នាយករដ្ឋមន្រ្តីថៃ លោក ប្រាយុទ្ធ ចាន់អូចា បានថ្លែងប្រាប់ប្រព័ន្ធផ្សព្វផ្សាយក្នុងស្រុក នៅថ្ងៃសុក្រនេះឱ្យដឹងថា រូបលោកនឹងបន្តឈរឈ្មោះសម្រាប់អាណត្តិក្រោយមួយទៀត ក្នុងការបោះឆ្នោតសកលដែលនឹងត្រូវធ្វើឡើងក្នុងខែឧសភា ឆ្នាំក្រោយ។ នេះបើតាមការរាយការណ៍ដោយសារព័ត៌មាន AFP ដែលត្រូវបានយកមកចុះផ្សាយបន្តដោយទីភ្នាក់ងារសារព័ត៌មាន CNA។
ថ្លែងប្រាប់អ្នកសារព័ត៌មាននៅខាងក្រៅវិមានរដ្ឋាភិបាល ក្នុងទីក្រុងបាងកក នាយករដ្ឋមន្រ្តីថៃខាងលើនេះបានលើកឡើងថា គណបក្សថៃរួបរួមជាតិ (United Thai Nation Party) ដែលទើបតែបង្កើតឡើងថ្មី បានផ្តល់ការគាំទ្រដល់រូបលោក ក្នុងការក្លាយជាបេក្ខជននាយករដ្ឋមន្ត្រីបន្ទាប់ទៀត នៅក្នុងការបោះឆ្នោតដែលនឹងធ្វើឡើងនៅពេលខាងមុខ។
ទាក់ទិននឹងករណីនេះ លោកបន្ថែមថា៖ «ខ្ញុំសូមធ្វើការបញ្ជាក់ឱ្យបានច្បាស់នៅក្នុងថ្ងៃនេះថា ខ្ញុំបានសម្រេចចិត្តថា ខ្ញុំនឹងចូលរួមប្រកួតប្រជែងក្នុងតំណែងនេះបន្តទៀត»។
ការប្រកាសដោយលោក ប្រាយុទ្ធ ចាន់អូចា នេះ បានបង្ហាញឱ្យឃើញយ៉ាងច្បាស់ថា រូបលោកក៏នឹងចាកចេញពីគណបក្ស ផាឡាំង ប្រាឆារ៉ាត់ (PPRP) របស់ខ្លួនដែលកំពុងតែកាន់អំណាចនេះផងដែរ។
គួរបញ្ជាក់ថា លោក ប្រាយុទ្ធ ចាន់អូចា បានឡើងកាន់តំណែងជាប្រមុខយោធា ក្រោយការធ្វើរដ្ឋប្រហារកាលពីខែសីហា ឆ្នាំ២០១៤ និងត្រូវបានជ្រើសរើសជានាយករដ្ឋមន្ត្រីបន្ទាប់ពីការបោះឆ្នោតសកលឆ្នាំ២០១៩។
ទោះជាយ៉ាងណា ប្រជាប្រិយភាពរបស់លោកក្នុងពេលបច្ចុប្បន្នហាក់ស្ថិតក្នុងភាពស្រពេចស្រពិល ខណៈកាលពីឆ្នាំមុន លោកក៏ធ្លាប់ត្រូវបានបាតុករទាមទារឱ្យចុះចេញពីតំណែង ជុំវិញការដោះស្រាយករណីវីរុសកូវីដ-១៩ មិនបានល្អផងដែរ៕