តុលាការអ៊ីរ៉ង់ បាននិយាយកាលពីថ្ងៃចន្ទថា ខ្លួនបានកាត់ទោសប្រហារជីវិតមនុស្ស៣នាក់ទៀតដែលត្រូវបានចោទប្រកាន់ពីបទបានសម្លាប់សមាជិកនៃកងកម្លាំងសន្តិសុខ ក្នុងអំឡុងពេលតវ៉ាចំពោះការស្លាប់របស់កញ្ញា ម៉ាហ្សា អាមីនី (Mahsa Amini)។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន CNA កាលពីថ្ងៃទី៩ ខែមករា ឆ្នាំ២០២៣។
ភាពចលាចលបានកើតឡើងទូទាំងប្រទេសអ៊ីរ៉ង់ ចាប់តាំងពីការស្លាប់របស់កញ្ញា ម៉ាហ្សា អាមីនី (Mahsa Amini) អាយុ២២ឆ្នាំ ដែលជាជនជាតិឃឺដ កាលពីថ្ងៃទី១៦ ខែកញ្ញា ឆ្នាំ២០២២ នៅក្នុងមន្ទីរឃុំឃាំង បន្ទាប់ពីការចាប់ខ្លួនកញ្ញាពីបទ រំលោភលើច្បាប់ស្តីពីសម្លៀកសម្រាប់ស្រ្តីរបស់អ៊ីរ៉ង់។
អាជ្ញាធរអ៊ីរ៉ង់ បាននិយាយថា មនុស្សរាប់រយនាក់ រួមទាំងសមាជិកនៃកងកម្លាំងសន្តិសុខ ត្រូវបានសម្លាប់ និងរាប់ពាន់នាក់ ត្រូវបានចាប់ខ្លួនក្នុងអំឡុងពេលបាតុកម្ម ដែលពួកគេពណ៌នាថាជា «កុបកម្ម»។
ទីក្រុងតេអេរ៉ង់ បានចោទប្រកាន់បណ្តាប្រទេសបរទេស និងក្រុមប្រឆាំង ថាបានបង្កភាពចលាចលនេះ។
យោងតាមគេហទំព័រផ្លូវការរបស់ខ្លួន ប្រធានតុលាការកំពូលរបស់ប្រទេសអ៊ីរ៉ង់ លោក អាយ៉ាតុលឡោះ អាលីខាមីណៃ (Ayatollah Ali Khamenei) បាននិយាយថា៖ «គោលដៅរបស់ប្រជាជនដែលមានវត្តមាននៅក្នុងកុបកម្ម មិនមែនដើម្បីយកឈ្នះលើភាពទន់ខ្សោយរបស់ប្រទេសនោះទេ ប៉ុន្តែដើម្បីបំផ្លាញភាពខ្លាំងរបស់ខ្លួន»។
លោកបន្ថែមថា៖ «ដោយគ្មានការសង្ស័យ សកម្មភាពទាំងនេះគឺជាអំពើក្បត់ជាតិ ហើយស្ថាប័នពាក់ព័ន្ធត្រូវដោះស្រាយបញ្ហានេះដោយភាពម៉ឺងម៉ាត់ និងយុត្តិធម៌»។
ការផ្ដន្ទាទោសប្រហារជីវិតនៅអ៊ីរ៉ង់ ក្នុងរយៈពេលថ្មីៗនេះ បានបង្កឱ្យមានកំហឹងជាសកល និងការដាក់ទណ្ឌកម្មថ្មីពីបស្ចិមប្រទេសប្រឆាំងនឹងទីក្រុងតេអេរ៉ង់។
យោងតាមអង្គការលើកលែងទោសអន្តរជាតិ (Amnesty International) ដែលមានមូលដ្ឋាននៅទីក្រុងឡុងដ៍ អ៊ីរ៉ង់គឺជាប្រទេសទីពីរ បន្ទាប់ពីប្រទេសចិន ក្នុងការអនុវត្តទោសប្រហារជីវិត ដោយយ៉ាងហោចណាស់មនុស្សចំនួន៣១៤នាក់ត្រូវបានប្រហារជីវិតនៅឆ្នាំ២០២១៕
