ប្រទេសចិន នៅថ្ងៃព្រហស្បតិ៍ម្សិលមិញនេះ បានថ្លែងការពារវិធានការដោះស្រាយការផ្ទុះឡើងនៃជំងឺកូវីដ-១៩ ដ៏ខ្លាំងក្លារបស់ខ្លួន បន្ទាប់ពីប្រធានាធិបតីអាមេរិក លោក ចូ បៃដិន បានសម្តែងការព្រួយបារម្ភ ខណៈអង្គការសុខភាពពិភពលោក (WHO) លើកឡើងថា ទីក្រុងប៉េកាំង ហាក់លាក់បាំងពីចំនួនជាក់លាក់នៃអ្នកស្លាប់ដោយសារជំងឺនេះ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
យោងតាមលោក Michael Ryan ជានាយកទទួលបន្ទុកស្ថានការណ៍អាសន្ន នៃអង្គការសុខភាពពិភពលោក បានឱ្យដឹងកាលពីថ្ងៃទី៤ ខែមករា ថាមន្ត្រីសុខាភិបាលចិនហាក់មានការរាយការណ៍ទាបពីទិន្នន័យលើករណីឆ្លងរីករាលដាលនៃវីរុសកូវីដ-១៩ នៅក្នុងប្រទេស ដែលករណីនេះពិតជាបានបង្កឱ្យមានជាការព្រួយបារម្ភខ្លាំង។
ចិន ក្នុងប៉ុន្មានរយៈពេលចុងក្រោយនេះ ត្រូវបានសង្កេតឃើញថាមានសញ្ញានៃការឆ្លងរីករាលដាលនៃជំងឺកូវីដ-១៩ឡើងវិញខ្ពស់នៅក្នុងប្រទេស ដែលកើតឡើងបន្ទាប់ពីប្រទេសមួយនេះ កាលពីខែធ្នូកន្លងទៅ បានសម្រេចលុបចោលគោលនយោបាយកូវីដសូន្យរបស់ខ្លួន។
ទោះជាយ៉ាងណា ថ្លែងក្នុងសន្និសីទសារព័ត៌មានមួយនៅទីក្រុងប៉េកាំង អ្នកនាំពាក្យក្រសួងការបរទេសចិន លោកស្រី Mao Ning បានលើកឡើងថា ប្រទេសចិនបានចែករំលែកទិន្នន័យនៃវីរុសកូវីដ-១៩ ប្រកបដោយតម្លាភាព និងយ៉ាងឆាប់រហ័សជាមួយអង្គការសុខភាពពិភពលោក ដោយលោកស្រីក៏បានអះអាងថា ករណីជំងឺរាតត្បាតរបស់ប្រទេសចិន គឺស្ថិតនៅក្នុងស្ថានភាពដែលអាចគ្រប់គ្រងបាននៅឡើយ។
លោកស្រីបន្តថា៖ «ការពិតបានបង្ហាញឱ្យឃើញថា ប្រទេសចិនតែងតែអនុវត្តស្របតាមគោលការណ៍ច្បាប់ ប្រកបដោយភាពបើកចំហ និងតម្លាភាព ក៏ដូចជារក្សាទំនាក់ទំនងជិតស្និទ្ធ ចែករំលែកព័ត៌មាន និងទិន្នន័យពាក់ព័ន្ធជាមួយអង្គការសុខភាពពិភពលោក ទាន់ពេលវេលា»។
គួរបញ្ជាក់ថា អង្គការ WHO នៅក្នុងកិច្ចប្រជុំក្រុមប្រឹក្សាបច្ចេកទេស ដែលធ្វើឡើងកាលពីដើមសប្ដាហ៍នេះ ក៏បានស្នើឱ្យប្រទេសចិនចែករំលែកទិន្នន័យស្តីពីការសម្រាកព្យាបាលនៅក្នុងមន្ទីរពេទ្យ ការស្លាប់ និងការចាក់វ៉ាក់សាំងនៅក្នុងប្រទេសផងដែរ ខណៈខ្លួនរកឃើញថា ប្រទេសមួយនេះហាក់មិនសូវមានការយកចិត្តទុកដាក់ពីភាពធ្ងន់ធ្ងរនៃការកើនឡើងនៃការឆ្លងមេរោគកូវីដ-១៩ នៅក្នុងប្រទេស។
គិតរហូតមកដល់ពេលបច្ចុប្បន្ន ចិនមានការឆ្លងវីរុសកូវីដ-១៩សរុបនៅក្នុងប្រទេសជិត ២លានករណី ខណៈចំនួនអ្នកស្លាប់ដោយសារជំងឺកូវីដ-១៩ ដែលត្រូវបានបញ្ជាក់ជាផ្លូវការនៅក្នុងប្រទេសមួយនេះមានត្រឹមតែ ៥ ២៥៩នាក់ប៉ុណ្ណោះ ដោយវាត្រូវបានចាត់ទុកថាជាតួលេខដ៏ទាបមួយ បើធៀបនឹងចំនួនប្រជាជន ១,៤ពាន់លាននាក់របស់ខ្លួន៕
