លោក ឃឹម វង្ស អាយុ៣១ឆ្នាំ មិនបានទទួលដំណឹងជាផ្លូវការអំពីអគ្គិភ័យនៅកាស៊ីណូក្រុងប៉ោយប៉ែតឡើយកាលពីសប្ដាហ៍មុន ឬអំពីភរិយារបស់លោកដែលបម្រើការនៅខាងក្នុងកាស៊ីណូនោះឡើយ ហើយលោកមិនបានឃើញភរិយារបស់លោកចាប់តាំងពីពេលនោះមក។
នៅមិនទាន់មានចំនួនអ្នកស្លាប់ជាជនជាតិខ្មែរដែលត្រូវបានបញ្ជាក់ជាផ្លូវការឡើយ ហើយការស្វែងរកសាកសពត្រូវបានបញ្ឈប់។
ទោះយ៉ាងណា អ្នកស្រី សម ស្រីមុំ ភរិយារបស់លោក ឃឹម វង្ស មិនបានត្រលប់មកផ្ទះវិញទេ ចាប់តាំងពីអ្នកស្រីធ្វើការវេនយប់នៅកាស៊ីណូ ហ្គ្រេនដាយមិន ក្រុងប៉ោយប៉ែត។ ក្រុមគ្រួសាររបស់លោក ឃឹម វង្ស និយាយថា ពួកគាត់មានអារម្មណ៍ថា គេមិនខ្វល់ខ្វាយចំពោះគ្រួសាររបស់គាត់ឡើយ ខណៈពួកគាត់ជួបជុំគ្នានៅគេហដ្ឋានរបស់ប្ដីប្រពន្ធទាំងពីរនេះកាលពីថ្ងៃសៅរ៍ បន្ទាប់ពីធ្វើពិធីបុណ្យតាមព្រះពុទ្ធសាសនាពេលព្រឹកដើម្បីបួងសួងឱ្យអ្នកស្រី សម ស្រីមុំ។
លោក ឃឹម វង្ស បានដឹងអំពីអគ្គិភ័យនោះនៅព្រឹកថ្ងៃព្រហស្បតិ៍ [ទី២៩ ខែធ្នូ ឆ្នាំ២០២២] លោកក៏ប្រញាប់ទៅកាស៊ីណូដើម្បីយកភរិយារបស់លោកមកផ្ទះ។ លោកបានឃើញភាពវឹកវរនៅទីនោះ ប៉ុន្តែមិនឃើញភរិយានៅទីនោះឡើយ។
ក្រុមគ្រួសាររបស់លោក ឃឹម វង្ស បានទៅសាលាក្រុង [ប៉ោយប៉ែត] ដើម្បីប្រគល់រូបថតភរិយារបស់លោកទៅអាជ្ញាធរដើម្បីជួយស្វែងរក។ ពួកគេបានទៅវត្តមួយនៅក្នុងមូលដ្ឋានដែលសាកសពត្រូវបានគេយកមករក្សាទុកនៅទីនោះ ហើយពួកគេបានឃើញរូបថតសាកសពមិនស្គាល់អត្តសញ្ញាណ ៤ ឬ ៥ នាក់ ដែលគេសង្ស័យថាជាជនជាតិខ្មែរ ប៉ុន្តែមិនឃើញសាកសពអ្នកស្រី សម ស្រីមុំ ឡើយ។
លោក ឃឹម វង្ស រម្លឹកថា៖ «គាត់ [អ្នកស្រី សម ស្រីមុំ] ពាក់អាវខ្មៅ»។
លោកបន្ថែមថា លោកមិនបោះបង់ចោលឡើយ។ លោកថា «យើងបួងសួងឱ្យគាត់ត្រលប់មកផ្ទះវិញ»។
កូនតូចៗទាំង៣នាក់របស់លោក ឃឹម វង្ស ប្តូរវេនគ្នាដេកលើអង្រឹង ហើយសម្លឹងមើលភ្ញៀវទៅលេងផ្ទះ។
អាជ្ញាធរខេត្តបានបញ្ជាក់ពីដំបូងថា អាចមានសាកសពរាប់សិបនាក់ជាប់គាំងនៅខាងក្នុង ប៉ុន្តែមន្ត្រីកំពុងពន្លឿនក្នុងការបិទបញ្ចប់ករណីនេះ។
នៅក្នុងសន្និសីទសារព័ត៌មានកាលពីព្រឹកថ្ងៃសៅរ៍ ប្រធានគណៈកម្មាធិការជាតិគ្រប់គ្រងគ្រោះមហន្តរាយ លោក គន់ គីម មានប្រសាសន៍ថា មនុស្ស ២៦នាក់បានស្លាប់ ដែលក្នុងចំណោមសាកសពទាំងនេះ ២៥នាក់ត្រូវបានរកឃើញ និងម្នាក់ទៀតបានស្លាប់នៅមន្ទីរពេទ្យប្រទេសថៃ។ សាកសពទាំង២៥នាក់នោះ រួមមាន ជនជាតិថៃ១៦នាក់ ម៉ាឡេស៊ីម្នាក់ នេប៉ាល់ម្នាក់ និង៧នាក់ទៀតមិនទាន់ស្គាល់អត្តសញ្ញាណ។
លោក គន់ គីម មានប្រសាសន៍ថា៖ «យើងសង្ស័យថាពួកគេ [សាកសព] មិនមែនជាជនជាតិខ្មែរឡើយ។ យើងសង្ស័យថាពួកគេទំនងជាជនជាតិថៃច្រើនជាង»។
លោក គន់ គីម បន្ថែមថា កិច្ចខិតខំប្រឹងប្រែងស្វែងរកជនរងគ្រោះត្រូវបានបញ្ឈប់ ដោយសារតែ «យើងបានស្វែងរកគ្រប់បន្ទប់ទាំងអស់» ទោះបីជាអាជ្ញាធរធ្លាប់បាននិយាយថា អគារនោះអាចប្រឈមនឹងការដួលរលំក៏ដោយ។
នៅក្នុងការពិភាក្សាអំពីរយៈពេលរក្សាទុកសាកសពដែលមិនស្គាល់អត្តសញ្ញាណ ដោយអាជ្ញាធរនិយាយថាតម្រូវឱ្យរក្សាទុក៤៥ថ្ងៃ លោក គន់ គីម សម្រេចបូជាសាកសពឱ្យបានឆាប់ ដោយសារកង្វះថវិកាដើម្បីរក្សាទុកសាកសពទាំងនោះឱ្យកក។
លោកបន្ថែមថា៖ «តើយើងបានលុយពីណាមកសម្រាប់សាំងឡាន? ក្នុងរយៈពេល៤៥ថ្ងៃ អ្នកដែលឈរជើងជាមួយរថយន្តដឹកទំនិញ និងអ្នកបើកបរនឹងត្រូវស្លាប់។»
តំណាងខាងភាគីថៃនិយាយនៅក្នុងសន្និសីទថា គ្រួសារជនជាតិថៃ៤នាក់កំពុងតាមរកសាច់ញាតិដែលបាត់ខ្លួន។
ប្រធានមន្ទីរព័ត៌មានខេត្តបន្ទាយមានជ័យ លោក សេក សុខុម ថ្លែងនៅថ្ងៃចន្ទនេះថា នៅសល់សាកសពមិនទាន់ស្គាល់អត្តសញ្ញាណចំនួន៦នាក់ទៀត ហើយ៣នាក់អាចជាជនជាតិខ្មែរ ដោយសារក្រុមគ្រួសារបានមកស្វែងរកពួកគេ។ លោកបន្ថែមថា ទីតាំងកាស៊ីណូកំពុងត្រូវបានរៀបចំសម្រាប់វាយកម្ទេច។
នៅគេហដ្ឋានរបស់លោក ឃឹម វង្ស សាច់ញាតិដែលនៅជុំវិញលោកលាន់មាត់ថា «គ្រួសារឆ្ងល់ថាតើមានអ្វីលាក់បាំង»។ ស្រ្តីចំណាស់ម្នាក់បន្ថែមថា «ប្រសិនបើអាជ្ញាធរពិតជាយកចិត្តទុកដាក់ មេឃុំគួរតែមកសួរនាំពីប្រជាពលរដ្ឋដែលធ្វើការនៅកាស៊ីណូ»។
សាច់ញាតិជាបុរសម្នាក់និយាយថា៖ «ពួកគេ [អាជ្ញាធរ] មិនខ្វល់ពីមនុស្សដែលបានបាត់ខ្លួននោះទេ»។
លោក ឃឹម វង្ស និយាយថា ភរិយារបស់លោកធ្វើការនៅជាន់ទីមួយនៃកាស៊ីណូ ប៉ុន្តែរហូតមកដល់ពេលនេះ ខាងកាស៊ីណូមិនទាន់ទាក់ទងមកលោកទេ។ លោកបន្តថា ស្ត្រីម្នាក់ដែលធ្វើការជាមួយអ្នកស្រី សម ស្រីមុំ ក៏បាត់ខ្លួនដែរ។
លោក ឃឹម វង្ស និយាយថា ភរិយារបស់លោកជាបុគ្គលិកអនាម័យ និងទទួលបានប្រាក់ឈ្នួលជាង២០០ដុល្លារក្នុងមួយខែ ធ្វើការចាប់ពីម៉ោង៨យប់ ដល់ម៉ោង៨ព្រឹក ដោយសម្អាតនៅជាន់ទី៣ នៃកាស៊ីណូ។ លោកបន្ថែមថា កាស៊ីណូបានផ្តល់ការងារ ប៉ុន្តែការអភិវឌ្ឍដែលកំពុងរីកដូចផ្សិតនៅជុំវិញក្រុងប៉ោយប៉ែតមាន «ហានិភ័យខ្ពស់»។ លោកឆ្ងល់ថាតើហេតុអ្វីបានជាកាស៊ីណូមិនអាចគ្រប់គ្រងអគ្គិភ័យបាន។
លោក ឃឹម វង្ស មានទឹកមុខមាំ ខណៈលោករៀបរាប់ថា ភរិយារបស់លោកមានឆន្ទៈមោះមុត។
លោកបាននិយាយថា៖ «គាត់ [អ្នកស្រី សម ស្រីមុំ] មានចិត្តសប្បុរស»។
លោកបន្ថែមថា៖ «ខ្ញុំកំពុងរង់ចាំដំណឹងរបស់ភរិយាខ្ញុំ»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ ‘I’m Waiting for My Wife’: Cambodian Victims of Poipet Fire Are Unaccounted for