សាលាដំបូងរាជធានីភ្នំពេញ សម្រេចឃុំខ្លួនមន្ត្រីក្រសួងសង្គមកិច្ច អតីតយុទ្ធជន និងយុវនិតីសម្បទាម្នាក់ ជាបណ្ដោះអាសន្ន នៅពន្ធនាគារ PJ ពាក់ព័ន្ធរឿងកិបកេងថវិការដ្ឋជាង ៣៨ម៉ឺនដុល្លារ ។
ការសម្រេចឃុំខ្លួននេះធ្វើឡើងបន្ទាប់ពីអង្គភាពប្រឆាំងអំពើពុករលួយ (ACU) បានស្រាវជ្រាវរកឃើញថា អនុប្រធាននាយកដ្ឋានហិរញ្ញវត្ថុ និងផ្គត់ផ្គង់ នៃក្រសួងសង្គមកិច្ច លោក ឡាយ សំណាង បានកិបកេងថវិការដ្ឋជាង ១ ៥០០លានរៀល ឬស្មើប្រមាណជាង ៣៨ម៉ឺនដុល្លារ។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ មានប្រសាសន៍ប្រាប់ វីអូឌី នៅថ្ងៃព្រហស្បតិ៍នេះថា ក្រោយការសាកសួរ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឃុំខ្លួនលោក ឡាយ សំណាង នៅពន្ធនាគារ PJ កាលពីថ្ងៃម្សិលមិញ។ ប៉ុន្តែលោកពុំបានបញ្ជាក់លម្អិត ថាតើមន្ត្រីរូបនេះត្រូវបានចោទប្រកាន់ពីបទអ្វីនោះទេ។
លោកមានប្រសាសន៍ថា៖ «សំណុំរឿងហ្នឹង ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឃុំខ្លួននៅពន្ធនាគារ PJ ហើយ»។
ក្នុងសេចក្តីប្រកាសព័ត៌មានកាលពីថ្ងៃទី១១ ខែមករានេះ អ្នកនាំពាក្យអង្គភាពប្រឆាំងអំពើពុករលួយ លោក សយ ច័ន្ទវិចិត្ត បានឱ្យដឹងថា ក្រោយការស៊ើបអង្កេតស្រាវជ្រាវអស់រយៈពេល១៣ខែ ក្នុងការប្រមូលភស្តុតាង និងស្តាប់ចម្លើយសាក្សី អង្គភាពនេះបានរកឃើញថា លោក ឡាយ សំណាង បានកិបកេងយកថវិកាគម្រោងជំនួយសង្គមជួយដល់ពលរដ្ឋក្រីក្រចំនួន ១១គម្រោង និងជំនួយឧបត្ថម្ភនានាផ្សេងទៀត ដែលមានទំហំទឹកប្រាក់សរុបជាង ១ ៥០០លានរៀល ឬស្មើនឹង ៣៨៧ ០០០ដុល្លារអាមេរិក តាំងពីឆ្នាំ២០១៩។
ប្រភពដដែលបន្តថា ការស៊ើបអង្កេតនេះបានធ្វើឡើងក្រោយពីក្រសួងសង្គមកិច្ចបានប្តឹងលោក ឡាយ សំណាង ពាក់ព័ន្ធការកិបកេងថវិការបស់ក្រសួង ទៅអង្គភាពប្រឆាំងអំពើពុករលួយ និងសាលាដំបូងរាជធានីភ្នំពេញ នៅថ្ងៃទី២០ ខែតុលា ឆ្នាំ២០២១ ក្រោយមក នៅថ្ងៃទី១៧ ខែមីនា ឆ្នាំ២០២២ សាលាដំបូងរាជធានីភ្នំពេញ បានបញ្ជូនសំណុំរឿងនៃពាក្យប្ដឹងនោះមក ACU ដើម្បីជាសមត្ថកិច្ច។
អ្នកនាំពាក្យអង្គភាពប្រឆាំងអំពើពុករលួយ លោក សយ ច័ន្ទវិចិត្ត មានប្រសាសន៍បន្ថែមលើសេចក្តីប្រកាសព័ត៌មាននៅថ្ងៃនេះថា ចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនមន្ត្រីសង្គមកិច្ច លោក ឡាយ សំណាង ជាបណ្តោះអាសន្ននោះ ទំនងជាចៅក្រមទទួលបានភស្តុតាងគ្រប់ជ្រុងជ្រោយពីអង្គភាពប្រឆាំងអំពើពុករលួយ ស្របតាមនីតិវិធីច្បាប់។ លោកថា ការចាត់វិធានការច្បាប់លើមន្ត្រីសង្គមកិច្ច គឺជាសារបង្ហាញទៅសាធារណជនកុំឱ្យប្រព្រឹត្តអំពើបែបនេះ។
លោកមានប្រសាសន៍ថា៖ «វាច្បាស់ណាស់ ការអនុវត្តច្បាប់របស់អង្គភាពប្រឆាំងអំពើពុករលួយ ដែលយើងបានបញ្ជូនទៅកាលពីម្សិលមិញនេះ វាពិតជាសារមួយដែលបញ្ជូនបន្ថែមទៀតទៅដល់សាធារណជនឱ្យយល់ច្បាស់ ហើយចៀសវាងការប្រព្រឹត្តអំពើពុករលួយ»។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី មានប្រសាសន៍ថា ចំណាត់ការរបស់ ACU និងតុលាការដែលសម្រេចឃុំខ្លួនមន្ត្រីសង្គមកិច្ចរូបនេះ ជាសញ្ញាវិជ្ជមានមួយ ដើម្បីជាគំរូកុំឱ្យមន្ត្រីផ្សេងៗទៀតប្រព្រឹត្តអំពើបែបនេះបន្តទៀត។
យ៉ាងណា លោកបានអំពាវនាវទៅអង្គភាពប្រឆាំងអំពើពុករលួយ បន្តធ្វើការស្រាវជ្រាវរកអ្នកពាក់ព័ន្ធផ្សេងៗទៀតឱ្យមានតម្លាភាព និងកុំប្រកាន់បក្ខពួក ដើម្បីយកទៅអនុវត្តតាមច្បាប់ ដោយសារទំហំទឹកប្រាក់ដែលជនល្មើសបានប្រព្រឹត្តមានទំហំធំ។
លោកអំពាវនាវដូច្នេះថា៖ «ដូច្នេះ គួរតែមានការសិក្សាស្រាវជ្រាវរកភស្តុតាងបន្ថែមជាប្រព័ន្ធ ដើម្បីស្វែងរកមើល ថាតើមានការជាប់ពាក់ព័ន្ធនៅក្នុងករណីនេះជាមួយមន្ត្រីណាទៀតដែរឬទេ ដើម្បីធានាមានការចាត់វិធានការជាប្រព័ន្ធទៅលើអ្នកពាក់ព័ន្ធ ហើយតម្រូវឱ្យពួកគាត់ទទួលខុសត្រូវចំពោះមុខច្បាប់ ជារឿងចាំបាច់ ដើម្បីធានានូវសមធម៌ចំពោះករណីនេះ ហើយផ្តល់យុត្តិធម៌ដល់ជនងាយរងគ្រោះ ដែលថវិកានេះតម្រូវឱ្យមានការប្រើប្រាស់សម្រាប់ក្រុមងាយរងគ្រោះ ដូចជា ក្រុមស្ត្រី ជនពិការ ចាស់ជរា ឬក៏អ្នកក្រីក្រ»។
បើតាមសន្ទស្សន៍យល់ឃើញពីអំពើពុករលួយ ឆ្នាំ២០២១ ចេញផ្សាយដោយអង្គការតម្លាភាពអន្តរជាតិ (Transparency International) នៅថ្ងៃទី២៥ ខែមករា ឆ្នាំ២០២២ បង្ហាញថា កម្ពុជាជាប់ចំណាត់ថ្នាក់លេខ១៥៧ ក្នុងចំណោមប្រទេស និងដែនដីចំនួន១៨០ នៅលើពិភពលោក។ ចំណាត់ថ្នាក់នេះបង្ហាញថា កម្ពុជានៅតែជាប្រទេសមានកម្រិតពុករលួយអាក្រក់ជាងគេបំផុត ក្នុងចំណោមប្រទេសទាំង១០ នៃសមាជិកអាស៊ាន។
ច្បាប់ក្រមព្រហ្មទណ្ឌ ត្រង់មាត្រា៥៩៨ ចែងថា ជនដែលជាអ្នករាជការសាធារណៈ ឬពលរដ្ឋទទួលអាណត្តិសាធារណៈដោយការបោះឆ្នោត ប្រព្រឹត្តអំពើកេងយកផលប្រយោជន៍ដោយខុសច្បាប់ ត្រូវផ្តន្ទាទោសដាក់ពន្ធនាគារពី២ឆ្នាំ ទៅ៥ឆ្នាំ និងពិន័យជាប្រាក់ពី ៤លានរៀល ទៅ១០លានរៀល។
ចំណែកច្បាប់ស្តីពី «ការប្រឆាំងការសម្អាតប្រាក់ និងហិរញ្ញប្បទានភេរវកម្ម» ក្នុងមាត្រា៣៨ ចែងថា ជនដែលប្រព្រឹត្តបទល្មើសសម្អាតប្រាក់ ត្រូវផ្ដន្ទាទោសដាក់ពន្ធនាគារពី ២ឆ្នាំ ដល់ ៥ឆ្នាំ និងពិន័យជាប្រាក់ពី ១០០លានរៀល ទៅ ៥០០លានរៀល ដោយមិនទាន់គិតដល់ទោសបន្ថែមមានចែងក្នុងក្រមព្រហ្មទណ្ឌ៕
