លោកនាយករដ្ឋមន្ត្រី ហ៊ុន សែន ណែនាំឱ្យក្រសួង និងអាជ្ញាធរពាក់ព័ន្ធ ពន្លឿនការចុះបញ្ជីក្បាលដីជូនប្រជាពលរដ្ឋ ដោះស្រាយបញ្ហាដីធ្លី និងអនុវត្តការងារកាត់ឆ្វៀលដីតំបន់បឹងទន្លេសាបជូនប្រជាពលរដ្ឋឱ្យបានរួចរាល់នៅឆ្នាំ២០២៣។
ក្នុងពិធីបិទសន្និបាតបូកសរុបលទ្ធផលការងារ ឆ្នាំ២០២២ និងលើកទិសដៅការងារ ឆ្នាំ២០២៣ របស់ក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី២៧ ខែធ្នូ ឆ្នាំ២០២២ លោកនាយករដ្ឋមន្ត្រី ហ៊ុន សែន បានក្រើនរំឭកដល់ក្រសួងពាក់ព័ន្ធ និងអភិបាលខេត្តទាំងអស់ ត្រូវយកចិត្តទុកដាក់លើការងារចុះបញ្ជីក្បាលដីជូនប្រជាពលរដ្ឋ ដោយត្រូវពន្លឿនការងារនេះឱ្យបាន ១០០ភាគរយ នៅឆ្នាំ២០២៣ ខណៈបច្ចុប្បន្នសម្រេចបានជាង ៩០ភាគរយ ទៅហើយនោះ។
លោកបន្តថា ការពន្លឿនការអនុវត្តផែនការចុះបញ្ជីដី រួមទាំងការចុះបញ្ជីដីរដ្ឋ ដីសាធារណៈរបស់រដ្ឋ ដីសម្បទានសេដ្ឋកិច្ច និងដីសហគមន៍ជនជាតិដើមភាគតិច ដើម្បីធានានូវសុវត្ថិភាពនៃការកាន់កាប់ដីធ្លី ដែលជាទុនសម្រាប់ការរស់នៅ ដាំដុះ និងវិនិយោគ ដើម្បីបង្កើតមុខរបរ និងបង្កើនប្រាក់ចំណូល។
លោកនាយករដ្ឋមន្ត្រី បានគូសបញ្ជាក់ថា៖ «ចំណុចសេសសល់របស់យើង វានៅមិនច្រើនទេ វានៅតិចណាស់ ប៉ុន្តែយើងហាក់ដូចជាកន្លែងខ្លះ ពន្យារនូវការធ្វើរឿងនេះ ទោះបីការចុះបញ្ជី ឬធ្វើកម្មសិទ្ធិ ជាលក្ខណៈប្រព័ន្ធក្ដី ជាលក្ខណៈដាច់ដោយដុំក្ដី គឺហាក់ដូចជានៅទ្រឹង ឬធ្វើដែរក៏ប៉ុន្តែធ្វើដោយមិនមាន គេហៅថាមិនមានការជំរុញ គឺមិនមានសន្ទុះ ដែលធ្វើឱ្យប្រជាជនរង់ចាំរឿងនេះ»។
លោកបន្ថែមថា៖ «ព្រោះរឿងនេះ វាជារឿងចាំបាច់សម្រាប់ប្រជាពលរដ្ឋរបស់យើង នេះជាសុវត្ថិភាពនៃការកាន់កាប់ដីធ្លី ដើម្បីចៀសវាងការកើតឡើងនូវបញ្ហានានាជាបន្តទៀត […] ខ្ញុំសុំឱ្យអស់លោកយកចិត្តទុកដាក់ជំរុញ ជាពិសេសអភិបាលខេត្តដែលជាប្រធានគណៈកម្មការដីថ្នាក់ខេត្ត មើលកិច្ចការងារនេះឱ្យបានខ្ជាប់ខ្ជួន ដោះស្រាយបញ្ហាទាក់ទងជាមួយបញ្ហាដី។ ដីរបស់រដ្ឋក៏ត្រូវមើល ដីសហគមន៍ក៏ត្រូវមើល ហើយដីរបស់ប្រជាជនដែលមិនទាន់បានចុះបញ្ជីក៏ត្រូវធ្វើឱ្យពួកគាត់ ចាត់ទុកថានេះជាសេវាចាំបាច់ ឬជាសេវាតម្រូវការតែម្តង បើមិនដូច្នេះទេ គឺថានៅអង្អែលៗហ្នឹងហើយ»។
ជាមួយគ្នានេះ លោកបានណែនាំឱ្យអាជ្ញាធរបន្តលើកទឹកចិត្តឱ្យមានការដោះស្រាយវិវាទក្រៅប្រព័ន្ធតុលាការ នៅថ្នាក់មូលដ្ឋាន ជាពិសេសវិវាទដីធ្លី ដើម្បីពង្រឹងសុវត្ថិភាពនៃការកាន់កាប់ដី បង្កើតភាពសុខដុមរមនាសង្គម បង្កភាពអនុគ្រោះដល់ដំណើរការអភិវឌ្ឍសង្គម-សេដ្ឋកិច្ចនៅតាមមូលដ្ឋាន និងឈានទៅបង្កើនល្បឿននៃការកាត់បន្ថយភាពក្រីក្រ។
លោកនាយករដ្ឋមន្ត្រី ហ៊ុន សែន ក៏បានណែនាំឱ្យអាជ្ញាធរបន្តដោះស្រាយបញ្ហាជូនប្រជាពលរដ្ឋដែលរស់នៅជាភូមិករ នៅជុំវិញបឹងទន្លេសាប ដោយធ្វើបច្ចុប្បន្នភាពផែនទីតាមខេត្តនីមួយៗ កែសម្រួលព្រំប្រទល់តំបន់៣ ព្រំប្រទល់តំបន់២ និងកាត់ឆ្វៀលទីតាំងដីដែលប្រជាពលរដ្ឋរស់នៅពីយូរលង់មកហើយក្នុងតំបន់ទាំង២នេះ ឱ្យបានរួចរាល់ត្រឹមខែឧសភា មុនការបោះឆ្នោតសកល ឆ្នាំ២០២៣។
ភ្លាមៗបន្ទាប់ពីការណែនាំរបស់ប្រមុខរដ្ឋាភិបាល ក្រសួងរៀបចំដែនដី បានចេញសេចក្តីប្រកាសព័ត៌មានមួយដោយគូសបញ្ជាក់ថា ទិសដៅការងារសម្រាប់ឆ្នាំ២០២៣ ក្រសួងនឹងបន្តអនុវត្តផែនការចុះបញ្ជីដីធ្លី រួមទាំងការចុះបញ្ជីដីរដ្ឋ ដីសាធារណៈរបស់រដ្ឋ ដីសម្បទានសេដ្ឋកិច្ច ដីរដ្ឋជុំវិញបឹងទន្លេសាប និងដីសហគមន៍ជនជាតិដើមភាគតិច ដើម្បីធានានូវសុវត្ថិភាពនៃការកាន់កាប់ដីធ្លីរបស់ប្រជាពលរដ្ឋ។
ក្រសួងរៀបចំដែនដី ក៏បានបង្ហាញពីការប្ដេជ្ញាក្នុងការជំរុញការដោះស្រាយវិវាទដីធ្លីក្រៅប្រព័ន្ធតុលាការ ដោយឈរលើគោលការណ៍អព្យាក្រឹត មិនលម្អៀងលើភាគីវិវាទណាមួយ ដើម្បីពង្រឹងសុវត្ថិភាពនៃការកាន់កាប់ដី បង្កើតភាពសុខដុមរមនាសង្គម និងបង្កភាពអនុគ្រោះដល់ដំណើរការនៃការអភិវឌ្ឍសេដ្ឋកិច្ច សង្គមកិច្ច នៅតាមមូលដ្ឋាន។ ក្រៅពីនោះ ក្រសួងក៏នឹងបន្តដោះស្រាយ និងកាត់ឆ្វៀលទីតាំងដីដែលប្រជាពលរដ្ឋរស់នៅជាយូរលង់មកហើយ ក្នុងតំបន់៣ និងតំបន់២ នៅជុំវិញបឹងទន្លេសាប ឱ្យចប់ត្រឹមខែឧសភា ឆ្នាំ២០២៣ ផងដែរ។
ប្រជាពលរដ្ឋរស់នៅភូមិអំពៅព្រៃ ឃុំកណ្ដោក ស្រុកកណ្ដាលស្ទឹង ខេត្តកណ្តាល អ្នកស្រី ម៉ុត ចាន់សុផាននី ដែលកំពុងបារម្ភពីការបាត់បង់ដីធ្លី និងផ្ទះសម្បែងដោយសារការអភិវឌ្ឍព្រលានយន្តហោះថ្មី បានសាទរចំពោះការណែនាំរបស់នាយករដ្ឋមន្ត្រី ដែលជំរុញឱ្យពន្លឿនការចុះបញ្ជីដីធ្លីជូនពលរដ្ឋ។
អ្នកស្រីមានប្រសាសន៍នៅថ្ងៃពុធនេះថា ថ្មីៗនេះ បុគ្គលិករបស់ក្រុមហ៊ុនដែលសាងសង់ព្រលានយន្តហោះថ្មី និងអាជ្ញាធរមូលដ្ឋាន បានចុះទៅបង់លេខផ្ទះ ស្រង់ទិន្នន័យប្រជាពលរដ្ឋ និងកំណត់ថ្ងៃឱ្យពលរដ្ឋមួយចំនួននៅឃុំកណ្តោក និងឃុំកំពង់សំណាញ់ ក្រុងតាខ្មៅ រុះរើផ្ទះដោយពុំបានបញ្ជាក់ពីមូលហេតុឡើយ ដែលករណីនេះបានធ្វើឱ្យពលរដ្ឋប្រមាណ ៤៦០គ្រួសារ បារម្ភពីការបណ្តេញចេញដោយបង្ខំ។
អ្នកស្រី សុផាននី និយាយថា៖ «បើសិនជាលោក [នាយករដ្ឋមន្ត្រី] មានប្រសាសន៍បែបនេះហើយ បើសិនជាលោកអាចផ្តល់ឱ្យប្រជាជនបាន គឺប្រជាជនត្រេកអរយ៉ាងខ្លាំង […] បើសិនជាអាចមានប្លង់មែន គឺប្រជាជនមានភាពកក់ក្តៅមួយក្នុងការរស់នៅលើដីដែលខ្លួនរស់នៅ ព្រោះខាងព្រលាន គឺគាត់មក គាត់សួររកតែប្លង់កម្មសិទ្ធិៗ ដែលប្រជាជនពួកយើងពីដើមមកមិនដែលទាមទារប្លង់កម្មសិទ្ធិទាំងអស់ហ្នឹងទេ ព្រោះគិតថាយើងជាប្រជាជនដែលរស់នៅលើទឹកដីកម្ពុជាទាំងអស់គ្នា»។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា សាររបស់នាយករដ្ឋមន្ត្រីជាសញ្ញាល្អមួយសម្រាប់ប្រជាពលរដ្ឋ។ ប៉ុន្តែលោកនៅមានក្តីបារម្ភជុំវិញការចុះវាស់វែងដីសម្រាប់ចុះបញ្ជីដីធ្លី ដែលអាចនឹងមានជនឆ្លៀតឱកាសមួយចំនួនត្រូវរ៉ូវគ្នារំលោភយកដីរដ្ឋ ឬដីប្រជាពលរដ្ឋបន្ថែមទៀត ដែលធ្វើឱ្យវិវាទដីធ្លីនៅបន្តកើតមាន។
មួយវិញទៀត លោកក៏បានសាទរចំពោះការណែនាំរបស់នាយករដ្ឋមន្ត្រី ដែលឱ្យអាជ្ញាធរដោះស្រាយវិវាទដីធ្លីក្រៅប្រព័ន្ធតុលាការ ខណៈយន្តការនេះមានភាពអសកម្មនាពេលកន្លងមក។
លោកថា៖ «ជាការកត់សម្គាល់ ដោយសារតែការគ្រប់គ្រងដីធ្លីរបស់យើងហ្នឹងពុំមានតម្លាភាព ឬក៏មានអតុល្យភាពក្នុងការគ្រប់គ្រង យើងសង្កេតឃើញជាក់ស្តែងហើយ បើសិនជាដីឧកញ៉ា ឬមួយដីក្រុមហ៊ុនអ្នកមានអំណាចអ៊ីចឹងទៅ គឺថាគេអ្នកមានប្រៀបជាងប្រជាពលរដ្ឋ គេដោះស្រាយបាន គេទទួលបានដីធ្លី តែប្រជាពលរដ្ឋអត់ទទួលបានទេ បែរទៅជាមានការចោទប្រកាន់ ដូចជាតំណាងសហគមន៍មួយចំនួនត្រូវបានចោទប្រកាន់ ហើយចាប់ដាក់ពន្ធនាគារអ៊ីចឹង»។
លោក វណ្ណ សុផាត ក៏បានជំរុញឱ្យមានយន្តការក្នុងការតាមដានការអនុវត្តរបស់មន្ត្រីថ្នាក់ក្រោម ក្រោយពីមានការណែនាំរបស់នាយករដ្ឋមន្ត្រីផងដែរ ដើម្បីឱ្យការងារចុះបញ្ជីដីធ្លី និងការដោះស្រាយវិវាទដីធ្លីក្រៅប្រព័ន្ធតុលាការមានប្រសិទ្ធភាព។
លោកថា៖ «ជាពិសេសលោកនាយករដ្ឋមន្ត្រីហ្នឹងគួរមានយន្តការបន្ថែមទៀត ឬវិធានការបន្ថែមទៀត ដើម្បីពិនិត្យមើលលើការអនុវត្តទៅតាមប្រសាសន៍ ឬក៏សាររបស់គាត់ បើមិនអ៊ីចឹងទេ ឃើញថាគ្រាន់តែទម្លាប់មួយ គ្រាន់តែជាប្រពៃណីមួយ ក្នុងការបំផុសប្រជាពលរដ្ឋ ឬមួយក៏លើកទឹកចិត្តប្រជាពលរដ្ឋឱ្យជឿមួយពេលៗនៅមុនពេលបោះឆ្នោត»។
បើតាមសេចក្តីប្រកាសព័ត៌មានរបស់ក្រសួងរៀបចំដែនដី ការចុះបញ្ជីក្បាលដីជូនប្រជាពលរដ្ឋសម្រេចបានរហូតមកដល់បច្ចុប្បន្នមានចំនួនប្រមាណ ៦លាន៧សែនក្បាលដី ឬស្មើនឹង ៩៦,២០ភាគរយ នៃក្បាលដីប៉ាន់ស្មានដំបូង ៧លានក្បាលដី៕
