សង្គមស៊ីវិលមួយចំនួនដែលសកម្មក្នុងការឃ្លាំមើលសិទ្ធិមនុស្ស និងការងារ ព្រមលុបវីដេអូចម្រៀងរ៉េបថ្មីរបស់យុវជន គា សុគន្ធ ដែលមានចំណងជើងថា «ឈាមបាតុករ» ចេញពីបណ្តាញសង្គមហ្វេសប៊ុក និងគេហទំព័ររបស់ខ្លួន បន្ទាប់ពីសមត្ថកិច្ចបានកោះហៅពួកគេឱ្យចូលបំភ្លឺពាក់ព័ន្ធរឿងនេះ និងស្នើឱ្យលុបចោលវីដេអូចម្រៀងនោះ ក្រោមហេតុផលថា បទចម្រៀងនេះអាចនឹងបង្កអសន្តិសុខសណ្ដាប់ធ្នាប់សង្គម។
បទចម្រៀងរ៉េបថ្មីរបស់យុវជន គា សុគន្ធ ដែលមានចំណងជើងថា «ឈាមបាតុករ» ដែលជាបទចម្រៀងរម្លឹកពីព្រឹត្តិការណ៍បង្ក្រាបដោយហិង្សាពីសំណាក់សមត្ថកិច្ចទៅលើក្រុមបាតុករដែលធ្វើបាតុកម្មដោយអហិង្សាលើផ្លូវវេងស្រេង ទាមទារដំឡើងប្រាក់ខែគោល១៦០ដុល្លារ កាលពីដើមឆ្នាំ២០១៤។
នាយកប្រតិបត្តិ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា បានថ្លែងប្រាប់អ្នកសារព័ត៌មាន បន្ទាប់ពីលោកជួបជាមួយសមត្ថកិច្ចនៅអគ្គស្នងការដ្ឋាននគរបាលជាតិ នាព្រឹកថ្ងៃអង្គារថា សមត្ថកិច្ចបានសួរនាំគាត់ពាក់ព័ន្ធនឹងវីដេអូចម្រៀងរ៉េបថ្មីរបស់យុវជន គា សុគន្ធ ដែលមានចំណងជើងថា «ឈាមបាតុករ» ដោយសមត្ថកិច្ចសំអាងហេតុថា វីដេអូចម្រៀងនេះអាចនឹងបង្កអសន្តិសុខសណ្ដាប់ធ្នាប់សង្គម។
លោកបញ្ជាក់ថា ក្រោយពីសមត្ថកិច្ចសាកសួរចប់ សមត្ថកិច្ចក៏បានស្នើសុំឱ្យអង្គការរបស់លោកលុបវីដេអូចម្រៀងដែលបង្ហោះនៅលើបណ្តាញសង្គមនិងគេហទំព័ររបស់ខ្លួនចេញវិញ។ យ៉ាងណា លោកថា មិនជំទាស់នឹងការស្នើសុំរបស់សមត្ថកិច្ចនោះទេ ប៉ុន្តែលោកនៅតែអះអាងថា បទចម្រៀងដែលបង្ហោះនៅលើគេហទំព័ររបស់ខ្លួនមិនប៉ះពាល់ដល់អសន្តិសុខសង្គមនោះទេ។
លោកមានប្រសាសន៍ថា៖ «ដោយសារតែអាជ្ញាធរគាត់យល់ឃើញអ៊ីចឹង យើងក៏សម្រេចចិត្តដកទៅចុះ ក៏ប៉ុន្តែខ្ញុំសុំរក្សានូវគោលបំណង៣ គោលបំណងសំខាន់ ត្រូវធ្វើការស៊ើបអង្កេតឱ្យច្បាស់លាស់ មានតម្លាភាព ឱ្យមានការចូលរួមពីភាគីពាក់ព័ន្ទទាំងអស់ ដើម្បីលុបចោលនូវការសង្ស័យគ្នាថាអ្នកនេះ អ្នកនោះ។ មួយទៀត សុំកុំឱ្យយកហិង្សាទៅដោះស្រាយបញ្ហា។ ហើយទី៣ សេរីភាពបញ្ចេញ[មតិ]ត្រូវបានធានាដោយរដ្ឋធម្មនុញ្ញ»។
ក្នុងលិខិតកោះហៅរបស់អគ្គស្នងការដ្ឋាននគរបាលជាតិ ដែលវីអូឌីទទួលបាន ឱ្យដឹងថា សមត្ថកិច្ចបានកោះហៅមន្ត្រីសិទ្ធិមនុស្សចំនួន ៤នាក់ ឱ្យចូលបំភ្លឺនៅអគ្គស្នងការដ្ឋាន រួមមាន លោក អំ សំអាត នាយកកិច្ចការទូទៅអង្គការលីកាដូ ដែលបានចូលបំភ្លឺនៅថ្ងៃទី៩ ខែមករា។ បន្ថែមពីនេះ កោះហៅលោក មឿន តុលា នាយកប្រតិបត្តិ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ រួមទាំង លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ដែលត្រូវចូលបំភ្លឺនៅថ្ងៃទី១០ ខែមករា ខណៈលោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា (CCFC) ត្រូវចូលបំភ្លឺនៅថ្ងៃទី១១ ខែមករា។ ការកោះហៅមន្ត្រីសង្គមស៊ីវិលទាំង៤រូបនេះ ពាក់ព័ន្ធនឹងរឿងបង្ហោះគាំទ្របទចម្រៀងរ៉េបថ្មីរបស់យុវជន គា សុគន្ធ ដែលមានចំណងជើងថា «ឈាមបាតុករ» ។
នៅលើទំព័រហ្វេសប៊ុករបស់អង្គការលីកាដូ ដែលបានបង្ហោះខ្លឹមសារនៅថ្ងៃទី១០ ខែមករា ថា កាលពីថ្ងៃចន្ទ មន្ត្រីនគរបាល នៃស្នងការដ្ឋាននគរបាលរាជធានីភ្នំពេញ បានកោះហៅនាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត សាកសួរពាក់ព័ន្ធនឹងវីដេអូចម្រៀងដែលមានចំណងជើងថា “ឈាមបាតុករ” ។ អំឡុងពេលសាកសួរ សមត្ថកិច្ចបានប្រាប់ឱ្យលោក អំ សំអាត លុបវីដេអូចម្រៀងនោះចេញពីបណ្តាញសង្គម និងគេហទំព័ររបស់ខ្លូន បើពុំលុបទេ សមត្ថកិច្ចនឹងចាត់វិធានការតាមផ្លូវច្បាប់។
ករណីនេះ អង្គការលីកាដូ បានលុបវីដេអូចម្រៀងនោះចេញពីបណ្តាញសង្គមរបស់អង្គការ កាលពីយប់ថ្ងៃទី៩ ខែមករា និងចេញពីគេហទំព័រនៅព្រឹកថ្ងៃអង្គារផងដែរ។
យ៉ាងណា អង្គការលីកាដូ នៅតែជឿជាក់យ៉ាងមុតមាំថា វីដេអូចម្រៀងនេះមិនមែនជាបទល្មើសញុះញង់នោះទេ ហើយផ្ទុយទៅវិញ ការចេញផ្សាយវីដេអូ គឺជាសេរីភាពក្នុងការបញ្ចេញមតិដែលត្រូវបានការពារដោយច្បាប់រដ្ឋធម្មនុញ្ញ។ អង្គការនេះនៅតែបន្តអំពាវនាវដល់អាជ្ញាធរធ្វើការស៊ើបអង្កេតដោយឯករាជ្យ ទៅលើអំពើហិង្សា ការស្លាប់ និងការបាត់ខ្លួនកម្មករ ដែលបានកើតឡើងកាលពីថ្ងៃទី៣ ខែមករា ឆ្នាំ២០១៤ ទប់ស្កាត់កុំឱ្យកើតមាននូវអំពើហិង្សាដ៏អាក្រក់ដូច្នេះបន្តទៀត និងបន្តប្រារព្ធខួបនៃអំពើហិង្សានៅលើផ្លូវវេងស្រេងនៅឆ្នាំក្រោយៗទៀត។
អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន មានប្រសាសន៍ថា ការលុបវីដេអូចម្រៀងរ៉េប «ឈាមបាតុករ» ចេញពីបណ្តាញសង្គមពីសំណាក់មន្ត្រីសង្គមស៊ីវិលដែលមានឈ្មោះកោះហៅនោះ ជារឿងល្អ ដោយបង្ហាញថា សង្គមស៊ីវិលទាំងនោះសហការបានល្អជាមួយសមត្ថកិច្ច។
លោកស្នើទៅមន្ត្រីអង្គការសង្គមស៊ីវិលទាំងអស់ មុននឹងធ្វើការបញ្ចេញមតិ ត្រូវគោរពតាមច្បាប់ កុំឱ្យប៉ះពាល់ដល់សិទ្ធិអ្នកដទៃ និងសង្គមជាតិ។
លោកមានប្រសាសន៍ថា៖ «យើងមានសេរីភាព តែធ្វើម៉េចការបញ្ចេញសេរីភាពរបស់យើងនេះ កុំឱ្យប៉ះពាល់ដល់សេរីភាពអ្នកដទៃ និងសិទ្ធិអ្នកដទៃ និងប៉ះពាល់ដល់បរិស្ថានសង្គមទាំងមូល។ ពេលខ្លះទៅ ការប្រើប្រាស់ពាក្យសម្តី ឬការចាក់ផ្សាយតាមបែបជាព័ត៌មាន ស្ពតខ្លីៗមួយចំនួន វាធ្វើឱ្យប៉ះពាល់ដល់បរិយាកាសសន្តិសុខសង្គម។ ជួនកាលធ្វើឱ្យមានការញុះញង់ រើសអើង មានការយល់ច្រឡំ»។
យ៉ាងណា ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ ដែលចូលបំភ្លឺនៅចំពោះសមត្ថកិច្ចនៅរសៀលថ្ងៃអង្គារ បានឱ្យដឹងថា លោកនឹងលុបវីដេអូបទចម្រៀងរ៉េបថ្មីរបស់យុវជន គា សុគន្ធ ដែលមានចំណងជើងថា «ឈាមបាតុករ» ចេញពីបណ្តាញសង្គម និងគេហទំព័រនៅថ្ងៃនេះ ប៉ុន្តែលោកនៅតែចាត់ទុកថា ការណ៍ដែលសមត្ថកិច្ចបង្ខំឱ្យគាត់លុបវីដេអូចេញនោះ ជាការរឹតត្បិតសេរីភាពបញ្ចេញមតិ ដែលផ្ទុយពីច្បាប់។
មន្ត្រីជាន់ខ្ពស់សមាគមការពារសិទ្ធិមនុស្សអាដហុក លោក ស៊ឹង សែនករុណា ចាត់ទុកសមត្ថកិច្ចកោះហៅមន្ត្រីសង្គមស៊ីវិលសាកសួរ ជុំវិញវីដេអូចម្រៀងរ៉េបថ្មីរបស់យុវជន គា សុគន្ធ ដែលមានចំណងជើងថា «ឈាមបាតុករ» ដោយសមត្ថកិច្ចសំអាងហេតុថា វីដេអូចម្រៀងនេះអាចនឹងបង្កអសន្តិសុខសណ្ដាប់ធ្នាប់សង្គម និងដាក់លក្ខខណ្ឌឱ្យមន្ត្រីសង្គមស៊ីវិលទាំងនោះលុបវីដេអូចេញពីបណ្តាញសង្គម និងគេហទំព័ររបស់ខ្លួន ជាការគំរាមកំហែង។
លោកមានប្រសាសន៍ថា៖ «បើសិនជាមានការរឹតត្បិតបែបនេះទៀត យើងមានការព្រួយបារម្ភថា បញ្ហារបស់សង្គមជាតិ រឿងពិត រឿងកើតឡើងជាក់ស្តែងនៅក្នុងសង្គមជាតិ ត្រូវបានបិទបាំង ដោយមិនហ៊ានបញ្ចេញនោះទេ ព្រោះដោយសារតែមានការកោះហៅ មានការយកទៅសាកសួរជាដើមនេះ ហើយតម្រូវឱ្យមានការលុបចេញ»។
លោកបន្ថែមថា៖ «អ៊ីចឹងបញ្ហាបញ្ចេញមតិរបស់សកម្មជនសង្គម ក៏ដូចជាក្រុមអង្គការសង្គមស៊ីវិល និងក្រុមសកម្មជននយោបាយផ្សេងៗ ហាក់ដូចជាចាប់ផ្តើមកាន់តែមានការរឹតរួម ហើយពោរពេញដោយការព្រួយបារម្ភ ការភ័យខ្លាចក្នុងការចាត់វិធានការពីអាជ្ញាធររដ្ឋាភិបាល តទៅថ្ងៃខាងមុខទៀត»។
យុវជន គា សុគន្ធ ជាតារាចម្រៀងរ៉េប មានស្រុកកំណើតនៅខេត្តសៀមរាប ត្រូវបានសមត្ថកិច្ចចាប់ខ្លួនកាលពីខែកញ្ញា ឆ្នាំ២០២០ ពាក់ព័ន្ធនឹងទំនុកច្រៀងរិះគន់បញ្ហាអយុត្តិធម៌សង្គម និងបញ្ហាព្រំដែន ជាដើម។
ប៉ុន្តែយុវជនវ័យ២៤ឆ្នាំរូបនេះ ត្រូវបានដោះលែងវិញកាលពីខែកញ្ញា ឆ្នាំ២០២១ ក្រោយពីបានអនុវត្តទោសជាប់ពន្ធនាគារអស់រយៈពេល១ឆ្នាំ ក្នុងចំណោមទោស ១ឆ្នាំ ៨ខែ ដែលតុលាការខេត្តសៀមរាបបានកាត់ទោសយុវជនរូបនេះពីបទ «ញុះញង់»។
ដោយឡែក ព្រឹត្តិការណ៍បង្ក្រាបកម្មករតវ៉ានៅតាមបណ្តោយផ្លូវវេងស្រេង ដោយប្រើកាំភ្លើងពិត បានបណ្ដាលឱ្យកម្មករ៤នាក់ស្លាប់ ហើយម្នាក់បាត់ខ្លួនរហូតមកទល់ពេលបច្ចុប្បន្ន និងជិត៤០នាក់រងរបួស ខណៈមនុស្ស២៣នាក់ត្រូវចាប់ខ្លួន ហើយតុលាការចោទប្រកាន់ពួកគេពីបទ «បង្កហិង្សា និងបំផ្លិចបំផ្លាញទ្រព្យសម្បត្តិដោយចេតនា» ប៉ុន្តែមកដល់ពេលនេះ រដ្ឋាភិបាលនៅមិនទាន់ផ្តល់យុត្តិធម៌ដល់ជនរងគ្រោះក្នុងព្រឹត្តិការណ៍នោះនៅឡើយទេ៕
