ប្រធានក្រុមជួយសង្គ្រោះជនរងគ្រោះក្នុងប្រតិបត្តិការឆបោកត្រូវបានដោះលែង បន្ទាប់ពីជាប់ពន្ធនាគាររយៈពេល១០ខែ

លោក Chen Baorong (ពាក់អាវ​ក្រហម) ​អំឡុង​អាហារ​ថ្ងៃត្រង់​ បន្ទាប់​ពី​ការ​ដោះលែង​លោក​នៅ​ថ្ងៃ​ទី​៣ ខែ​មករា ឆ្នាំ​២០២៣។ (Yan Huang/Cambodia News Today)

លោក ចេន បៅរ៉ុង (Chen Baorong) ជាពាណិជ្ជករជនជាតិចិន ដែលដឹកនាំប្រតិបត្តិការជួយសង្គ្រោះកម្មកររាប់រយនាក់ពីប្រតិបត្តិការឆបោកតាមអ៊ីនធឺណិតនៅកម្ពុជា ត្រូវបានដោះលែងពីពន្ធនាគារខេត្តព្រះសីហនុ កាលពីថ្ងៃចន្ទម្សិលមិញនេះ។

ភរិយា​របស់​លោក ចេន បៅរ៉ុង គឺ​អ្នកស្រី នាង ស្រី​លក្ខណ៍ អាយុ៣៨​ឆ្នាំ បាន​បញ្ជាក់​ពី​ការ​ដោះលែង​ស្វាមីរបស់អ្នកស្រីនៅ​រសៀល​ថ្ងៃ​ចន្ទ។

អ្នកស្រីបាននិយាយថា៖ «ខ្ញុំសប្បាយចិត្តដែលគាត់ [លោក ចេន បៅរ៉ុង] ត្រូវបានដោះលែង។ គាត់​បានមក​ជួប​ជុំ​គ្រួសារ​វិញ។ ខ្ញុំ​រីករាយ​ និង​រំភើប​ណាស់​ដែល​បាន​ឃើញ​ប្តី​របស់​ខ្ញុំ​ត្រលប់​មក​ផ្ទះវិញ»។

នៅ​ពេល​សួរ​ថា តើ​ស្វាមីរបស់អ្នកស្រីទទួល​បាន​យុត្តិធម៌​ឬ​យ៉ាងណា​នោះ អ្នកស្រី នាង ស្រី​លក្ខណ៍ ​ឆ្លើយ​ថា ​អ្នកស្រី​មិន​ដឹង​ទេ។ ទោះយ៉ាងណា ​អ្នកស្រី​បញ្ជាក់​ថា ជីវិត​របស់​អ្នកស្រី​ជួប​ការ​លំបាក​ក្នុង​អំឡុងពេលដែលស្វាមីរបស់អ្នកស្រីនៅ​ក្នុង​ពន្ធនាគារ​រយៈពេល១០ខែ។

អ្នកស្រីបន្ថែមថា៖ «គាត់​​ខំធ្វើការ​ដើម្បី​រក​ប្រាក់​ផ្គត់ផ្គង់​គ្រួសារ […] [ដូច្នេះ] ជីវិត​របស់​យើង​ជួប​ការ​លំបាក​ នៅពេលដែលគ្មានគាត់។ ខ្ញុំ​រំភើប​ពេក និយាយមិនចង់ចេញ រកគិតអ្វីមិនចេញ»។

លោក ចេន បៅរ៉ុង ដែលជាពាណិជ្ជករជនជាតិចិននៅក្នុងប្រទេសកម្ពុជាអស់រយៈពេលជាង២០ឆ្នាំមកហើយ បានដឹកនាំក្រុមអ្នកស្ម័គ្រចិត្តក្នុងការជួយសង្គ្រោះជនជាតិចិនដែលត្រូវបានជួញដូរ និងបង្ខំឱ្យធ្វើការក្រោមលក្ខខណ្ឌការងារដ៏អាក្រក់ក្នុងប្រតិបត្តិការឆបោក។ កម្មករបម្រើការក្នុងប្រតិបត្តិការឆបោកបានរាយការណ៍ថា មានការរំលោភបំពាន ការធ្វើទារុណកម្ម និងលក្ខខណ្ឌការងារដោយបង្ខំនៅទីតាំងប្រតិបត្តិការឆបោក ដែលភាគច្រើនមានទីតាំងនៅក្រុងព្រះសីហនុ។

លោក ចេន បៅរ៉ុង និងក្រុម​អ្នក​ស្ម័គ្រ​ចិត្តផ្សេងទៀតបានឆ្លើយ​តប​នឹង​ការអំពាវនាវសុំ​ជំនួយ​នៅ​លើ​បណ្តាញ​ប្រព័ន្ធ​ផ្សព្វផ្សាយ​សង្គម​របស់​ចិន ​និង​បណ្តាញសង្គមហ្វេសប៊ុក។

លោកត្រូវបានចាប់ខ្លួននៅរាជធានីភ្នំពេញ កាលពីខែកុម្ភៈ និងបញ្ជូនទៅកាន់ខេត្តព្រះសីហនុ បន្ទាប់ពីលោកបាននិយាយអំពីករណី «ទាសករលក់ឈាម» ដែលជនជាតិចិនម្នាក់បានអះអាងថា ឈាមរបស់គាត់ត្រូវបានបូមដើម្បីសងបំណុលថៅកែម្ចាស់ទីតាំងឆបោក។

លោក ចេន បៅរ៉ុង និងជំនួយការរបស់លោក គឺលោក ចេន ហ្សៅហ៊ូ (Chen Xiaohua) និងគ្រូពេទ្យម្នាក់នៅខេត្តព្រះសីហនុឈ្មោះ តាន់ ហ្សៅម៉ី (Tan Xiaomei) ត្រូវបានផ្តន្ទាទោសឱ្យជាប់ពន្ធនាគាររយៈពេល២ឆ្នាំ។ សាលា​ឧទ្ធរណ៍​ខេត្ត​ព្រះសីហនុ កាល​ពី​ខែ​ធ្នូ បាន​សម្រេច​ព្យួរ​ទោសលោក ចេន បៅរ៉ុង ដោយបន្ថយ​មកនៅត្រឹមតែ១០ខែ​ប៉ុណ្ណោះ។

អ្នកទាំងបីខាងលើត្រូវបានចោទប្រកាន់កាលពីខែមីនា ពីបទញុះញង់ឱ្យមានការរើសអើង ធ្វើសេចក្ដីប្រកាសមិនពិត ការជ្រៀតជ្រែកដោយខុសច្បាប់ក្នុងការបំពេញមុខងារសាធារណៈ និងការប្រើប្រាស់វិញ្ញាបនបត្រវិជ្ជាជីវៈដោយខុសច្បាប់។ លោក តាន់ ហ្សៅម៉ី (Tan Xiaomei) ត្រូវបានចោទប្រកាន់ថាជាអ្នកញុះញង់ និងធ្វើសេចក្ដីប្រកាសមិនពិត។

លោក ចេន បៅរ៉ុង ជំនួយការរបស់លោក គឺលោក ចេន ហ្សៅហ៊ូ (Chen Xiaohua) និងគ្រូពេទ្យឈ្មោះ តាន់ ហ្សៅម៉ី (Tan Xiaomei) ក៏ត្រូវបានដោះលែងកាលពីថ្ងៃចន្ទផងដែរ។ នេះបើយោងតាមប្រព័ន្ធផ្សព្វផ្សាយជាភាសាចិន។

បន្ទាប់ពីសំណុំរឿង «ទាសករលក់ឈាម» ធ្វើឱ្យមានការចាប់អារម្មណ៍ពីសារព័ត៌មានអន្តរជាតិ រដ្ឋាភិបាលកម្ពុជាបានស្នើឱ្យអាជ្ញាធរចិនជួយលុបបំបាត់ពាក្យចចាមអារ៉ាមនេះ និងជួយកម្ពុជាក្នុងការស្តារមុខមាត់របស់ខ្លួនឡើង​វិញលើឆាកអន្តរជាតិ៕


បកប្រែនិងសម្រួលចេញពីអត្ថបទដើមភាសាអង់គ្លេស៖ Chinese Scam Rescuer Released From Prison After 10 Months

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ