សេតវិមាន បានឱ្យដឹងនៅថ្ងៃអង្គារម្សិលមិញថា ប្រធានាធិបតីអាមេរិក លោក ចូ បៃដិន នឹងជួបជាមួយនាយករដ្ឋមន្ត្រីជប៉ុនលោក ហ្វូមីអូ គីស៊ីដា (Fumio Kishida) នៅឯសេតវិមាន នៅថ្ងៃទី១៣ ខែមករា សប្ដាហ៍ក្រោយនេះ ដើម្បីពិភាក្សាលើប្រធានបទមួយចំនួនដែលទាក់ទងនឹងប្រទេសកូរ៉េខាងជើង អ៊ុយក្រែន ភាពតានតឹងរវាងចិនជាមួយតៃវ៉ាន់ និងឥណ្ឌូ-ប៉ាស៊ីហ្វិក ប្រកបដោយសេរីនិងបើកចំហ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ជាមួយគ្នានេះ ប្រភពដដែលបន្តថា មេដឹកនាំទាំងពីរក៏នឹងពិភាក្សាអំពីបញ្ហាក្នុងតំបន់ និងពិភពលោកជាច្រើន រួមទាំងករណីអាវុធប្រល័យលោកខុសច្បាប់ និងកម្មវិធីមីស៊ីលបាលិស្ទីករបស់សាធារណរដ្ឋប្រជាមានិតប្រជាធិបតេយ្យកូរ៉េ សង្គ្រាមដ៏ឃោរឃៅរបស់រុស្ស៊ីប្រឆាំងនឹងអ៊ុយក្រែន និងការរក្សាសន្តិភាពនិងស្ថិរភាពនៅទូទាំងច្រកសមុទ្រតៃវ៉ាន់ផងដែរ។
ជំនួបរវាងមេដឹកនាំនៃប្រទេសទាំង២នេះ ក្នុងការក្រោកឈរប្រឆាំងនឹងការកើនឡើងនៃឥទ្ធិពលរបស់ចិននេះ ក៏កើតឡើងស្របពេលដែលកូរ៉េខាងជើងបានបាញ់សាកល្បងម៉ីស៊ីលជាបន្តបន្ទាប់ និងគម្រោងបង្កើនចំនួនអាវុធនុយក្លេអ៊ែររបស់ខ្លួនឱ្យកាន់តែច្រើនជាងមុន ដែលបានធ្វើឱ្យសម្ពន្ធមិត្តអាមេរិកព្រួយបារម្ភនៅក្នុងតំបន់។
យោងតាមការរាយការណ៍កាលពីសប្តាហ៍មុនដោយកាសែតជប៉ុន យ៉ូមីយូរី (Yomiuri) ដោយដកស្រង់ប្រភពពីរដ្ឋាភិបាល បានឱ្យដឹងថា លោកនាយករដ្ឋមន្ត្រី ហ្វូមីអូ គីស៊ីដា ក៏គ្រោងនឹងពិភាក្សាអំពីគោលនយោបាយសន្តិសុខថ្មីរបស់ទីក្រុងតូក្យូ ទៅលើការកសាងយោធាដ៏ធំបំផុតរបស់ប្រទេសជប៉ុន ចាប់តាំងពីសង្គ្រាមលោកលើកទី២។
ទាក់ទិននឹងករណីនេះ សេតវិមានបានលើកឡើងថា លោក ចូ បៃដិន នឹងបញ្ជាក់សាជាថ្មីម្តងទៀតនូវការគាំទ្រពេញលេញរបស់លោក ចំពោះយុទ្ធសាស្ត្រសន្តិសុខជាតិរបស់ប្រទេសជប៉ុន ដែលទើបនឹងដាក់ចេញកាលពីពេលថ្មីៗនេះ។
គួរបញ្ជាក់ថា ក្នុងដំណើរទស្សនកិច្ចទៅកាន់ប្រទេសជប៉ុន កាលពីខែឧសភាកន្លងទៅ លោក ចូ បៃដិន ក៏ធ្លាប់បានថ្លែងកោតសរសើរចំពោះការប្តេជ្ញាចិត្តរបស់លោក ហ្វូមីអូ គីស៊ីដា ក្នុងការពង្រឹងសមត្ថភាពការពារជាតិរបស់ជប៉ុនផងដែរ។
ផែនការការពារជាតិ ក្នុងទំហំប្រាក់ចំនួន ៣២០ពាន់លានដុល្លារ របស់ជប៉ុន រួមមាន ការទិញមីស៊ីលដែលមានសមត្ថភាពវាយប្រហារចិន និងការត្រៀមខ្លួនក្នុងករណីដែលប្រទេសជាតិមានជម្លោះ ស្របពេលដែលមានការព្រួយបារម្ភថាការឈ្លានពានអ៊ុយក្រែនរបស់រុស្ស៊ីអាចជំរុញដល់ប្រទេសចិនឱ្យធ្វើសកម្មភាពប្រឆាំងនឹងតៃវ៉ាន់ ដែលជាប្រទេសជិតខាងរបស់ជប៉ុន៕