ក្រសួងធនធានទឹក និងឧតុនិយម ឱ្យដឹងថា ស្ថានភាពអាកាសធាតុនៅតាមបណ្តាខេត្តមួយចំនួន ក្នុងតំបន់ទំនាបកណ្ដាល តំបន់ខ្ពង់រាប និងតំបន់មាត់សមុទ្រ អាចនឹងចុះត្រជាក់ចន្លោះពី១៦ទៅ២២អង្សាសេទៅតាមតំបន់នីមួយៗ នៅក្នុងសប្តាហ៍នេះ និងដើមសប្តាហ៍ក្រោយ។
សេចក្តីជូនដំណឹងរបស់ក្រសួងធនធានទឹក និងឧតុនិយម ស្តីពីស្ថានភាពអាកាសធាតុ ចុះថ្ងៃទី២៧ ខែធ្នូ ឆ្នាំ២០២២នេះ ឱ្យដឹងថា ចាប់ពីថ្ងៃទី២៨ ខែធ្នូ ឆ្នាំ២០២២ ដល់ថ្ងៃទី០៣ ខែមករា ឆ្នាំ២០២៣ កម្ពុជានឹងបន្តទទួលរងឥទ្ធិពលពីទ្រនុងសម្ពាធខ្ពស់(ចិន) ក្នុងកម្រិតបង្គួរ និងខ្យល់មូសុងឦសាន ក្នុងកម្រិតមធ្យម ដែលស្ថានភាពនេះនឹងធ្វើឱ្យតំបន់ទំនាបកណ្តាល តំបន់ខ្ពង់រាប និងតំបន់មាត់សមុទ្រ នឹងបន្តចុះត្រជាក់។
ប្រភពដដែលបន្តថា សម្រាប់នៅតំបន់ខ្ពង់រាប ដែលមានដូចជា ខេត្តមណ្ឌលគិរី រតនគិរី ព្រះវិហារ និងឧត្ដរមានជ័យ អាកាសធាតុអាចនឹងចុះត្រជាក់អប្បបរមាក្នុងរង្វង់ពី១៥ទៅ២២អង្សាសេ ក្នុងនោះ នៅពេលព្រឹក និងពេលយប់ អាចត្រជាក់ក្នុងរង្វង់១៥ទៅ១៧អង្សាសេ ខណៈសីតុណ្ហភាពអតិបរមាមានចន្លោះពី២៨ទៅ៣២អង្សាសេ។
នៅតំបន់ទំនាបកណ្តាល ក្រសួងថាអាចមានសីតុណ្ហភាពអប្បបរមា ក្នុងចន្លោះពី១៨ទៅ២២អង្សាសេ និងសីតុណ្ហភាពអតិបរមាមានចន្លោះពី២៨ទៅ៣២អង្សាសេ។
ចំណែកតំបន់មាត់សមុទ្រ ក្រសួងថា សីតុណ្ហភាពអប្បបរមានឹងអាចចុះត្រជាក់ក្នុងរង្វង់ពី១៩ទៅ២២អង្សាសេ និងសីតុណ្ហភាពអតិបរមាមានចន្លោះពី២៩ទៅ៣២អង្សាសេ។
ករណីនេះ ក្រសួងបន្តអំពាវនាវដល់ប្រជាពលរដ្ឋបង្កើនការយកចិត្តទុកដាក់ថែរក្សាសុខភាពចំពោះស្ថានភាពចុះត្រជាក់នេះ៕
