ប្រជាសហគមន៍បានបង្ហាញក្ដីព្រួយបារម្ភថា ប្រសិនបើផ្ទៃដីព្រៃសហគមន៍រតនរុក្ខា ដែលជាផ្នែកមួយនៃព្រៃសហគមន៍សង្ឃរុក្ខាវ័ន ទំហំជិត៥ ០០០ហិកតា ត្រូវបានកាត់ឆ្វៀលជូនទៅពលរដ្ឋពិតមែន នឹងធ្វើឱ្យបាត់បង់ព្រៃឈើ និងជម្រកសត្វព្រៃគ្រប់ប្រភេទដែលរស់នៅក្នុងតំបន់ការពារមួយនេះបន្ថែមទៀត។
ក្តីបារម្ភនេះ ក្រោយអគ្គនាយកដា្ឋនតំបន់ការពារធម្មជាតិ កាលពីថ្ងៃទី១១ ខែកុម្ភៈ ឆ្នាំ២០២២ បានស្នើទៅអភិបាលខេត្តឧត្តរមានជ័យ ឱ្យចាត់តាំងអភិបាលរងខេត្តទទួលបន្ទុក និងមន្ត្រីជំនាញ ដើម្បីចូលរួមចុះពិនិត្យទីតាំងកាត់ឆ្វៀលដីទំហំ៤ ៥០០ហិកតាពីព្រៃសហគមន៍រតនរុក្ខា ស្ថិតនៅភូមិកូនដំរី សង្កាត់សំរោង ក្រុងសំរោង ខេត្តឧត្តរមានជ័យ ប្រគល់ទៅឱ្យពលរដ្ឋចំនួន៤៣៦គ្រួសារដែលរស់នៅតំបន់នោះ។
លិខិតបន្តថា៖ «សេចក្ដីដូចមានចែងក្នុងកម្មវត្ថុខាងលើ ខ្ញុំសូមគោរពជម្រាបជូន ឯកឧត្ដមអភិបាល មេត្តាជ្រាបថា ក្រុមការងារក្រសួងបរិស្ថាន នឹងចុះពិនិត្យទីតាំងស្នើសុំកាត់ឆ្វៀលដីចំនួន៤ ៥០០ហិកតា ចេញពីសហគមន៍ព្រៃឈើរតនរុក្ខា និងសុំប្រើប្រាស់ដីធ្លីស្របច្បាប់សម្រាប់ប្រជាពលរដ្ឋចំនួន ៤៣៦គ្រួសារ ដែលកំពុងរស់នៅ និងអាស្រ័យផលជាក់ស្តែង»។
អតីតប្រធានព្រៃសហគមន៍សង្ឃរុក្ខាវ័ន លោក ប៊ុន សាលួត ព្រួយបារម្ភថា ប្រសិនបើមានការកាត់ឆ្វៀលដីព្រៃសហគមន៍រតនរុក្ខា ដែលជាផ្នែកមួយនៃព្រៃសហគមន៍សង្ឃរុក្ខាវ័នពិតមែន នឹងធ្វើឱ្យបាត់បង់ព្រៃឈើ និងជម្រករបស់សត្វព្រៃគ្រប់ប្រភេទដែលរស់នៅទីនោះតែម្តង។
តែយ៉ាងណា ប្រសិនបើសំណើកាត់ឆ្វៀលដីនេះកើតឡើងមែន លោកសង្ឃឹមថា នឹងបានដល់ដៃពលរដ្ឋសហគមន៍មូលដ្ឋានដែលចូលរួមការពារព្រៃឈើ មិនមែនឱ្យពលរដ្ឋនៅតំបន់ផ្សេង ឬអ្នកមានលុយមានអំណាចនោះទេ។
លោកថា៖ «បើយើងចេះគ្រប់គ្រងបាន យើងទុកគ្រប់គ្រងខ្លួនឯងទៅ។ ទីពីរ បើយើងគ្រប់គ្រងមិនបានទេ បានសេចក្ដីប្រកាសពីរដ្ឋាភិបាលហើយ យើងធ្វើតាមហ្នឹងទៅ។ អាហ្នឹងឱ្យស្រួលគ្រប់គ្រងរបស់យើងទៅ ទោះបីយើងបាត់បង់ដីមែន តែបានទៅប្រជាពលរដ្ឋ»។
ប្រធានព្រៃសហគមន៍សង្ឃរុក្ខាវ័ន ព្រះតេជព្រះគុណ ថូ ធូរស់ មានថេរដីកាថា ប្រសិនបើរដ្ឋាភិបាលសម្រចកាត់ដីព្រៃសង្ឃរុក្ខាវ័នមែន ទំហំនៃការបាត់បង់នៃព្រៃឈើនឹងកើនឡើង ហើយការកាប់បំផ្លាញព្រៃឈើនៅតំបន់ផ្សេងៗទៀតអាចនឹងកើតមានកាន់តែច្រើនផងដែរ។
ព្រះតេជព្រះគុណ មានថេរដីកាថា៖ «ការសម្បទានដីរបស់រដ្ឋាភិបាលនេះ អាចពាក់ព័ន្ធនឹងការបាត់បង់ដីសហគមន៍មួយចំនួន ជាពិសេសដែលស្ថិតនៅក្រោមការគ្រប់គ្រងរបស់ក្រសួងបរិស្ថាន។ អ៊ីចឹងបើពីមួយឆ្នាំទៅមួយឆ្នាំ យើងមានការកាត់ឆ្វៀល ឬសម្បទានដី ដែលធ្វើឱ្យបាត់បង់កំណើននៃការបាត់បង់ព្រៃឈើ»។
ប្រធានមន្ទីរបរិស្ថានខេត្តឧត្ដរមានជ័យ លោក ភួង លីណា បានលើកឡើងថា ដីព្រៃសង្ឃរុក្ខាវ័នចំនួន៤ ៥០០ហិកតា ទំនងជាត្រូវបានកាត់ឆ្វៀលតាមការស្នើសុំនោះមែន។
តែទោះជាយ៉ាងណា ប្រធានមន្ទីររូបនេះថានឹងមិនមានផលប៉ះពាល់ធនធានធម្មជាតិនោះទេ ប្រសិនបើមានការកាត់ឆ្វៀលមែននោះ ដោយសាររដ្ឋាភិបាលបានសិក្សាពីផលប៉ះពាល់រួចរាល់ហើយ។
លោកថា៖ «អត់ទាន់ច្បាស់ដែរ ប៉ុន្តែរដ្ឋាភិបាលបានចេញរួមគ្នា រដ្ឋាភិបាលបានចេញរួម ទៅលើការដាក់ជាតំបន់សហគមន៍ វាមិនមែនតែសង្ឃរុក្ខាវ័នតែមួយទេអាហ្នឹង មុននឹងការសម្រេចរបស់រដ្ឋាភិបាល គេបានចុះសិក្សា ត្រួតពិនិត្យ វាយតម្លៃរួចរាល់អស់ហើយ»។
ទោះបីជាយ៉ាងនេះក្តី មន្ត្រីសម្របសម្រួលគម្រោង នៃសមាគមបណ្ដាញយុវជនកម្ពុជា (CYN) លោក អូត ឡាទីន មានប្រសាសន៍ថា ប្រសិនបើមានការកាត់ឆ្វៀលដីព្រៃសហគមន៍សង្ឃរុក្ខាវ័នមែន នឹងធ្វើឱ្យទំហំព្រៃសហគមន៍កាន់តែរួមតូច ហើយបណ្តាលឱ្យប៉ះពាល់ដល់ធនធានធម្មជាតិនៅតំបន់នោះកាន់តែច្រើន។
បន្ថែមពីនេះ លោកបារម្ភថា ការកាត់ឆ្វៀលដីនេះនឹងមិនបានដល់ដៃពលរដ្ឋនៅសហគមន៍មូលដ្ឋាននោះទេ តែផ្ទុយទៅវិញអាចនឹងផ្ទេរទៅឱ្យអ្នកមានលុយឬមានអំណាចច្រើនជាង។
លោកបន្តថា៖ «បើសិនបើការកាត់ឆ្វៀលនេះបានបម្រើដល់ប្រជាពលរដ្ឋ វាមិនជាបញ្ហាចោទទេ។ បញ្ហាចោទហ្នឹង គឺការកាត់ឆ្វៀលដីទៅឱ្យអ្នកដែលមានធនធានច្រើនរួចហើយ»។
ព្រៃសហគមន៍សង្ឃរុក្ខាវ័ន មានទំហំសរុបចំនួនជាង ៣ម៉ឺនហិកតា (៣០ ២៥៦) លាតសន្ធឹងក្នុងក្រុង-ស្រុកចំនួន៣ រួមមាន ក្រុងសំរោង ស្រុកចុងកាល់ និងស្រុកអន្លង់វែង ខេត្តឧត្ដរមានជ័យ។ កាលពីឆ្នាំ២០១៨ រាជរដ្ឋាភិបាលបានចេញអនុក្រឹត្យមួយរក្សាដីព្រៃសហគមន៍មួយនេះទុកជាដែនជម្រកសត្វព្រៃ ឬជាតំបន់ព្រៃការពារ ដែលមានឈ្មោះថា «សង្ឃរុក្ខាវ័នដែនជម្រកសត្វព្រៃ»៕