យោធាកូរ៉េខាងត្បូងបាននិយាយថា យន្តហោះគ្មានមនុស្សបើក (ដ្រូន) របស់កូរ៉េខាងជើង ចំនួន៥គ្រឿង បានហោះឆ្លងចូលទៅក្នុងប្រទេសកូរ៉េខាងត្បូង កាលពីថ្ងៃចន្ទ ហើយកូរ៉េខាងត្បូងបានព្យាយាមដេញបាញ់ទម្លាក់ដ្រូនទាំងនោះ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters។
មន្ត្រីយោធាកូរ៉េខាងត្បូងម្នាក់បាននិយាយថា ជាការឆ្លើយតប យោធាកូរ៉េខាងត្បូងក៏បានបញ្ជូនយន្តហោះស៊ើបការណ៍ចូលទៅក្នុងកូរ៉េខាងជើង ដើម្បីផ្តិតយករូបភាពអំពីមូលដ្ឋានទ័ពរបស់កូរ៉េខាងជើង។
មន្ត្រីយោធាកូរ៉េខាងត្បូង លោក លី សឹងអូ (Lee Seung-o) បានប្រាប់សន្និសីទសារព័ត៌មានថា «នេះជាទង្វើបង្ហាញយ៉ាងច្បាស់ពីការបង្កហេតុដោយកូរ៉េខាងជើង ដែលរំលោភលើដែនអាកាសរបស់យើង»។
ដ្រូនមួយគ្រឿងក្នុងចំណោមដ្រូនទាំង៥គ្រឿងរបស់កូរ៉េខាងជើង បានហោះនៅជិតរដ្ឋធានីសេអ៊ូលរបស់កូរ៉េខាងត្បូង ហើយមួយគ្រឿងទៀតបានហោះនៅជិតឆ្នេរសមុទ្រភាគខាងលិចប្រទេសកូរ៉េខាងត្បូង។
លោក Lee បាននិយាយថា យោធាកូរ៉េខាងត្បូងបានបើកប្រតិបត្តិការ ដើម្បីដេញបាញ់ទម្លាក់ដ្រូនទាំងនោះ។
លោកមិនបានបញ្ជាក់ថាតើបានបាញ់ដ្រូនណាមួយធ្លាក់នោះទេ ប៉ុន្តែទីភ្នាក់ងារព័ត៌មាន Yonhap បានរាយការណ៍ថា យោធាកូរ៉េខាងត្បូងបានបាញ់ប្រហែល ១០០គ្រាប់ ប៉ុន្តែបាញ់មិនចំដ្រូនណាមួយឡើយ។ លោក Lee បាននិយាយថា កូរ៉េខាងត្បូងបាន «បាញ់ព្រមាន» នៅពេលដែលខ្លួនបានឃើញដ្រូនទាំងនោះ។
លោក Lee បន្តថា ដ្រូនមួយគ្រឿងបានហោះត្រលប់ទៅកូរ៉េខាងជើងវិញ ខណៈដ្រូន៤គ្រឿងទៀតបានបាត់ដាន។
លោក Lee បាននិយាយថា យន្តហោះឈ្លបយកការណ៍របស់កូរ៉េខាងត្បូង បានហោះចូលទៅក្នុងកូរ៉េខាងជើង ដើម្បីផ្តិតយករូបសកម្មភាពដែលពាក់ព័ន្ធនឹងដ្រូនទាំងនេះ។ លោក Lee បន្ថែមថា ដ្រូនរបស់កូរ៉េខាងជើងមានគោលបំណងឈ្លបយកការណ៍នៅកូរ៉េខាងត្បូង។
យោធាបាននិយាយថា កូរ៉េខាងត្បូងបានឃើញដ្រូនរបស់កូរ៉េខាងជើងហោះឆ្លងកាត់តំបន់គ្មានយោធា (Military Demarcation Line) រវាងប្រទេសទាំងពីរ បន្ទាប់ពីឃើញដ្រូនទាំងនោះនៅលើមេឃ ភាគខាងលិចទីក្រុងហ្គីមប៉ូ (Gimpo) នៅម៉ោងប្រហែល ១០ៈ២៥ ព្រឹក (0125 GMT)។
កាលពីឆ្នាំ២០១៧ ដ្រូនរបស់កូរ៉េខាងជើងដែលគេជឿថាហោះមកដើម្បីឈ្លបយកការណ៍បានធ្លាក់ ហើយត្រូវបានប្រទះឃើញលើភ្នំក្បែរព្រំដែនប្រទេសទាំងពីរ។
នៅឆ្នាំ២០១៤ ដ្រូនរបស់កូរ៉េខាងជើងត្រូវបានប្រទះឃើញនៅលើកោះក្បែរព្រំដែនកូរ៉េខាងត្បូង។
គួរបញ្ជាក់ថា ដ្រូនរបស់កូរ៉េខាងជើងដែលហោះចូលកូរ៉េខាងត្បូងនេះ កើតឡើងបន្ទាប់ពីកូរ៉េខាងត្បូង និងសហរដ្ឋអាមេរិកធ្វើសមយុទ្ធយោធារួមគ្នា ជាការឆ្លើយតបទៅនឹងការសាកល្បងមីស៊ីលជាច្រើនលើករបស់កូរ៉េខាងជើង ក្នុងឆ្នាំនេះ។ កូរ៉េខាងជើង ហៅសមយុទ្ធនោះថាជាការត្រៀមខ្លួនសម្រាប់ការឈ្លានពាន៕
