មនុស្សយ៉ាងហោចណាស់ ១១នាក់បានស្លាប់ និងជាច្រើននាក់ផ្សេងទៀតរងរបួសនៅក្នុងហេតុការណ៍អគ្គិភ័យមួយនៅកណ្ដាលក្រុងប៉ោយប៉ែត ខេត្តបន្ទាយមានជ័យ ជាប់ព្រំដែនកម្ពុជា-ថៃ។
តាមរយៈឃ្លីបវីដេអូដែលត្រូវបានបង្ហោះនៅលើបណ្ដាញសង្គមតាំងពីពាក់កណ្ដាលអធ្រាត្រឈានចូលថ្ងៃទី២៩ ខែធ្នូ នេះ គេឃើញអាគារកាស៊ីណូដ៏ធំមួយឈ្មោះ «ហ្គ្រេនដាយមិន» ត្រូវបានភ្លើងឆាបឆេះចេញពីក្នុងអាគារ និងទីបំផុតត្រូវបានភ្លើងលេបត្របាក់ស្ទើរតែទាំងស្រុង។
ឃ្លីបវីដេអូខ្លះទៀតបានបង្ហាញរូបភាពមនុស្សដែលកំពុងជាប់នៅលើអាគារព្យាយាមបន្លាស់ទីគេចពីអណ្ដាតភ្លើងដែលកំពុងឆេះសន្ធោសន្ធៅ ក្នុងពេលអ្នកខ្លះទៀតដោយមិនអាចទ្រាំនឹងកម្ដៅភ្លើងដ៏ខ្លាំងនោះបាន ក៏លោតចុះពីលើអាគារមកលើដីដើម្បីផ្សងជីវិត ខណៈដែលពលរដ្ឋដែលកំពុងមើលពីក្រោមអាគារ និងពីចម្ងាយស្រែកដង្ហោយហៅសមត្ថកិច្ចឱ្យជួយបាញ់ទឹករារាំងភ្លើងកុំឱ្យឆាបឆេះអ្នកទាំងអស់នោះ។
វីអូឌី មិនទាន់អាចសុំការបញ្ជាក់បន្ថែមពីអភិបាលខេត្តបន្ទាយមានជ័យ លោក អ៊ំ រាត្រី បាននៅឡើយទេ គិតត្រឹមព្រឹកថ្ងៃទី២៩ ខែធ្នូ នេះ។ ប៉ុន្តែបើតាមស្នងការនគរបាលខេត្តបន្ទាយមានជ័យ លោក សិទ្ធិ ឡោះ ដែលបានថ្លែងប្រាប់សារព័ត៌មាន Fresh News នៅព្រឹកថ្ងៃនេះ អះអាងថា ជារបាយការណ៍បឋម មានមនុស្សចំនួន ១១នាក់បានស្លាប់ និង ៣០នាក់ផ្សេងទៀតរងរបួស នៅក្នុងហេតុការណ៍នេះ។ ទោះជាយ៉ាងណា ស្នងការនគរបាលរូបនេះនៅមិនទាន់អាចបញ្ជាក់ពីមូលហេតុនៃអគ្គិភ័យនេះបាននៅឡើយទេ គ្រាន់តែដឹងថា កាស៊ីណូ ហ្គ្រេនដាយមិន នេះមានបុគ្គលិកធ្វើការសរុបជាង៤០០នាក់។
តាមរយៈឃ្លីបវីដេអូដែលបានបង្ហោះនៅលើបណ្ដាញសង្គម ឱ្យដឹងថា អគ្គិភ័យដែលលេបត្របាក់អាគារកាស៊ីណូ ហ្គ្រេនដាយមិន បានកើតឡើងតាំងពីម៉ោង ១១កន្លះយប់ ថ្ងៃទី២៨ ខែធ្នូ ប៉ុន្តែបើតាមឱ្យដឹងពីសមត្ថកិច្ច គិតមកដល់ព្រឹកថ្ងៃទី២៩ ខែធ្នូ នេះ ភ្លើងនៅតែបន្តឆេះនៅឡើយ ហើយសមត្ថកិច្ចឱ្យដឹងថា ពួកគេកំពុងបន្តស្វែងរក និងជួយសង្គ្រោះជនរងគ្រោះបន្តទៀត។
ក្រោយហេតុការណ៍អគ្គិភ័យនេះ រដ្ឋមន្ត្រីក្រសួងមហាផ្ទៃ លោក ស ខេង ក៏បានធ្វើដំណើរចុះពិនិត្យផ្ទាល់ដល់កន្លែងកើតហេតុ នៅព្រឹកថ្ងៃទី២៩ ខែធ្នូ នេះដែរ៕
