សមត្ថកិច្ចខេត្តបន្ទាយមានជ័យ បានចាប់ផ្ដើមវាយកម្ទេចអគារកាស៊ីណូហ្គ្រេនដាយមិន ដែលត្រូវអគ្គិភ័យឆាបឆេះកាលពីចុងឆ្នាំ២០២២ ក្រោយបិទបញ្ចប់ការរុករក និងស្រាវជ្រាវ។
ប្រធានមន្ទីរព័ត៌មានខេត្តបន្ទាយមានជ័យ លោក សេក សុខុម បានឱ្យដឹងនៅថ្ងៃអង្គារនេះថា ការវាយកម្ទេចកាស៊ីណូហ្គ្រេនដាយមិន បានចាប់ផ្តើមកាលពីថ្ងៃម្សិលមិញ ក្រោយសមត្ថកិច្ចបិទបញ្ចប់ការរុករក និងស្រាវជ្រាវលើករណីអគ្គិភ័យនេះរួច។ លោកបន្តថា ការវាយកម្ទេចអគារដែលឆេះនេះ គឺដើម្បីសាងសង់ថ្មី និងប្រញាប់បើកច្រកព្រំដែនដើម្បីឱ្យភ្ញៀវទេសចរអាចចេញ-ចូលបានដោយងាយស្រួលឡើងវិញ ក្រោយបានបិទជាបណ្ដោះអាសន្នមួយរយៈបន្ទាប់ពីការឆេះ។
លោកថា៖ «រាជរដ្ឋាភិបាលស្រូតវាយ និងផ្ដួលវាឱ្យអស់ទៅ ដើម្បីធ្វើឱ្យច្រកទ្វារអន្តរជាតិចេញ–ចូលឆ្លងកាត់ ព្រោះភ្ញៀវចេញចូលឆ្លងកាត់ វាពិបាក! ច្រកហ្នឹងរាល់ថ្ងៃ យើងពង្វាងអ្នកទេសចរឱ្យឆ្លងទៅច្រកខាងដើមពុទ្រា ហើយទំនិញធំៗឱ្យឆ្លងតាមច្រកស្ទឹងបត់។ អ៊ីចឹងការរៀបចំវាយហ្នឹងត្រូវហើយ គណៈកម្មការខេត្ត ក៏ដូចអ្នកបច្ចេកទេស វិស្វករទាំងអស់ហ្នឹង គេបានមកសិក្សាមើលអគារដែលភ្លើងឆេះខ្លាំង ត្រូវទៅទាញផ្ដួល ដើម្បីសាងសង់ថ្មី។ ធ្វើលើកនេះ ធ្វើឱ្យមានប្រព័ន្ធសុវត្ថិភាពត្រឹមត្រូវ ធ្វើឱ្យតាមស្ដង់ដារ»។
លោក សេក សុខុម បន្តថា ចំពោះសាកសពចំនួន៦នាក់ដែលមិនទាន់ស្គាល់អត្តសញ្ញាណ គឺមាន ៣នាក់ អាចជាជនជាតិខ្មែរ ដែលក្រុមគ្រួសារពួកគេកំពុងស្វែងរក។
លោក ឃឹម វង្ស ដែលមានភរិយាធ្វើការនៅក្នុងកាស៊ីណូហ្គ្រេនដាយមិន ប្រាប់វីអូឌីថា គិតមកដល់ថ្ងៃនេះ រូបលោកនៅមិនទាន់ទទួលបានដំណឹងពីសមត្ថកិច្ច ពាក់ព័ន្ធនឹងករណីបាត់ភរិយានៅឡើយទេ។
បុរសអាយុ៣១ឆ្នាំ និងមានកូន៣នាក់រូបនេះ បានលើកឡើងថា ភរិយារបស់លោកឈ្មោះ សម ស្រីមុំ ធ្វើការផ្នែកអនាម័យនៅកាស៊ីណូហ្គ្រេនដាយមិន ដោយទទួលបានប្រាក់ឈ្នួលជាង ២០០ដុល្លារក្នុងមួយខែ ហើយធ្វើការចាប់ពីម៉ោង៨យប់ ដល់ម៉ោង៨ព្រឹក។
ប្រធានអង្គការសិទ្ធិមនុស្សអាដហុក (Adhoc) លោក នី សុខា យល់ថា ការវាយកម្ទេចអគារកាស៊ីណូដែលឆេះនាពេលថ្មីៗនេះ ហាក់ដូចជាលឿនពេក ខណៈជនរងគ្រោះមួយចំនួនដែលបាត់ខ្លួន នៅមិនទាន់រកឃើញអត្តសញ្ញាណនៅឡើយ។
លោកថា៖ «ប្រសិនបើការរុករកហ្នឹងវាអស់ហើយ ការស្រាវជ្រាវហ្នឹងសព្វគ្រប់ និងមានតម្លាភាពត្រឹមត្រូវ អាហ្នឹងវាអត់មានបញ្ហាអីទេ ពីព្រោះ យើងវាយកម្ទេចទៅ ក៏ដើម្បីសាងសង់ថ្មី ប៉ុន្តែលុះត្រាណាតែមានការអស់មន្ទិលសង្ស័យ។ រឿងសំខាន់ គឺអ្នកដែលបាត់ខ្លួន ដែលបងប្អូនក្រុមគ្រួសារ ដែលមានការសង្ស័យ ហើយមិនទាន់ត្រូវបានរកឃើញ អាហ្នឹងវាជារឿងដែលសមត្ថកិច្ចគួរតែមានការបំភ្លឺឱ្យបានច្បាស់លាស់ចំពោះបញ្ហាហ្នឹងដែរ បើមិនអ៊ីចឹងទេ វាធ្វើឱ្យមានមន្ទិលសង្ស័យ ហើយវាកើតជារឿងផ្សេង»។
លោកសង្កេតឃើញថា ក្នុងរយៈពេលប៉ុន្មានឆ្នាំចុងក្រោយនេះ នៅកម្ពុជា អគារខ្ពស់ៗបានរីកដុះដាលច្រើន ហើយបញ្ហាក៏បានកើតឡើងច្រើនផងដែរ រួមទាំងករណីអគ្គិភ័យ។ លោកបន្តថា ករណីអគ្គិភ័យនៅកាស៊ីណូហ្គ្រេនដាយមិន ដែលមានកម្ពស់ច្រើនជាន់ និងបណ្តាលឱ្យមនុស្សជាង២០នាក់ស្លាប់នេះ ជាបទពិសោធមួយ ដែលសមត្ថកិច្ចត្រូវធ្វើការស៊ើបអង្កេត និងស្រាវជ្រាវចងក្រងជាឯកសារទុក ដើម្បីកុំឱ្យបញ្ហាទាំងអស់នេះកើតឡើងដដែលបន្តទៀត។
លោកថា៖ «រហូតដល់មានការឆេះ មិនអាចរំលត់បានទាន់ពេលវេលា បណ្ដាលឱ្យមានមនុស្សមិនអាចចេញរួចពីអគារទៅទៀត រហូតទៅដល់ស្លាប់ក្នុងអគារ។ នេះជារឿងមួយដែលយើងទុកជាមេរៀន ហើយកសាងនូវឯកសារច្បាស់លាស់។ ដើម្បីឱ្យកសាងឯកសារបានត្រឹមត្រូវ ច្បាស់លាស់ វាត្រូវឱ្យមានការស៊ើបអង្កេតឱ្យបានគ្រប់សព្វជ្រុងជ្រោយ និងឱ្យបានច្បាស់លាស់ដែរ អំពីរបាយការណ៍ស៊ើបអង្កេត ដើម្បីឱ្យយើងទុកជាមូលដ្ឋាន ធ្វើជាបទពិសោធ សម្រាប់កិច្ចការងារទៅក្រោយៗទៀត»។
លោក នី សុខា បន្ថែមថា៖ «ការងារទៅថ្ងៃក្រោយៗទៀត សមត្ថកិច្ចត្រូវយកអាហ្នឹង ដើម្បីជាមូលដ្ឋានក្នុងការពិនិត្យឱ្យបានម៉ត់ចត់ ចំពោះអ្នកដែលកសាងអគារក្ដី អ្នកដែលធ្វើទីតាំងកាស៊ីណូតទៅទៀតក្ដី មិនត្រឹមតែកាស៊ីណូ វាអាចមានទីតាំងផ្សេងៗដែលធំៗ ដែលមានមនុស្សចេញចូលច្រើន ត្រូវតែមានការធានាធ្វើម៉េចឱ្យការកសាងធានាសុវត្ថិភាពឱ្យបានត្រឹមត្រូវ»។
បើតាមរយៈឃ្លីបវីដេអូដែលត្រូវបានបង្ហោះនៅលើបណ្តាញសង្គម តាំងពីពាក់កណ្តាលអធ្រាត្រឈានចូលថ្ងៃទី២៩ ខែធ្នូ ឆ្នាំ២០២២ គេឃើញអាគារកាស៊ីណូដ៏ធំមួយឈ្មោះ ហ្គ្រេនដាយមិន ត្រូវបានភ្លើងឆាបឆេះចេញពីក្នុងអគារ និងទីបំផុតត្រូវបានភ្លើងលេបត្របាក់ស្ទើរតែទាំងស្រុង ហើយបណ្តាលឱ្យខូចខាតនូវអគារចំនួន៣ រួមមាន អគារក្រុមហ៊ុនហ្គ្រេនដាយមិនស៊ីធី ចំនួន២ និងក្រុមហ៊ុនកាស៊ីណូប៉ោយប៉ែតស៊ីធី ចំនួន១ថែមទៀតផង។ សមត្ថកិច្ចបញ្ជាក់ថា ការឆាបឆេះកាស៊ីណូនេះបានកើតឡើងដោយសារការឆ្លងចរន្តអគ្គិសនី។
បើតាមសមត្ថកិច្ច កាស៊ីណូដែលឆេះនោះបានបណ្ដាលឱ្យមនុស្សចំនួន២៦នាក់ស្លាប់ ក្នុងនោះសាកសពចំនួន២៥នាក់ត្រូវបានរកឃើញនៅកន្លែងកើតហេតុ និងម្នាក់ទៀតបានស្លាប់ក្រោយបញ្ជូនទៅព្យាបាលនៅមន្ទីរពេទ្យក្នុងប្រទេសថៃ។ សាកសពទាំង២៦នាក់នោះ រួមមាន ជនជាតិថៃ១៦នាក់ ម៉ាឡេស៊ីម្នាក់ នេប៉ាល់ម្នាក់ និង៧នាក់ទៀត មិនទាន់ស្គាល់អត្តសញ្ញាណ៕
