អង្គការមូលនិធិសកលសម្រាប់អភិរក្សធម្មជាតិ (ហៅកាត់ថា WWF) អំពាវនាវទៅអាជ្ញាធរពាក់ព័ន្ធដាក់ចេញនូវវិធានការសមស្របបន្ទាន់ ដើម្បីបញ្ឈប់កុំឱ្យសត្វផ្សោតងាប់ដោយសារការនេសាទខុសច្បាប់បន្តទៀត ខណៈសត្វផ្សោតពេញវ័យមួយក្បាលត្រូវបានគេប្រទះឃើញងាប់នៅក្រុងក្រចេះ ខេត្តក្រចេះ។
សេចក្ដីថ្លែងការណ៍របស់អង្គការ WWF ស្ដីពីការបាត់បង់សត្វផ្សោតអ៊ីរ៉ាវ៉ាឌីញីមួយក្បាល នៅថ្ងៃសុក្រនេះ បានលើកឡើងថា នៅថ្ងៃទី២២ ខែធ្នូ ឆ្នាំ២០២២នេះ សត្វផ្សោតញីពេញវ័យមួយក្បាលដែលមានប្រវែង១៩៣សង់ទីម៉ែត្រ អាយុចន្លោះ៧ទៅ១០ឆ្នាំ ទម្ងន់ប្រហែល៨៥គីឡូក្រាម ត្រូវបានគេប្រទះឃើញងាប់អណ្ដែតទឹក នៅឃុំកោះទ្រុង ក្រុងក្រចេះ។ ប្រភពដដែលបន្តថា តាមការស្រាវជ្រាវបឋម សត្វផ្សោតដែលងាប់នោះអាចបណ្ដាលមកពីជាប់មងនេសាទ ខណៈក្រុមអ្នកស្រាវជ្រាវបានរកឃើញមានស្លាកស្នាមនៃសរសៃមងនៅលើកន្ទុយរបស់វា។
អង្គការ WWF៖ «ជាមួយនឹងឧបទ្ទវហេតុដ៏សោកសង្រេងនេះ វាជាសត្វទី១០ហើយដែលបានស្លាប់ក្នុងឆ្នាំ២០២២ និងជាសត្វផ្សោតទី២៨ ដែលបានបាត់បង់ជីវិតក្នុងរយៈពេល៣ឆ្នាំចុងក្រោយនេះ។ ការដែលសោកស្ដាយខ្លាំងបំផុត គឺនៅពេលដែលសត្វផ្សោតញីពេញវ័យដែលមានសុខភាពល្អដូចសត្វផ្សោតញីមួយក្បាលនាពេលនេះ បានបាត់បង់ជីវិត ព្រោះប៉ះពាល់ធ្ងន់ធ្ងរដល់លទ្ធភាពនៃការបន្តពូជរបស់សត្វផ្សោតទន្លេមេគង្គ។
ករណីនេះ អង្គការ WWF បានអំពាវនាវដល់អាជ្ញាធរមានសមត្ថកិច្ចពាក់ព័ន្ធទាំងអស់រៀបចំដាក់ចេញនូវវិធានការសមស្របបន្ទាន់ ដើម្បីបញ្ឈប់កុំឱ្យសត្វផ្សោតរងគ្រោះថ្នាក់ងាប់បន្តទៀតដោយសារការនេសាទខុសច្បាប់ ដូចជាការប្រើមងនេសាទ និងឧបករណ៍ឆក់ ដែលកំពុងត្រូវបានប្រព្រឹត្តនៅក្នុងតំបន់អភិរក្សសត្វផ្សោត។
នាយកអង្គការ WWF លោក សេង ទៀក បានលើកឡើងក្នុងសេចក្ដីថ្លែងការណ៍ថា ក្នុងរយៈពេលប៉ុន្មានថ្ងៃចុងក្រោយនេះ មានសត្វផ្សោត២ក្បាលហើយបានងាប់ ដែលនេះបង្ហាញពីសញ្ញាធ្ងន់ធ្ងរ និងជាការព្រួយបារម្ភខ្លាំង ដែលឈានទៅរកភាពផុតពូជសម្រាប់សត្វផ្សោតនៅទន្លមេគង្គ។
លោកបញ្ជាក់ថា ស្ថានភាពនេះកាន់តែបង្កើតការព្រួយបារម្ភខ្លាំងចំពោះការរស់រានរបស់សត្វផ្សោត ដែលចាំបាច់ទាមទារឱ្យមានវិធានការដើម្បីការពារជាបន្ទាន់ ក្នុងគោលបំណងបញ្ចៀសឱ្យបាននូវការបាត់បង់សត្វផ្សោតទន្លេមេគង្គ។
លោកថា៖ «យើងមិនធ្លាប់បានឃើញនូវអត្រាស្លាប់ខ្ពស់បែបនេះទេ ក្នុងរយៈពេល១០ឆ្នាំចុងក្រោយនេះ។ ប្រសិនបើគ្មានវិធានការសមស្រប ដើម្បីឆ្លើយតបជាបន្ទាន់ទៅស្ថានភាពបច្ចុប្បន្ននេះទេ នោះសត្វផ្សោតនឹងវិនាសផុតពូជមិនខានឡើយ»។
លោក សេង ទៀក ក៏បានទទូចទៅសមត្ថកិច្ចពាក់ព័ន្ធ អនុវត្ត និងពង្រឹងវិធានការច្បាប់ឱ្យបានតឹងរ៉ឹងចំពោះរាល់សកម្មភាពនេសាទខុសច្បាប់គ្រប់ទម្រង់ នៅក្នុងតំបន់ទីជម្រកសត្វផ្សោត ដោយត្រូវបង្កើនការល្បាតនៅពេលយប់ ព្រោះវាជាពេលដែលការនេសាទខុសច្បាប់កើតឡើង។
បើតាមអង្គការ WWF ក្នុងចំណោមចំនួនផ្សោតដែលនៅសល់កំពុងរស់នៅក្នុងទន្លេមេគង្គ សត្វផ្សោតប្រមាណ៧០ភាគរយ មានអាយុលើសពី២០ឆ្នាំ ដែលជាវ័យមួយផុតកំណត់អាយុដែលមានលទ្ធភាពបង្កាត់ពូជ។ ប្រភពដដែលបន្តថា ជាទូទៅ សត្វផ្សោតអ៊ឺរ៉ាវ៉ាឌី អាចរស់នៅបានអាយុចន្លោះពី២៧ឆ្នាំ ទៅ៣០ឆ្នាំ ខណៈអត្រាស្លាប់របស់កូនសត្វផ្សោតមានកម្រិត ៦២ភាគរយ ក្នុងរយៈពេល៣ឆ្នាំចុងក្រោយ ដែលជាមូលហេតុធ្វើឱ្យអត្រារស់រានរបស់កូនសត្វផ្សោតរហូតដល់ពេញវ័យមានកម្រិតទាប ដែលកត្តានេះជាក្ដីបារម្ភមួយខ្លាំង ដោយសារមិនមានចំនួនសត្វផ្សោតកើតថ្មីគ្រប់គ្រាន់ដើម្បីបន្តវេនជំនួសផ្សោតចាស់៕