ប្រព័ន្ធផ្សព្វផ្សាយរដ្ឋរបស់ប្រទេសចិន ហាក់មិនសូវមានការយកចិត្តទុកដាក់ពីភាពធ្ងន់ធ្ងរនៃការកើនឡើងនៃការឆ្លងមេរោគកូវីដ-១៩ នៅក្នុងប្រទេស ខណៈអង្គការសុខភាពពិភពលោក (WHO) បាននិងកំពុងស្វែងរកព័ត៌មានលម្អិតអំពីការវិវត្តនៃមេរោគនេះ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
នៅក្នុងកិច្ចប្រជុំក្រុមប្រឹក្សាបច្ចេកទេសដែលធ្វើឡើងនៅថ្ងៃអង្គារម្សិលមិញ អង្គការ WHO ក៏បានស្នើឱ្យប្រទេសចិន ចែករំលែកទិន្នន័យស្តីពីការសម្រាកព្យាបាលនៅក្នុងមន្ទីរពេទ្យ ការស្លាប់ និងការចាក់វ៉ាក់សាំងនៅក្នុងប្រទេសផងដែរ។
ថ្លែងបន្ទាប់ពីកិច្ចប្រជុំ អ្នកនាំពាក្យរបស់អង្គការសុខភាពពិភពលោក បានលើកឡើងថា អង្គការរបស់ខ្លួននឹងចែករំលែកព័ត៌មាននៅពេលក្រោយ ដែលអាចនឹងត្រូវបានធ្វើឡើងនៅក្នុងសន្និសីទព័ត៌មានមួយនៅថ្ងៃពុធនេះ ដោយខ្លួនក៏រំពឹងថានឹងមានការពិភាក្សាលម្អិតមួយពីការចរាចរនៃវីរុសបំប្លែងខ្លួនថ្មីនៅក្នុងប្រទេសចិន និងទូទាំងពិភពលោកផងដែរ។
គួរបញ្ជាក់ថា ចិន កាលពីខែធ្នូកន្លងទៅ បានសម្រេចលុបចោលគោលនយោបាយកូវីដសូន្យរបស់ខ្លួន ដែលករណីនេះបានបណ្ដាលឱ្យសញ្ញាឆ្លងរីករាលដាលនៃជំងឺមួយនេះកំពុងតែចាប់ផ្ដើមហក់ឡើងវិញនៅក្នុងប្រទេស។
ទាក់ទិននឹងករណីនេះ បណ្ដាប្រទេសមួយចំនួន ដែលរួមមានសហរដ្ឋអាមេរិក កាណាដា បារាំង និងជប៉ុន ក្នុងពេលបច្ចុប្បន្នក៏បានតម្រូវឱ្យអ្នកដំណើរទាំងឡាយដែលមកពីប្រទេសចិន ត្រូវបង្ហាញលទ្ធផលអវិជ្ជមាននៃការធ្វើតេស្តកូវីដ-១៩ មុនពេលទៅដល់ប្រទេសរបស់ពួកគេផងដែរ។
ទោះជាយ៉ាងណា ប្រទេសចិន បានចេញមុខរិះគន់ចំពោះគោលការណ៍តម្រូវឱ្យមានការធ្វើតេស្តរកជំងឺកូវីដ-១៩ ដែលត្រូវបានកំណត់ដោយប្រទេសមួយចំនួននេះ សម្រាប់អ្នកដំណើរចេញពីទឹកដីរបស់ចិន ខណៈខ្លួនក៏បានព្រមានថាអាចនឹងចាត់វិធានការឆ្លើយតបផងដែរ។
គិតរហូតមកដល់ពេលបច្ចុប្បន្ន ចិនមានការឆ្លងវីរុសកូវីដ-១៩សរុប នៅក្នុងប្រទេសជិត២លានករណី ខណៈចំនួនអ្នកស្លាប់ដោយសារជំងឺកូវីដ-១៩ ដែលត្រូវបានបញ្ជាក់ជាផ្លូវការនៅក្នុងប្រទេសមួយនេះមានត្រឹមតែ ៥ ២៥៣នាក់ប៉ុណ្ណោះ ដោយវាត្រូវបានចាត់ទុកថាជាតួលេខដ៏ទាបមួយ បើធៀបនឹងចំនួនប្រជាជន ១,៤ពាន់លាននាក់របស់ខ្លួន៕
