ក្រសួងវប្បធម៌ និងវិចិត្រសិល្បៈ ស្នើសមត្ថកិច្ចចាត់វិធានការទប់ស្កាត់បណ្ដាញប្រព័ន្ធព័ត៌មានសង្គម ដែលបានយកបទចម្រៀងរ៉េបថ្មីរបស់យុវជន គា សុគន្ធ ដែលមានចំណងជើងថា «ឈាមបាតុករ» ដោយសំអាងហេតុថា បទចម្រៀងនេះអាចនឹងបង្កអសន្តិសុខសណ្ដាប់ធ្នាប់សង្គម។
នេះបើយោងតាមលិខិតមួយច្បាប់ចុះថ្ងៃទី៦ ខែមករា ឆ្នាំ២០២៣នេះ ដែលរដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា ផ្ញើទៅកាន់អគ្គស្នងការនគរបាលជាតិ លោក នេត សាវឿន។
ក្នុងលិខិតនោះ លោកស្រី ភឿង សកុណា អះអាងថា បច្ចុប្បន្ននេះ មាន Page (ទំព័រហ្វេសប៊ុក) នៅលើបណ្តាញសង្គមមួយចំនួនបានយកបទចម្រៀងអមដោយរូបភាព ក្រោមមចំណងជើងថា «ឈាមបាតុករ» មកផ្សព្វផ្សាយ។
លោកស្រីចាត់ទុកខ្លឹមសារបទចម្រៀងនោះថា មានរូបភាព «អុចអាល ញុះញង់ អាចនឹងបង្កអសន្តិសុខ សណ្តាប់ធ្នាប់ដល់សង្គម [ដែលជា]របស់អ្នកនិពន្ធទំនុកច្រៀង និងអ្នកច្រៀងឈ្មោះ គា សុគន្ធ ដែលធ្លាប់ត្រូវបានក្រសួងមហាផ្ទៃ ចាត់វិធានការបិទ និងផ្ដន្ទាទោសម្តងរួចហើយ មកផ្សព្វផ្សាយជាថ្មីឡើងវិញ»។
លោកស្រីបញ្ជាក់ថា ដើម្បីទប់ស្កាត់នូវភាពមិនប្រក្រតីដែលអាចនឹងកើតមានឡើងជាយថាហេតុ តាមរយៈបទចម្រៀងនេះ ក្រសួងស្នើអគ្គស្នងការនគរបាលជាតិ ពិនិត្យចាត់វិធានការនានាតាមនីតិវិធីច្បាប់។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន លើកឡើងថា គិតត្រឹមរសៀលថ្ងៃសុក្រនេះ លោកមិនទាន់ទទួលបានលិខិតស្នើសុំវិធានការនោះនៅឡើយទេ។
លោកថា៖ «ចំពោះវិធានការយ៉ាងណា ទាល់តែយើងខ្ញុំមើលឯកសារសិន។ អត់ឃើញឯកសារ ខ្ញុំមិនដឹងចាត់ការរបៀបម៉េចនៅឡើយទេ ចាំឃើញឯកសារសិន យើងនឹងអនុវត្តតាមនីតិវិធីជាក់ស្តែង»។
បទចម្រៀងនេះត្រូវបានគេផ្សព្វផ្សាយនៅថ្ងៃខួប ៩ឆ្នាំ នៃព្រឹត្តិការណ៍បង្ក្រាបដោយហិង្សាទៅលើកម្មករនៅផ្លូវវេងស្រេង កាលពីថ្ងៃទី៣ ខែមករា ឆ្នាំ២០១៤ ខណៈកម្មកររាប់រយនាក់ ពេលនោះបានចេញតវ៉ាទាមទារប្រាក់ឈ្នួលគោល១៦០ដុល្លារក្នុងមួយខែ។
ព្រឹត្តិការណ៍ហិង្សានៅពេលនោះបណ្តាលឱ្យមនុស្សមួយចំនួនបានស្លាប់ដោយគ្រាប់កាំភ្លើងរបស់សមត្ថកិច្ច ខណៈអ្នកខ្លះបាត់ខ្លួនរហូតបច្ចុប្បន្ន និងមនុស្សជាង២០នាក់ត្រូវបានចាប់ឃុំខ្លួន។
សង្គមស៊ីវិលយល់ថា ព្រឹត្តិការណ៍ដែលបានកន្លងផុតទៅរយៈពេល៩ឆ្នាំមកនេះ រដ្ឋាភិបាលជាអ្នកទទួលខុសត្រូវ នៅមិនទាន់ចាប់ជនដៃដល់មកផ្តន្ទាទោស ដើម្បីផ្តល់យុត្តិធម៌ឱ្យជនរងគ្រោះនៅឡើយទេ ។
យុវជន គា សុគន្ធ បានបដិសេធការចោទប្រកាន់របស់ក្រសួងវប្បធម៌ ដោយសំអាងដូច្នេះថា៖ «នៅនេះអត់ទាន់អីទេ [មិនទាន់ចាប់ខ្លួន] ប៉ុន្តែមិនដឹងថាវាយ៉ាងម៉េចតទៅទៀតទេ [បទចម្រៀងនេះថ្មី ឬចាស់?] បទថ្មី ទើបនឹងចេញបានពីរបីថ្ងៃ»។
ជាការកត់សម្គាល់ បទចម្រៀងនេះត្រូវបានគេចែកចាយនៅលើបណ្តាញសង្គម ខណៈអង្គការឃ្លាំមើលសិទ្ធិមនុស្សមួយចំនួនបានយកទៅផ្សព្វផ្សាយនៅលើទំព័រហ្វេសប៊ុករបស់ខ្លួនផងដែរ ក្នុងនោះមានទាំងអង្គការសង់ត្រាល់ និងអង្គការលីកាដូ។
នាយកចាត់ការទូទៅអង្គការការពារសិទ្ធិមនុស្សលីកាដូ លោក អំ សំអាត លើកឡើងថា វីដេអូដែលអង្គការលោកបានបង្ហោះនោះបានសរសេរខ្លឹមសារបញ្ជាក់ច្បាស់ពីគោលបំណង ដើម្បីជំរុញឱ្យរដ្ឋាភិបាលផ្តល់យុត្តិធម៌ឱ្យជនរងគ្រោះ ហើយថារូបភាពក្នុងវីដេអូជាបទចម្រៀងនេះក៏ជាព្រឹត្តិការណ៍ពិតដែលបានកើតឡើងនៅតាមបណ្តោយផ្លូវវេងស្រេង កាលពី៩ឆ្នាំមុនដែរ។
លោកថា៖ «ខ្ញុំគិតថា វាអត់មានចំនុចណាដែលយើងគិតថាវាញុះញង់ ឬក៏បង្ក[អសន្តិសុខសង្គម]ទេ ប៉ុន្តែផ្ទុយទៅវិញ គឺយើងចង់ឱ្យមានការស៊ើបអង្កេត និងការទប់ស្កាត់នៃទង្វើហ្នឹងកុំឱ្យកើតមានតទៅទៀត»។
ជនរងគ្រោះមួយរូបដែលត្រូវបានកងកម្លាំងប្រដាប់អាវុធវាយនឹងដំបងរឹង ត្រូវចំក្បាលហូរឈាមស្រោចខ្លួន នៅមុនពេលចាប់ឃុំខ្លួន គឺប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ ចាត់ទុកការចោទប្រកាន់របស់ក្រសួង ថាជាការមើលរំលងការពិត មិនបានជួយជំរុញយុត្តិធម៌ដល់ជនរងគ្រោះទេ។
លោកថា៖ «ករណីហ្នឹងក្រសួងគួរតែផ្តល់យុត្តិធម៌ គួរផ្តល់ពានរង្វាន់ដល់អ្នកដែលតាក់តែងបទចម្រៀងអ្នកដែលច្រៀង អ្នកដែលខំរក្សាទុកឯកសាររឿងពិតក្នុងសង្គម ត្រូវផ្តល់រង្វាន់ឱ្យគាត់ថែមទៀត ហើយត្រូវដាក់ទោសទណ្ឌទៅលើអ្នកណាដែលប្រើហិង្សាទៅលើកម្មករ»។
ជុំវិញបញ្ហានេះ ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ យល់ថា ក្នុងសង្គមប្រជាធិបតេយ្យ សេរីភាពបញ្ចេញមតិត្រូវបានការពារដោយរដ្ឋធម្មនុញ្ញ ហើយថាសិល្បៈចម្រៀងជាផ្នែកមួយនៃសេរីភាពបញ្ចេញមតិ ដើម្បីកែលម្អសង្គមដែរ។
លោកយល់ថា បើសិនមានចំណាត់ការណាមួយលើអ្នកបញ្ចេញមតិដោយសន្តិវិធី ដើម្បីជំរុញឱ្យមានយុត្តិធម៌សង្គម នោះវានឹងបង្ហាញថា នគរបាលយុត្តិធម៌អនុវត្តផ្ទុយពីស្មារតីរដ្ឋធម្មនុញ្ញ។
យុវជន គា សុគន្ធ ជាតារាចម្រៀងរ៉េប មានស្រុកកំណើតនៅខេត្តសៀមរាប ត្រូវបានសមត្ថកិច្ចចាប់ខ្លួនកាលពីខែកញ្ញា ឆ្នាំ២០២០ ពាក់ព័ន្ធនឹងទំនុកច្រៀងរិះគន់បញ្ហាអយុត្តិធម៌សង្គម និងបញ្ហាព្រំដែន។
ប៉ុន្តែយុវជនវ័យ២៤ឆ្នាំរូបនេះ ត្រូវបានដោះលែងវិញកាលពីខែកញ្ញា ឆ្នាំ២០២១ ក្រោយពីបានអនុវត្តទោសជាប់ពន្ធនាគារអស់រយៈពេល១ឆ្នាំ ក្នុងចំណោមទោស ១ឆ្នាំ ៨ខែ ដែលតុលាការខេត្តសៀមរាបបានកាត់ទោសយុវជនរូបនេះពីបទ «ញុះញង់»។
ដោយឡែក ព្រឹត្តិការណ៍បង្ក្រាបកម្មករតវ៉ានៅតាមបណ្តោយផ្លូវវ៉េងស្រេង ដោយប្រើគ្រាប់កាំភ្លើង បានបណ្ដាលឱ្យកម្មករ៤នាក់ស្លាប់ ម្នាក់បាត់ខ្លួន និងជិត៤០នាក់រងរបួស ខណៈមនុស្ស២៣នាក់ត្រូវតុលាការចោទពីបទ បង្កហិង្សា និងបំផ្លិចបំផ្លាញទ្រព្យសម្បត្តិដោយចេតនា ប៉ុន្តែមកដល់ពេលនេះ រដ្ឋាភិបាលនៅមិនទាន់ផ្តល់យុត្តិធម៌ដល់ជនរងគ្រោះនៅឡើយទេ៕