ប្រធានាធិបតីចិន លោក ស៊ី ជីនពីង បានឱ្យដឹងនៅថ្ងៃពុធម្សិលមិញថា ប្រទេសចិនបានត្រៀមខ្លួនរួចជាស្រេចក្នុងការបន្តកិច្ចចរចាលើប្រេង ឧស្ម័ន និងការគ្រប់គ្រងបញ្ហាដែនសមុទ្រឡើងវិញ ជាមួយប្រទេសហ្វីលីពីន។ នេះបើយោងតាមទូរទស្សន៍រដ្ឋចិន ដែលត្រូវបានយកមកចុះផ្សាយដោយទីភ្នាក់ងារសារព័ត៌មាន Reuters។
ការលើកឡើងរបស់ប្រធានាធិបតីចិនបានធ្វើឡើង ខណៈរូបលោកជួបពិភាក្សាជាមួយនឹងប្រធានាធិបតីហ្វីលីពីន លោក ហ្វឺឌីណាន់ ម៉ាកូស ជេអ (Ferdinand Marcos Jr) ក្នុងអំឡុងដំណើរទស្សនកិច្ចរយៈពេល៣ថ្ងៃ ចាប់ពីថ្ងៃទី៣ ដល់ថ្ងៃទី៥ ខែមករា ឆ្នាំ២០២៣ នៅទីក្រុងប៉េកាំង។
គួរបញ្ជាក់ថា ជំនួបរវាងមេដឹកនាំនៃប្រទេសទាំងពីរ ក៏កើតឡើងស្របពេលដែលហ្វីលីពីនបានលើកឡើងពីការព្រួយបារម្ភលើសកម្មភាពសាងសង់របស់ចិន នៅក្នុងដែនទឹកនៃសមុទ្រចិនខាងត្បូងដែលមានជម្លោះផងដែរ។
ទាក់ទិននឹងករណីនេះ លោកប្រធានាធិបតី ហ្វឺឌីណាន់ ម៉ាកូស ជេអ បានថ្លែងប្រាប់អ្នកយកព័ត៌មានថា៖ «យើងក៏បានពិភាក្សាអំពីអ្វីដែលយើងអាចធ្វើបាន ក្នុងដំណើរការឆ្ពោះទៅមុខ ដើម្បីចៀសវាងកំហុស និងការយល់ច្រឡំណាមួយដែលអាចកើតមានឡើងបាន និងអាចបង្កឱ្យមានបញ្ហាធំជាងអ្វីដែលយើងមានរួចទៅហើយ»។
លោកបន្ថែមថា រូបលោកក៏បានទទួលការសន្យាពីសំណាក់លោកប្រធានាធិបតី ស៊ី ជីនពីង សម្រាប់ការសម្រុះសម្រួល និងដំណោះស្រាយ ដែលអាចអនុញ្ញាតឱ្យអ្នកនេសាទហ្វីលីពីនធ្វើប្រតិបត្តិការក្នុងដែននេសាទជាប្រវត្តិសាស្ត្ររបស់ពួកគេផងដែរ។
ថ្លែងប្រាប់លោក ម៉ាកូស នៅថ្ងៃពុធដដែលនេះ លោក ស៊ី ជីនពីង បានឱ្យដឹងថា ប្រទេសចិនមានឆន្ទៈក្នុងការរុករកធនធានប្រេង និងឧស្ម័នរួមគ្នានៅក្នុងតំបន់គ្មានជម្លោះនៃសមុទ្រ ក៏ដូចជាសហការជាមួយហ្វីលីពីនលើថាមពលពន្លឺព្រះអាទិត្យ ខ្យល់ និងបង្កើនការនាំចូលផលិតផលនេសាទ។
យោងតាមសេចក្តីថ្លែងការណ៍មួយដែលចេញដោយការិយាល័យប្រធានាធិបតីហ្វីលីពីន បានឱ្យដឹងថា ប្រទេសទាំងពីរ ក៏បានចុះហត្ថលេខាលើកិច្ចព្រមព្រៀងទ្វេភាគីចំនួន១៤ នៅក្នុងជំនួបកាលពីថ្ងៃពុធផងដែរ ដែលក្នុងនោះរួមទាំងកិច្ចព្រមព្រៀងលើវិស័យកសិកម្ម ហេដ្ឋារចនាសម្ពន្ធ កិច្ចសហប្រតិបត្តិការអភិវឌ្ឍន៍ សន្តិសុខដែនសមុទ្រ និងទេសចរណ៍។
ជាមួយគ្នានេះ ប្រធានាធិបតីចិន ក៏បានសន្យាផងដែរនូវកិច្ចសហប្រតិបត្តិការយ៉ាងទូលំទូលាយ ពីការគាំទ្រសម្រាប់ការវិនិយោគរបស់ចិនទៅកាន់ប្រទេសហ្វីលីពីន ដើម្បីជួយប្រទេសជិតខាងរបស់ខ្លួនក្នុងការអភិវឌ្ឍភូមិ និងបច្ចេកវិទ្យាកសិកម្ម ការអប់រំជាមូលដ្ឋាន ឧតុនិយម លំហអាកាស និងវ៉ាក់សាំងផងដែរ៕