» រវាងរដ្ឋមន្ត្រីការបរទេសនៃប្រទេសមីយ៉ាន់ម៉ា ថៃ ឡាវ វៀតណាម និងកម្ពុជា ។
លោកស្រីបាននិយាយថា៖ «យើងក៏មានឱកាសដើម្បីស្តាប់ប្រទេសមីយ៉ាន់ម៉ា និងផ្លាស់ប្តូរទស្សនៈលើការស្វែងរកយុទ្ធសាស្ត្រដោះស្រាយវិបត្តិ និងវិធីឆ្ពោះទៅរកការវិលត្រលប់ទៅរកភាពប្រក្រតីនៅក្នុងប្រទេសមីយ៉ាន់ម៉ា»។
លោកស្រីបន្តថា កិច្ចប្រជុំបានផ្តោតលើការសម្របសម្រួលជំនួយមនុស្សធម៌ ក៏ដូចជា «ការស្វែងរកវិធីសាស្រ្តផ្សេងៗដែលអាចជួយដល់ការអនុវត្តកិច្ចព្រមព្រៀង ៥ចំណុច»។
នេះជាលើកដំបូង ក្នុងរយៈពេលជាងមួយឆ្នាំ ដែលរដ្ឋមន្ត្រីការបរទេសរបស់របបយោធាមីយ៉ាន់ម៉ាបានជួបរដ្ឋមន្ត្រីការបរទេសអាស៊ានដោយផ្ទាល់ បន្ទាប់ពីអាស៊ានហាមមិនឱ្យរបបនេះចូលរួមកិច្ចប្រជុំកំពូល ដោយសារការមិនបានឱ្យអនុវត្តតាមកិច្ចព្រមព្រៀង ៥ចំណុច ឱ្យបានពេញលេញ។
ប្រទេសមីយ៉ាន់ម៉ា បានធ្លាក់ចូលក្នុងភាពច្របូកច្របល់ គិតចាប់តាំងពីក្រុមយោធាបានដណ្តើមយកអំណាចមកគ្រប់គ្រងកាលពីខែកុម្ភៈ ឆ្នាំមុន និងបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី ដែលបង្កឱ្យមានជាបាតុកម្មកើតឡើងជាញឹកញាប់នៅក្នុងប្រទេស។
យោងតាមសមាគមជំនួយអ្នកទោសនយោបាយ (AAPP) ជនស៊ីវិលរាប់ពាន់នាក់ក៏ត្រូវបានសម្លាប់ដោយកងកម្លាំងសន្តិសុខមីយ៉ាន់ម៉ា ហើយមនុស្សរាប់ម៉ឺននាក់ផ្សេងទៀតក៏ត្រូវបានចាប់ខ្លួនផងដែរ គិតចាប់តាំងពីរដ្ឋប្រហារថ្ងៃទី១ ខែកុម្ភៈ ឆ្នាំមុន៕
