សាលាដំបូងខេត្តកំពង់ឆ្នាំង បានកោះហៅសកម្មជនដីធ្លីចំនួន២នាក់នៅសហគមន៍ឡពាង ឱ្យចូលសវនាការនៅពាក់កណ្ដាលខែមករានេះ ពាក់ព័ន្ធរឿងជម្លោះដីធ្លីកាលពីឆ្នាំមុន នៅភូមិតាមល់លើ ឃុំកោះថ្កូវ ស្រុកជលគិរី ខេត្តកំពង់ឆ្នាំង។
ក្នុងដីកាកោះហៅចុះថ្ងៃទី២៨ ខែធ្នូ ឆ្នាំ២០២២ ដូចគ្នា ដែលវីអូឌីទើបទទួលបាននៅថ្ងៃព្រហស្បតិ៍នេះ តំណាងអយ្យការអមសាលាដំបូងខេត្តកំពង់ឆ្នាំង លោក ទេព មុនិន្ទ បានកោះហៅតំណាងសហគមន៍ឡពាង អ្នកស្រី អ៊ុំ សុភី និងលោក ស្ងួន ញឿន ឱ្យចូលសវនាការនៅថ្ងៃទី១៨ ខែមករា ឆ្នាំ២០២៣ ក្រោមបទចោទ «សមគំនិតក្នុងអំពើធ្វើឱ្យខូចខាតដោយចេតនា» ក្នុងរឿងជម្លោះដីធ្លីមួយកន្លែងស្ថិតក្នុងភូមិតាមល់លើ ឃុំកោះថ្កូវ ស្រុកជលគិរី កាលពីដើមឆ្នាំ២០២២។
តំណាងសហគមន៍ឡពាង អ្នកស្រី អ៊ុំ សុភី ប្រាប់វីអូឌីថា ករណីតុលាការចោទប្រកាន់ពួកគាត់នេះជារឿងមិនពិត និងអយុត្តិធម៌សម្រាប់ពួកគាត់ជាពលរដ្ឋក្រីក្រ និងរងគ្រោះដោយសាររឿងដីធ្លី។ អ្នកស្រីថា ពួកគាត់នឹងចូលទៅឆ្លើយបំភ្លឺនៅចំពោះមុខតុលាការ ដោយបានអះអាងថា ពួកគាត់មិនបានប្រព្រឹត្តកំហុសដូចការចោទប្រកាន់ឡើយ។
តំណាងសហគមន៍ឡពាងរូបនេះ អះអាងថា ក្រោយជម្លោះដីធ្លីនេះ គឺសមត្ថកិច្ចបានឃុំខ្លួនពួកគាត់បង្អត់បាយទឹក ៣ថ្ងៃ និងបានដកហូតសម្ភារមួយចំនួនដូចជា ទូរសព្ទដៃ និងម៉ូតូរបស់ពួកគាត់ ដែលរហូតមកដល់ពេលនេះ មិនទាន់បានប្រគល់ឱ្យវិញនៅឡើយទេ។
អ្នកស្រីបន្ថែមថា៖ «ថ្ងៃសវនាការ ពួកខ្ញុំនឹងទៅ ព្រោះពួកខ្ញុំមិនបានប្រព្រឹត្តអ្វីដូចតុលាការលោកចោទប្រកាន់ទេ។ ហើយខ្ញុំសង្ឃឹមថា តុលាការនឹងជួយរកយុត្តិធម៌ដល់ពួកខ្ញុំ ហើយផ្តល់សម្ភារទាំងអស់ហ្នឹងមកឱ្យពួកខ្ញុំវិញ ព្រោះខ្ញុំត្រូវការទូរសព្ទ និងម៉ូតូសម្រាប់ប្រើដឹកកូនទៅរៀន និងរកស៊ី»។
តំណាងសហគមន៍ឡពាងម្នាក់ទៀត លោក ស្ងួន ញឿន ឱ្យដឹងថា ពួកគាត់ជាប់បណ្តឹងនៅតុលាការនេះ កើតឡើងក្រោយពេលពួកគាត់ទៅថតរូបពីសកម្មភាពអ្នកភូមិមានជម្លោះដីធ្លី និងទីតាំងដីទំនាស់ ស្ថិតនៅភូមិតាមល់លើ ឃុំកោះថ្កូវ ស្រុកជលគិរី កាលពីខែកុម្ភៈ ឆ្នាំ២០២២ ដើម្បីផ្សព្វផ្សាយតាមបណ្តាញសង្គម។
លោកបន្តថា ក្នុងរឿងជម្លោះនោះ សមត្ថកិច្ចបានចាប់ខ្លួនពលរដ្ឋ ៣នាក់ មានរូបលោក អ្នកស្រី អ៊ុំ សុភី និងអ្នកស្រី ទួន សេង ប៉ុន្តែរូបលោក និងអ្នកស្រី អ៊ុំ សុភី ត្រូវបានដោះលែងដោយដាក់ឱ្យស្ថិតក្រោមការត្រួតពិនិត្យតាមផ្លូវតុលាការ ខណៈអ្នកស្រី ទួន សេង ត្រូវបានឃុំខ្លួនបណ្តោះអាសន្ននៅពន្ធនាគារអស់រយៈពេល៥ខែ។
លោក ស្ងួន ញឿន ចាត់ទុកករណីសមត្ថកិច្ចប្តឹងពួកគាត់ទៅតុលាការនេះ ថាជាការគំរាមកំហែងដល់ពួកគាត់ដែលសកម្មចូលរួមតវ៉ាទាមទារសិទ្ធិដីធ្លី។ លោកថា សមត្ថកិច្ចនៅស្រុកជលគិរី បានគំរាមកំហែង និងបានបង្ខិតបង្ខំឱ្យរូបលោក និងភរិយា ផ្តិតមេដៃទទួលកំហុស ទាំងមិនបានប្រព្រឹត្តកំហុស។
លោកបន្ថែមថា៖ «ពេលដែលខ្ញុំមិនផ្តិតមេដៃលើកំណត់ហេតុដែលសរសេរដោយសមត្ថកិច្ចនោះ ប៉ូលិសមួយនោះស្ទុះមកវាយខ្ញុំ គាត់និយាយថា អាហ្អែងអត់ព្រមផ្តិតមេដៃ អាហ្អែងចង់ម៉េច? អាហ្អែងចង់មើលងាយសមត្ថកិច្ច! ខ្ញុំថា ខ្ញុំអត់មើលងាយបងទេ តែបងសរសេរសំណុំរឿងមិនត្រឹមត្រូវ ព្រោះបងមិនបានអានសំណុំរឿងនោះឱ្យខ្ញុំស្តាប់ផង។ គាត់ថាខ្ញុំជាអ្នករួមគំនិត បើខ្ញុំអត់មានរួមគំនិតផង ឱ្យខ្ញុំផ្តិតមេដៃយ៉ាងម៉េច?»
យ៉ាងណា អធិការនគរបាលស្រុកជលគិរី លោក ហ៊ឹម យុង ធ្លាប់ប្រាប់វីអូឌីថា សមត្ថកិច្ចពិតជាចាប់ខ្លួនប្រជាពលរដ្ឋទាំងនោះ ពាក់ព័ន្ធរឿងបំផ្លិចបំផ្លាញទ្រព្យសម្បត្តិអ្នកដទៃ។
មេធាវីការពារក្តីឱ្យពលរដ្ឋទាំង៣នាក់នោះ គឺលោក ជូង ជូងី មានប្រសាសន៍ថា ការកាត់ក្តីកន្លងមក កូនក្តីរបស់លោកគួរតែរួចផុតពីការចោទប្រកាន់ទាំងស្រុង ដោយថា ការដាក់កូនក្តីរបស់លោកស្ថិតក្រោមការតាមដាន និងការចោទប្រកាន់នោះជារឿងមិនត្រឹមត្រូវឡើយ។ លោកបន្តថា រឿងក្តីនេះជារឿងរដ្ឋប្បវេណី ពាក់ព័ន្ធការដណ្តើមដីធ្លីគ្នារវាងអ្នកស្រី ទួន សេង និងភាគីម្ខាងទៀត ដោយមិនជាប់ពាក់ព័ន្ធជាមួយអ្នកស្រី អ៊ុំ សុភី និងលោក ស្ងួន ញឿន ឡើយ។
លោកបន្ថែមថា៖ «អាហ្នឹងបញ្ជាក់ថាមានភាពមិនប្រក្រតីរបស់មន្ត្រីអនុវត្តច្បាប់ ដែលគាត់ធ្វើអ៊ីចឹង ហើយគាត់អត់មានការទទួលខុសត្រូវ ហើយចៅហ្វាយនាយ ឬប្រធានស្ថាប័នរបស់គាត់អត់មានមើលកូនចៅរបស់ខ្លួនធ្វើការទេ ចេះតែពួយតែម្តង! ចាប់ប្រជាពលរដ្ឋទាំងបំពាន គេអត់មានខុសអីផង ហើយក៏ដាក់ឱ្យមានការទទួលខុសត្រូវទៀត។ នេះហើយជាការអនុវត្តច្បាប់នៅស្រុកយើងបច្ចុប្បន្ន»។
ពាក់ព័ន្ធរឿងនេះ មន្ត្រីសង្គមស៊ីវិលផ្នែកសិទ្ធិមនុស្សប្រចាំខេត្តកំពង់ឆ្នាំង លោក សំ ចាន់គា បានចាត់ទុកថាជាការគំរាមកំហែង និងជាការរំលោភលើសិទ្ធិសេរីភាពប្រជាពលរដ្ឋ ក្នុងការបញ្ចេញមតិ និងផ្សព្វផ្សាយព័ត៌មាន ដែលផ្ទុយពីច្បាប់រដ្ឋធម្មនុញ្ញកម្ពុជា។
មាត្រា៤១ នៃរដ្ឋធម្មនុញ្ញកម្ពុជា ចែងថា ប្រជាពលរដ្ឋខ្មែរមានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងបោះពុម្ពផ្សាយ និងសេរីភាពខាងជួបជុំ ជាដើម៕