មន្ត្រីបារាំង បានឱ្យដឹងនៅថ្ងៃពុធម្សិលមិញថា លោកប្រធានាធិបតី អេម៉ានុយអែល ម៉ាក្រុង (Emmanuel Macron) បានថ្លែងប្រាប់ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី តាមរយៈទូរសព្ទថា រដ្ឋាភិបាលរបស់លោកនឹងបញ្ជូនរថក្រោះប្រយុទ្ធធុនស្រាល AMX-10 RC ដើម្បីជួយឱ្យប្រទេសនេះអាចតទល់នឹងសង្គ្រាមប្រឆាំងនឹងការឈ្លានពានដោយរុស្ស៊ី។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ប្រភពដដែលបន្តថា៖ «សកម្មភាពនេះក៏ជាលើកទីមួយផងដែរ ដែលរថក្រោះផលិតដោយលោកខាងលិច ត្រូវបានបញ្ជូនជាជំនួយដល់កងទ័ពអ៊ុយក្រែន»។
ទោះជាយ៉ាងណា នៅពេលថ្លែងទៅកាន់អ្នកសារព័ត៌មាន មន្ត្រីរូបនេះមិនបានផ្តល់ព័ត៌មានលម្អិតអំពីចំនួន ឬពេលវេលាជាក់លាក់នៃការដឹកជញ្ជូនដែលបានគ្រោងទុកនោះទេ ដោយគ្រាន់តែបញ្ជាក់ថា ការពិភាក្សានឹងបន្តធ្វើឡើងទាក់ទងនឹងការបញ្ជូននេះ។
ជាការឆ្លើយតប លោក វ៉ូឡូឌីមៀ ហ្សេលេនស្គី បានថ្លែងអំណរគុណដល់ប្រធានាធិបតីបារាំង សម្រាប់ការប្រកាសនេះ ដោយវាពិតជាបានបង្ហាញពីតម្រូវការអាវុធរបស់អ៊ុយក្រែនពីប្រទេសដទៃទៀត។
លោកបន្ថែមថា៖ «យើងត្រូវបញ្ចប់ការឈ្លានពានរបស់រុស្ស៊ីឱ្យបាននៅក្នុងឆ្នាំនេះ ដោយក្នុងនោះ រថពាសដែកទំនើបៗ និងរថក្រោះដែលផលិតដោយលោកខាងលិច គឺពិតជារបស់ដ៏សំខាន់ដែលអ៊ុយក្រែនត្រូវការចាំបាច់»។
នៅក្នុងសេចក្តីថ្លែងការណ៍មួយដែលត្រូវបានបង្ហោះលើប្រព័ន្ធតេឡេក្រាម (Telegram) លោក វ៉ូឡូឌីមៀ ហ្សេលេនស្គី បានឱ្យដឹងផងដែរថា មេដឹកនាំទាំង២ ក៏បានយល់ព្រមលើកិច្ចសហប្រតិបត្តិការបន្ថែមទៀត ដើម្បីពង្រឹងការការពារដែនអាកាស និងសមត្ថភាពការពារផ្សេងទៀតរបស់យើងផងដែរ។
យោងតាមគេហទំព័រក្រសួងកងកម្លាំងប្រដាប់អាវុធបារាំង រថក្រោះប្រយុទ្ធធុនស្រាល AMX-10 RC ផលិតនៅប្រទេសបារាំង ដែលនឹងត្រូវផ្ដល់ជូនប្រទេសអ៊ុយក្រែននេះ ត្រូវបានស្គាល់ថាជាប្រភេទរថក្រោះមួយដែលមានការចល័តខ្ពស់ និងអាចដាក់មនុស្សបានចំនួន៤នាក់។
រុស្ស៊ី បានបើកការឈ្លានពានទ្រង់ទ្រាយធំរបស់ខ្លួនទៅលើអ៊ុយក្រែន តាមផ្លូវគោក ផ្លូវអាកាស និងសមុទ្រ កាលពីខែកុម្ភៈឆ្នាំមុន ដែលបានបង្កឱ្យជនស៊ីវិលរាប់ពាន់នាក់បានស្លាប់ តំបន់ទីក្រុងជាច្រើនប្រែក្លាយទៅជាគំនរបាក់បែក និងបង្កឱ្យមានជាវិបត្តិមនុស្សធម៌ធ្ងន់ធ្ងរកើតឡើង។
ទាក់ទិននឹងករណីនេះ បារាំង រួមនឹងបណ្ដាប្រទេសលោកខាងលិច ក៏បានខិតខំធ្វើសកម្មភាពជាច្រើនក្នុងការឆ្លើយតបជាអន្តរជាតិ ចំពោះការលុកលុយរបស់រុស្ស៊ីលើអ៊ុយក្រែន ដែលក្នុងនោះរួមមានការផ្តល់ជំនួយផ្នែកយោធា ការជំរុញឱ្យមានការដាក់ទណ្ឌកម្មធ្ងន់ធ្ងរបន្ថែមទៀតលើរុស្ស៊ី និងផ្តល់ការគាំទ្រផ្នែកហិរញ្ញវត្ថុផងដែរ៕
