ប្រធានាធិបតីហ្វីលីពីន លោក ហ្វឺឌីណាន់ ម៉ាកូស ជេអ (Ferdinand Marcos Jr) នឹងធ្វើដំណើរទៅកាន់ទីក្រុងប៉េកាំង សម្រាប់ដំណើរទស្សនកិច្ចរយៈពេល៣ថ្ងៃ ចាប់ពីថ្ងៃទី៣ ដល់ថ្ងៃទី៥ ខែមករា ឆ្នាំ២០២៣ ដោយក្នុងនោះ លោកក៏ត្រូវបានរំពឹងថានឹងជួបពិភាក្សាអំពីសកម្មភាពរបស់ទីក្រុងប៉េកាំងនៅក្នុងជម្លោះសមុទ្រចិនខាងត្បូង ក្នុងចំណោមប្រធានបទផ្សេងៗទៀតផងដែរ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងមុនពេលចាកចេញពីប្រទេស ប្រធានាធិបតីហ្វីលីពីនបានលើកឡើងថា រូបលោកក៏នឹងត្រូវជួបជាមួយប្រធានាធិបតីចិនលោក ស៊ី ជីនពីង ខណៈវានឹងក្លាយជាជំនួបទល់មុខគ្នាដោយផ្ទាល់ ជាលើកទី២ រវាងមេដឹកនាំនៃប្រទេសទាំងពីរ បន្ទាប់ពីកិច្ចប្រជុំកាលពីខែវិច្ឆិការបស់ពួកគេនៅក្នុងប្រទេសថៃ ហើយវាក៏កើតឡើងស្របពេលដែលហ្វីលីពីនបានលើកឡើងពីការព្រួយបារម្ភលើសកម្មភាពសាងសង់របស់ចិននៅក្នុងដែនទឹកនៃសមុទ្រចិនខាងត្បូងដែលមានជម្លោះផងដែរ។
ទាក់ទិននឹងជំនួបនេះដែរ អ្នកនាំពាក្យក្រសួងការបរទេសចិន លោក Wang Wenbin កាលពីថ្ងៃសុក្រកន្លងទៅ មិនបានលើកឡើងពីប្រធានបទសមុទ្រចិនខាងត្បូងឡើយ ខណៈលោកថា ដំណើរទស្សនកិច្ចនេះនឹងផ្តោតលើការផ្លាស់ប្តូរទស្សនៈស៊ីជម្រៅលើទំនាក់ទំនងទ្វេភាគី និងបញ្ហាតំបន់ និងអន្តរជាតិ ដែលជាកង្វល់រួម។
លោកបន្ថែមថា ជំនួបនឹងជំរុញកិច្ចសហប្រតិបត្តិការក្នុងវិស័យកសិកម្ម ហេដ្ឋារចនាសម្ពន្ធ ថាមពល និងវប្បធម៌ ដើម្បីបង្កើតឱ្យបាននូវ «យុគសម័យមាស» មួយ៕