ប្រធានមូលនិធិរូបិយវត្ថុអន្តរជាតិ (IMF) បានព្រមានថា នៅឆ្នាំ២០២៣នេះ សេដ្ឋកិច្ចពិភពលោកនឹងធ្លាក់ចុះជាងឆ្នាំ២០២២ ខណៈសហរដ្ឋអាមេរិក សហភាពអឺរ៉ុប និងប្រទេសចិន មានកំណើនសេដ្ឋកិច្ចយឺត។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Al Jazeera នៅថ្ងៃទី២ ខែមករា ឆ្នាំ២០២៣នេះ។
នាយកគ្រប់គ្រងអង្គការ IMF លោកស្រី គ្រីស្តាលីណា ចចជីវ៉ា (Kristalina Georgieva) បាននិយាយថា នៅឆ្នាំ២០២៣នេះគឺជា «ឆ្នាំដ៏លំបាក» ដោយមួយភាគបីនៃសេដ្ឋកិច្ចពិភពលោកនឹងធ្លាក់ចុះ។
លោកស្រីបន្តថា មូលហេតុគឺដោយសារសេដ្ឋកិច្ចរបស់ប្រទេសសេដ្ឋកិច្ចកំពូលទាំងបី រួមមាន សហរដ្ឋអាមេរិក សហភាពអឺរ៉ុប និងប្រទេសចិន កំពុងធ្លាក់ចុះក្នុងពេលដំណាលគ្នា។
ការលើកឡើងនេះ គឺបន្ទាប់ពីអង្គការ IMF កាលពីខែតុលា បានព្យាករថា កំណើនសេដ្ឋកិច្ចសកលនឹងធ្លាក់ចុះពី ២,៩ភាគរយ [ការព្យាករកាលពីខែកក្កដា] មកត្រឹម ២,៧ភាគរយ ចំពេលមានភាពបញ្ហាប្រឈមជាច្រើន រួមទាំងសង្គ្រាមនៅអ៊ុយក្រែន និងការកើនឡើងខ្ពស់នៃអត្រាការប្រាក់។
លោកស្រី Georgieva បាននិយាយថា ប្រទេសចិនដែលជាមហាអំណាចសេដ្ឋកិច្ចទីពីរនៅលើពិភពលោក ទំនងជានឹងធ្លាក់ចុះជាលើកដំបូងក្នុងរយៈពេល ៤០ឆ្នាំ ដោយការផ្ទុះឡើងវិញនៃជំងឺកូវីដ-១៩ ក្រោយពីដកចេញនូវគោលនយោបាយ «សូន្យកូវីដ»។
លោកស្រីបន្តថា៖ «ករណីនេះមិនធ្លាប់មានពីមុនមកទេ ហើយនៅឆ្នាំក្រោយ [២០២៣] សម្រាប់រយៈពេល៣, ៤, ៥, ឬ៦ខែ ការបន្ធូរបន្ថយវិធានការទប់ស្កាត់ជំងឺកូវីដ-១៩ នឹងនៅតែជាបញ្ហាចោទនៅទូទាំងប្រទេសចិន។ ខ្ញុំនៅទីក្រុងមួយក្នុងប្រទេសចិន កាលពីសប្តាហ៍មុន ជាកន្លែងដែលមានវិធានការ “សូន្យកូវីដ” ត្រូវបានដាក់ចេញ។ ប៉ុន្តែនោះមិនទាន់ចប់នៅឡើយទេ នៅពេលដែលប្រជាជនចិនចាប់ផ្តើមធ្វើដំណើរ»។
លោកស្រី Georgieva បាននិយាយថា លោកស្រីរំពឹងថា កំណើនសេដ្ឋកិច្ចរបស់ប្រទេសចិននឹងប្រសើរឡើងនៅចុងឆ្នាំនេះ ប៉ុន្តែលោកស្រីព្រួយបារម្ភថា វិបត្តិនេះនឹងមានរយៈពេលវែង។
លោកស្រីបន្ថែមថា៖ «មុនពេលមានជំងឺកូវីដ-១៩ កំណើនសេដ្ឋកិច្ចរបស់ចិនមានចំនួន ៣៤, ៣៥, ៤០ ភាគរយ នៃកំណើនពិភពលោក តែពេលនេះមិនដូចមុនឡើយ។ វាពិតជាមានការលំបាកសម្រាប់ […] សេដ្ឋកិច្ចនៅតំបន់អាស៊ី។ ពេលខ្ញុំនិយាយជាមួយមេដឹកនាំបណ្តាប្រទេសអាស៊ី ពួកគេសួរថា “តើនឹងមានអ្វីកើតឡើងចំពោះប្រទេសចិន? តើប្រទេសចិននឹងវិលទៅរកកំណើនសេដ្ឋកិច្ចដូចកាលពីមុន?”»។
លោកស្រីបន្តថា ទន្ទឹមនឹងនេះដែរ សហភាពអឺរ៉ុបបានរងផលប៉ះពាល់យ៉ាងខ្លាំងដោយសង្គ្រាមនៅអ៊ុយក្រែន ដោយពាក់កណ្តាលនៃប្លុកនេះត្រូវបានព្យាករថានឹងស្ថិតក្នុងវិបត្តិសេដ្ឋកិច្ចនៅឆ្នាំនេះ [២០២៣]។
ទោះយ៉ាងណា ប្រធាន IMF រូបនេះ និយាយថា សេដ្ឋកិច្ចរបស់សហរដ្ឋអាមេរិកនឹងអាចងើបផុតពីវិបត្តិនៅឆ្នាំនេះ។
លោកស្រីបានមានប្រសាសន៍ថា៖ «សហរដ្ឋអាមេរិកមានភាពធន់មាំបំផុត ហើយនឹងអាចចៀសផុតពីវិបត្តិសេដ្ឋកិច្ច»។