តំណាងអ្នកសារព័ត៌មានវីអូឌី (VOD) បានអះអាងថា ការរាយការណ៍ព័ត៌មានរបស់សហការីខ្លួន ស្ដីពីការធ្វើកូដកម្មរបស់ក្រុមកម្មករនៅរោងចក្រកាត់ដេរសម្លៀកបំពាក់ ហេន ស៊ើវេន អឹភែរឹល កាលពីពេលថ្មីៗនេះ មិនបានខុសទៅនឹងវិជ្ជាជីវៈ ពិសេសមិនបានចូលទៅក្នុងបរិវេណរោងចក្រ ដូចការចោទប្រកាន់របស់ភាគីក្រុមហ៊ុននោះឡើយ។
ការលើកឡើងនេះ ក្រោយពេលភាគីថៅកែរោងចក្រជាជនជាតិចិន ដែលតំណាងដោយមេធាវីរបស់ខ្លួន បានជូនដំណឹងមកស្ថាប័នវីអូឌី (VOD) ឱ្យសុំទោស និងផ្សាយកែតម្រូវឡើងវិញ ពាក់ព័ន្ធការផ្សាយបន្តផ្ទាល់តាមទំព័រហ្វេសប៊ុកផ្លូវការកាលពីថ្ងៃទី១២ ខែធ្នូ ឆ្នាំ២០២២ ជាបន្ទាន់ ដោយចោទថា ផ្សាយខុសពីការពិត។
ជាមួយគ្នានេះ ភាគីក្រុមហ៊ុន ហេន ស៊ើវេន អឹភែរឹល (HAND SEVEN APPAREL CO., LTD.) ថែមទាំងព្រមានចាត់វិធានការច្បាប់លើអ្នកសារព័ត៌មាន VOD ប្រសិនបើមិនសុំទោស និងកែតម្រូវឡើងវិញទេ។
នាយកស្ដីទីមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) និងជាតំណាងអ្នកយកព័ត៌មាន លោក អ៊ិត សូធឿត បានឆ្លើយតបថា តាមរយៈការសាកសួរទៅកាន់សហការីសាម៉ី និងពិនិត្យវីដេអូផ្សាយឡើងវិញនោះ បង្ហាញថា វីដេអូដែលបានរាយការណ៍ផ្ទាល់នោះ គឺនៅថ្ងៃទី១៥ ខែធ្នូ ឆ្នាំ២០២២ មិនមែនថ្ងៃទី១២ ខែធ្នូ ឆ្នាំ២០២២ ដូចក្នុងលិខិតរបស់មេធាវីតំណាងឱ្យភាគីរោងចក្រនោះទេ។
លោកបន្ថែមថា នៅពេលនោះ អ្នកយកព័ត៌មាន វីអូឌី បានរាយការណ៍ផ្ទាល់ជាវីដេអូនៅខាងមុខរោងចក្រតែប៉ុណ្ណោះ មិនមែននៅខាងក្នុងរោងចក្រដូចការលើកឡើងតាមលិខិតនោះទេ គ្រាន់តែអ្នករាយការណ៍ព័ត៌មានវីអូឌីបានច្រលំនិយាយថា ខ្លួនកំពុងតែផ្សាយផ្ទាល់ក្នុងរោងចក្រ។
លោកបន្តថា៖ «ការ Live [ផ្សាយផ្ទាល់]ហ្នឹង យើងLiveនៅខាងក្រៅរោងចក្រ គឺនៅតាមដងផ្លូវសាធារណៈទេ។ ហើយខ្ញុំចង់បញ្ជាក់កន្លែងនេះថា ប្រហែលជាគាត់អាចនិយាយនៅក្នុងសេចក្ដីរាយការណ៍ហ្នឹងច្រឡំ នៅពេលដែលគាត់ចាប់ផ្ដើមបើកក្បាលដំបូង គាត់និយាយថាកំពុងនៅក្នុងរោងចក្រ។ យើងអាចកែតម្រូវកន្លែងហ្នឹងតិច តែគាត់មិនបានចូលទៅក្នុងរោងចក្រនោះទេ»។
លោកបន្ថែមថា អ្នករាយការណ៍ព័ត៌មាន វីអូឌី បានគោរពនូវវិជ្ជាជីវៈរបស់ខ្លួន ដោយគ្រាន់តែទៅរាយការណ៍ព័ត៌មាននៅកន្លែងដែលកម្មករតវ៉ា និងសម្ភាសកម្មករនៅទីនោះ ដោយមិនបានបញ្ចេញបញ្ចូលអ្វីនោះឡើយ មិនមែនទៅធ្វើកូដកម្មជាមួយកម្មករនោះទេ។
លោកថា៖ «ខ្ញុំគិតថា គាត់[ភាគីរោងចក្រ]មានការយល់ច្រឡំ ឬគាត់មិនទាន់យល់ច្បាស់ពីតួនាទីអ្នកសារព័ត៌មាន នៅពេលដែលយើងចុះទៅយកព័ត៌មានផ្ទាល់។ យើងត្រូវមានវត្តមាននៅហ្នឹង យើងមិនបានចូលតវ៉ានោះទេ។ បើយើងចាត់ទុកថាអ៊ីចឹង អ្នកព័ត៌មានមិនដឹងធ្វើអីកើតទេ»។
លិខិតជូនដំណឹងរបស់មេធាវី លោក តេង បញ្ញារិទ្ធិ ដែលតំណាងឱ្យថៅកែរោងចក្រ ហេន ស៊ើវេន ចុះថ្ងៃទី២៩ ខែធ្នូ ឆ្នាំ២០២២ និងចុះហត្ថលេខាទទួលដោយតំណាងវីអូឌី នៅថ្ងៃទី៥ ខែមករា ឆ្នាំ២០២៣ បានប្រាប់ឱ្យអ្នកយកព័ត៌មានរបស់វិទ្យុសំឡេងប្រជាធិបតេយ្យ (VOD) សុំអភ័យទោស និងផ្សាយកែតម្រូវឡើងវិញជាបន្ទាន់ ពាក់ព័ន្ធការផ្សាយផ្ទាល់តាមទំព័រហ្វេសប៊ុកផ្លូវការរបស់ VOD និងបានសម្ភាសជាមួយកម្មករ-កម្មការិនី កាលពីថ្ងៃទី១២ ខែធ្នូ ឆ្នាំ២០២២ គឺខុសពីការពិតទាំងស្រុង។
លិខិតដដែលបានចោទប្រកាន់អ្នកយកព័ត៌មាន VOD ថាបានបំពានចូលក្នុងបរិវេណក្រុមហ៊ុន ដោយគ្មានការអនុញ្ញាត ដើម្បីថតរូបភាពនៅខាងក្នុងក្រុមហ៊ុន យកមកផ្សាយបង្ហាញជាសាធារណៈ ដោយថា ទង្វើទាំងនេះជារឿងខុសច្បាប់។
មេធាវីតំណាងឱ្យថៅកែរោងចក្រ អះអាងថា៖ «អំពើទាំងអស់ខាងលើរបស់លោក [អ្នកយកព័ត៌មាន [VOD] បានធ្វើឱ្យប៉ះពាល់សន្តិសុខ សណ្តាប់ធ្នាប់សាធារណៈ ពិសេសគឺបានធ្វើឱ្យប៉ះពាល់ធ្ងន់ធ្ងរដល់កិត្តិយស និងសេចក្តីថ្លៃថ្នូររបស់កូនក្តីខ្ញុំ ក្នុងឋានៈជានិយោជកនៃក្រុមហ៊ុន ដែលត្រូវបានការពារដោយច្បាប់។ ដូច្នេះ សូមលោកធ្វើការសុំអភ័យទោស និងផ្សាយកែតម្រូវឡើងវិញជាសាធារណៈ ពាក់ព័ន្ធនឹងការផ្សាយបន្តផ្ទាល់តាមរយៈបណ្តាញសង្គមហ្វេសប៊ុក នៃទំព័រហ្វេសប៊ុកផ្លូវការរបស់ VOD កាលពីថ្ងៃទី១២ ខែធ្នូ ឆ្នាំ២០២២ កន្លងមកនេះ ជាបន្ទាន់ មុនពេលវិធានការច្បាប់នានាត្រូវបានអនុវត្តបន្ត»។
លោក តេង បញ្ញារិទ្ធ ដែលជាមេធាវីតំណាងដោយអាណត្តិរបស់លោក Zhang Wenlong ជានាយកក្រុមហ៊ុន ហេន ស៊ើវេន អឹភែរឹល បានឆ្លើយតបថា ដោយសារតែកូនក្ដីរបស់ខ្លួនមិនបានបិទរោងចក្រ ឬបានបំបិទសិទ្ធិកម្មករអ្វីនោះទេ។ ហេតុដូច្នេះ លោកថា ប្រសិនបើអ្នករាយការណ៍ព័ត៌មាន វីអូឌី ពិតជាមិនបានធ្វើខុសវិជ្ជាជីវៈមែន ខាងក្រុមហ៊ុននឹងស្នើឱ្យមានការជជែកគ្នា។
លោកថា៖ «ឃើញថាការដែលផ្សាយហ្នឹង គឺធ្វើឱ្យប៉ះពាល់ដល់កិត្តិយស ប៉ះពាល់ដល់កិត្តិនាមរោងចក្ររបស់ពួកគាត់ ព្រោះរោងចក្ររបស់គាត់អត់បានធ្វើអ៊ីចឹងទេ បានគាត់មានប្រតិកម្មហ្នឹង។ អ៊ីចឹងបើសិនជាអាច គួរជជែកគ្នារកដំណោះស្រាយទៅ»។
ទោះជាយ៉ាងណា ក្នុងលិខិតរបស់មេធាវី លោក តេង បញ្ញារិទ្ធ គ្រាន់តែលើកឡើងជារួម និងមិនបានបញ្ជាក់ឱ្យអ្នកសារព័ត៌មាន VOD កែតម្រូវត្រង់ចំណុចណាខ្លះឱ្យជាក់លាក់នោះទេ។
ទោះបីជាយ៉ាងនេះក្តី លោក អ៊ិត សូធឿត យល់ថា ការដែលមេធាវីក្រុមហ៊ុនឱ្យអ្នករាយការណ៍ព័ត៌មាន វីអូឌី កែតម្រូវ តែមិនបញ្ជាក់ថាកែតម្រូវត្រង់ណា និងថែមទាំងភ្ជាប់នូវមាត្រានៃក្រមព្រហ្មទណ្ឌផងនោះ ជាការគំរាមកំហែងលើអ្នកសាព័ត៌មានទៅវិញទេ។
ជាមួយគ្នានេះ លោក ឌុច ពិសិដ្ឋ ដែលជាមេធាវីតំណាងឱ្យអ្នករាយការណ៍ព័ត៌មាន វីអូឌី បានលើកឡើងថា បើពិនិត្យតាមវីដេអូ អ្នករាយការណ៍ព័ត៌មាន វីអូឌី គ្រាន់តែរាយការណ៍ព័ត៌មាននៅខាងមុខរោងចក្រ ជាទីដែលកម្មករតវ៉ាប៉ុណ្ណោះ។
លោក ឌុច ពិសិដ្ឋ បានបន្ថែមថា អ្នករាយការណ៍ព័ត៌មាន វីអូឌី បានគោរពវិជ្ជាជីវៈរបស់ខ្លួនដោយបានពាក់កាត និងសម្ភាសកម្មករនៅទីនោះ និងមិនបានបំពានច្បាប់អ្វីនោះទេ។
លោកថា៖ «ខ្ញុំឃើញវីដេអូហ្នឹង បញ្ជាក់ថា គាត់ដូចជាមិនបានចូលទៅក្នុងបរិវេណរោងចក្រទេ គាត់ដូចជាចូលសម្ភាសកម្មករដែលធ្វើកូដកម្មហ្នឹងនៅមុខរោងចក្រ ប៉ុន្តែបើយើងថតជាវីដេអូទៅ ធម្មតាវាត្រូវឃើញផ្លូវផង ឃើញអគារ ឃើញសំណង់របស់រោងចក្រ ឃើញកូដករអ៊ីចឹងទៅ»។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) លោក ណុប វី មានប្រសាសន៍ថា ការដែលអ្នករាយការណ៍ព័ត៌មានបានទៅយកព័ត៌មានផ្ទាល់នៅមុខរោងចក្រនេះ ពុំអាចចាត់ទុកថាបានរំលោភលើសិទ្ធិ និងប៉ះពាល់ដល់កិត្តិយសដល់ក្រុមហ៊ុននោះទេ។
លោកថា៖ «ការរាយការណ៍នៅមុខរោងចក្រ គឺជារឿងធម្មតាទេ ដែលអ្នកយកព័ត៌មាន គេមិនចេះតែរាយការណ៍ជារួម កាលណាតែមានកម្មករតវ៉ា គេទៅរាយការណ៍ហើយ វាជារឿងធម្មតាតើ!»
បន្ថែមពីនេះ លោកថា ប្រសិនបើក្រុមហ៊ុនយល់ថា ការផ្សាយនោះខុសពីការពិត ភាគីក្រុមហ៊ុនគួរតែបញ្ជាក់ក្នុងលិខិតរបស់ខ្លួន ថាតើខុសត្រង់ចំណុចណា ដើម្បីឱ្យខាងស្ថាប័នព័ត៌មានពិនិត្យ និងធ្វើការកែសម្រួល ប្រសិនបើមានកំហុសឆ្គងមែននោះ។
កាលពីថ្ងៃទី១៥ ខែធ្នូ ឆ្នាំ២០២២ កម្មករ-កម្មការិនីប្រមាណ ២០០នាក់ បម្រើការងារនៅរោងចក្រកាត់ដេរ ហេន ស៊ើវេន (Hand Seven Apparel Co., LTD ឬអក្សរកាត់ H7) នៅជិតផ្សារព្រៃទា ស្ថិតក្នុងភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ បាននាំគ្នាតវ៉ាទាមទារទៅថៅកែឱ្យទូទាត់អត្ថប្រយោជន៍ផ្សេងៗជូនពួកគេ ស្របតាមច្បាប់ស្តីពីការងារ ក្រោយសង្ស័យថា រោងចក្របិទទ្វារ។ តែយ៉ាងណា ប្រធានរដ្ឋបាលរោងចក្រ បានបញ្ជាក់ថា រោងចក្រមិនបានបិទនោះទេ ហើយបញ្ហាវិវាទការងារនៅក្នុងរោងចក្រនេះបានដោះស្រាយចប់អស់ហើយនៅថ្ងៃដដែលនោះ ក្រោមការសម្របសម្រួលពីមន្ត្រីក្រសួងការងារ៕
