ក្រសួងការពារជាតិតៃវ៉ាន់ ប្រកាសឱ្យដឹងនៅថ្ងៃទី២៦ ខែធ្នូនេះថា ទីក្រុងប៉េកាំងកំពុងបន្តសកម្មភាពយោធារបស់ខ្លួននៅជិតដែនកោះមួយនេះ ក្រោយពីយន្តហោះចំនួន៤៣គ្រឿងរបស់កងទ័ពអាកាសចិន បានហោះឆ្លងកាត់ខ្សែបន្ទាត់ [មធ្យម] នៃច្រកសមុទ្រតៃវ៉ាន់ កាលពីម្សិលមិញ។ នេះបើយោងតាមប្រភពរបស់ទីភ្នាក់ងារសារព័ត៌មាន Reuters និងត្រូវបានយកមកផ្សព្វផ្សាយបន្តដោយសារព័ត៌មាន CNA នៅថ្ងៃចន្ទនេះ។
ប្រទេសចិនដែលតែងប្រកាសចាត់ទុកកោះតៃវ៉ាន់ថាជាអាណាខេត្តមួយរបស់ខ្លួន បានឱ្យដឹងថា ខ្លួនបានធ្វើសមយុទ្ធយោធានៅក្នុងដែនសមុទ្រ និងលើអាកាស ជុំវិញកោះតៃវ៉ាន់ កាលពីថ្ងៃអាទិត្យម្សិលមិញ ដែលជាការឆ្លើយតបទៅនឹងអ្វីដែលចិនចោទប្រកាន់ថាជាការបង្កហេតុរបស់រដ្ឋាភិបាលកោះតៃវ៉ាន់ និងសហរដ្ឋអាមេរិក។
តៃវ៉ាន់ដែលបដិសេធយ៉ាងដាច់អហង្ការចំពោះការទាមទារគ្រប់គ្រងអធិបតេយ្យភាពរបស់ចិន បាននិយាយថា សមយុទ្ធរបស់ចិននេះបានបង្ហាញថា ទីក្រុងប៉េកាំងកំពុងបំផ្លាញសន្តិភាពនៅក្នុងតំបន់ និងព្យាយាមធ្វើឱ្យប្រជាជនតៃវ៉ាន់ភ័យខ្លាច។
យោងតាមផែនទីដែលផ្តល់ដោយក្រសួងការពារជាតិតៃវ៉ាន់ បានឱ្យដឹងថា យន្តហោះរបស់កងទ័ពអាកាសចិនទាំងនោះ បានហោះឆ្លងកាត់ខ្សែបន្ទាត់មធ្យមនៃច្រកសមុទ្រតៃវ៉ាន់ ដែលជាកន្លែងដ៏រសើប។ ក្រសួងការពារជាតិតៃវ៉ាន់ ក៏បានអះអាងដែរថា នាវាកងទ័ពជើងទឹកចិនចំនួន៧គ្រឿងក៏ត្រូវបានគេប្រទះឃើញស្ថិតនៅជិតកោះតៃវ៉ាន់ផងដែរ។
ជាការឆ្លើយតបទៅនឹងសកម្មភាពយោធារបស់ចិននេះ ក្រសួងការពារជាតិតៃវ៉ាន់ និយាយថា តៃវ៉ាន់បានបញ្ជូនយន្តហោះចម្បាំង ដើម្បីព្រមានយន្តហោះរបស់ចិន ខណៈដែលប្រព័ន្ធមីស៊ីលរបស់តៃវ៉ានបានឃ្លាំមើលការហោះហើររបស់យន្តហោះយោធាចិនជាប្រចាំ។
ក្នុងរយៈពេលប៉ុន្មានឆ្នាំចុងក្រោយនេះ ទីក្រុងប៉េកាំង បានបង្កើនសម្ពាធទៅលើរដ្ឋាភិបាលកោះតៃវ៉ាន់ ដើម្បីឱ្យរដ្ឋាភិបាលនៃដែនកោះមួយនេះទទួលយកអំណាចរបស់ទីក្រុងប៉េកាំង។ ចំណែករដ្ឋាភិបាលកោះតៃវ៉ាន់វិញ តែងលើកឡើងថា ពួកគេចង់បានសន្តិភាពជាមួយប្រទេសចិន ប៉ុន្តែប្រសិនបើចិនវាយប្រហារមកលើកោះនេះ ពួកគេនឹងការពារ៕
