ពលរដ្ឋនៅជាប់បឹងតាមោក ស្នើស្ថាប័នរដ្ឋជាថ្មីទៀតឱ្យដោះស្រាយបញ្ហាដីធ្លីដោយគ្មានការបណ្ដេញចេញទាំងបង្ខំ

ប្រជាពលរដ្ឋប្រមាណ៤០​នាក់ តំណាង​ឱ្យ​​​២៥០​គ្រួសារ រស់​​នៅជាប់​បឹង​​តាមោក ស្ថិត​ក្នុង​សង្កាត់​សំរោង​​ ខណ្ឌ​ព្រែកព្នៅ រាជ​ធានី​​ភ្នំពេញ បាន​​​នាំគ្នាដាក់ញត្តិនៅក្រសួងរៀបចំដែនដី ដើម្បីជំរុញឱ្យមានដំណោះស្រាយជូនពួកគេ ដោយគ្មានការបណ្តេញចេញពីលំនៅឋានទាំងបង្ខំ ព្រឹកថ្ងៃទី១២ ខែមករា ឆ្នាំ២០២៣។ (ហ៊ាន រង្សី)

ប្រជាពលរដ្ឋប្រមាណ៤០​នាក់ តំណាង​ឱ្យ​​​២៥០​គ្រួសារ រស់​​នៅជាប់​បឹង​​តាមោក ស្ថិត​ក្នុង​សង្កាត់​សំរោង​​ ខណ្ឌ​ព្រែកព្នៅ រាជ​ធានី​​ភ្នំពេញ នៅថ្ងៃព្រហស្បតិ៍នេះ បាន​​​នាំគ្នាដាក់ញត្តិនៅតាមស្ថាប័នរដ្ឋចំនួន​៣ជាថ្មី​ទៀត ដើម្បីជំរុញឱ្យមានដំណោះស្រាយជូនពួកគេ ដោយគ្មានការបណ្តេញចេញពីលំនៅឋានទាំងបង្ខំ។

ស្ថាប័នរដ្ឋទាំង៣ ដែលក្រុមពលរដ្ឋដាក់ញត្តិនោះ រួមមាន ក្រសួងរៀបចំដែនដី នគរូបនីយកម្ម និងសំណង់, ខុទ្ទកាល័យនាយក​រដ្ឋមន្ត្រី និង​រដ្ឋសភា។

អ្នកស្រី ប្រាក់ សុភា ដែលអះអាងថា​ជាតំណាងពលរដ្ឋ ប្រាប់វីអូឌីក្រោយដាក់ញត្តិនៅមុខក្រសួងរៀបចំដែនដី​ថា ជម្លោះ​ដីធ្លីរបស់​ពួក​គាត់​បាន​អូស​បន្លាយ​រយៈ​ពេល​៤ឆ្នាំមក​ហើ​យ ដោយកើតឡើងក្រោយពីអាជ្ញាធរចោទថា ពួកគាត់រស់នៅលើដីចំណីផ្លូវដោយខុសច្បាប់ និងឱ្យដោះដូរទៅទីតាំងថ្មី ខណៈពួកគាត់បានរស់នៅតំបន់មានជម្លោះនោះតាំងពីឆ្នាំ១៩៩០។

តំណាងពលរដ្ឋរូបនេះបន្តថា កន្លងមក អ្នកភូមិបានដើរដាក់ញត្តិតាមស្ថាប័ន​រដ្ឋជាច្រើន ដើម្បីសុំអន្តរាគមន៍ដោះស្រាយ ប៉ុន្តែ​រហូតមកដល់ពេលនេះ គ្មានដំណោះស្រាយសមស្របណាមួយសម្រាប់ពលរដ្ឋនោះឡើយ ក្រៅពីការ​បង្ខំឱ្យដោះដូរទៅទីតាំងថ្មីដែលរៀបចំដោយអាជ្ញាធរ។

 អ្នកស្រី ប្រាក់ សុភា និយាយថា គ្រួសារអ្នកស្រីមិនព្រមដោះដូរទៅទីតាំងថ្មី ដោយសារបារម្ភពីការបាត់បង់មុខរបរ និងជួបបញ្ហាជីវភាពគ្រួសារ ខណៈ​កន្លែងនោះពុំមានកន្លែងសមស្របសម្រាប់ប្រកបមុខរបររកស៊ីដូចកន្លែងចាស់។ អ្នកស្រីថា វាជារឿងអយុត្តិធម៌មួយ ដែលរដ្ឋាភិបាលអនុញ្ញាតឱ្យអ្នកមានលុយមានអំណាច មានសិទ្ធិទទួលបានដីនៅតំបន់បឹងតាមោកមកធ្វើជាកម្មសិទ្ធិ ខណៈពួកគាត់ជាពលរដ្ឋក្រីក្ររងការ​បណ្តេញចេញឱ្យទៅរស់នៅកន្លែងផ្សេង។

អ្នកស្រីបន្ថែមថា៖ «ដីបឹង ជាដីកេរដំណែលដូនតា អត់មានដីម៉ែឪអាជ្ញាធរ ហើយដែលយើងកាន់កាប់ក៏មិនមែនជាដីម៉ែឪយើងដែរ តែជាដីរបស់រដ្ឋ ហេតុអី​បានជាពលរដ្ឋមិនអាចរស់នៅបាន? រស់នៅតែអស់លោកជាមន្ត្រីមែន? វាឈឺចាប់ វាអយុត្តិធម៌ យើងត្រូវការយុត្តិធម៌។ យើងសុំបញ្ជាក់ថា ពួកគាត់អត់បានរស់នៅក្នុងដីអនុក្រឹត្យទេ។ យើងនៅក្រៅដីអនុក្រឹត្យ ដែលជាដីស្រែប្រាំង ដែលពួកយើងកាន់កាប់។ អនុសាសន៍សម្តេចថា ដីស្រែប្រាំងរបស់ប្រជាពលរដ្ឋ ឱ្យកាត់ឆ្វៀលឱ្យពួកគាត់​ទៅ។ អ៊ីចឹងអភិបាលរាជធានីភ្នំពេញ លោក ឃួង ស្រេង និង​អភិបាលខណ្ឌព្រែកព្នៅ លោក ធឹម សំអាន គាត់ប្រមាថអនុសាសន៍សម្តេច»

កញ្ញា ស៊ា ដាវី ដែលអះអាងថាជាតំណាងពលរដ្ឋដែរនោះ បានឱ្យដឹង​ថា បច្ចុប្បន្ននេះ អាជ្ញាធរបានចាក់លុបបឹងជិតដល់ផ្ទះ និងបានប៉ះពាល់ដល់កន្លែងចិញ្ចឹមត្រី​​របស់​ពលរដ្ឋ។ ​អ្នកស្រីថា អាជ្ញាធរបានឱ្យតំណាងចាស់​របស់ពលរដ្ឋដើរបញ្ចុះបញ្ចូល​ប្រជាពលរដ្ឋឱ្យទទួលយកការដោះដូរ ទៅរស់នៅទីតាំងថ្មី តាមការកំណត់របស់អាជ្ញាធរ ប៉ុន្តែរហូតពេលនេះ ពុំទាន់មានពលរដ្ឋព្រមទទួលយក​ការដោះដូរនៅឡើយទេ។

កញ្ញា​បន្តថា ក្រោមគម្រោងអភិវឌ្ឍន៍តំបន់បឹងតាមោកនេះ បានបង្កការឈឺចាប់ដល់ប្រជាពលរដ្ឋជាខ្លាំង ដោយសារអាជ្ញាធរ​បង្ខំឱ្យពួកគាត់ចេញពីលំនៅឋានដែលបានរស់នៅ និងអាស្រ័យផលជាច្រើនឆ្នាំ ប៉ុន្តែសម្រាប់អ្នកមានលុយមានអំណាច បែរ​ជាទទួលបានដីតំបន់នោះរាប់សិបហិកតាមមកធ្វើជាកម្មសិទ្ធិ។ កញ្ញា​ថា អ្នកភូមិកំពុងពិបាកចិត្ត និងបារម្ភពីការបណ្តេញទាំង​បង្ខំនៅ​ថ្ងៃណាមួយ ប្រសិនបើពួកគាត់មិនព្រមចាកចេញតាមការបង្ខំរបស់អាជ្ញាធរ។

កញ្ញាបន្ថែមថា៖ «រដ្ឋាភិបាល ឬអាជ្ញាធរ គួរពិចារណាគិតឡើងវិញ ​ចំពោះការអភិវឌ្ឍ​នៅតំបន់បឹងតាមោកនេះ។ សូម​កុំ​ឱ្យ​មាន​​ការ​លម្អៀង​ទៅអ្នក​មាន​អំណាច ​អ្នក​មាន​លុយ សូមឱ្យការអភិវឌ្ឍនេះឱ្យស្មើភាពគ្នា ព្រោះក្នុងច្បាប់ភូមិបាលបានកំណត់​ថា បើពួកយើងរស់នៅចាប់ពី៥ឆ្នាំទៅ យើងមានសិទ្ធិកាន់កាប់ស្រប​តាមផ្លូវច្បាប់។ ប៉ុន្តែនេះ ពួកយើងបានរស់នៅជាង២០​ឆ្នាំហើយ​ អ៊ីចឹងពួកយើងសុំសិទ្ធិអភិវឌ្ឍន៍នៅនឹងកន្លែង ដោយមិនព្រមទទួលការដោះដូរទៅកន្លែងថ្មីឡើយ»

វីអូឌី មិនអាចសុំការបញ្ជាក់ពីអ្នកនាំពាក្យក្រសួងរៀបចំ​ដែន​ដី និង​មន្ត្រី​ខុទ្ទកាល័យនាយករដ្ឋមន្ត្រី លោក គង់ ចំរើន បានទេពាក់​ព័ន្ធនឹងការ​ដាក់ញត្តិរបស់​ពលរដ្ឋ​នេះ។

ប៉ុន្តែតំណាងពលរដ្ឋឱ្យដឹងថា មន្ត្រីក្រសួងរៀបចំដែនដី បាន​ទទួលយកញត្តិពលរដ្ឋជាថ្មីទៀត នឹង​បាន​សន្យាបញ្ជូនទៅថ្នាក់លើ​ពិនិត្យ​ជា​ថ្មី​ទៀត ខណៈខុទ្ទកាល័យនាយករដ្ឋមន្ត្រី និងរដ្ឋសភា មិនបានទទួលញត្តិពីប្រជាពលរដ្ឋនោះទេ ដោយ​លើក​ហេតុ​ផល​​ថា ការ​ធ្វើញត្តិនោះ​មិន​ត្រឹម​ត្រូវ​តាម​បែប​បទរដ្ឋបាល ហើយបានតម្រូវឱ្យធ្វើជាថ្មី។

ចំណែកអភិបាលខណ្ឌព្រែកព្នៅ លោក ធឹម សំអាន ប្រាប់ថា កំពុងជាប់រវល់ប្រជុំ មិនទាន់អាចនិយាយបាន។

អភិបាលរង​រាជធានីភ្នំពេញ លោក កើត ឆែ ធ្លាប់ប្រាប់វីអូឌីថា អាជ្ញាធរ​មិនអាច​ឱ្យ​ពលរដ្ឋអភិវឌ្ឍ​នៅនឹងកន្លែងបានឡើយ ក្រោមហេតុផលថា ​​​ពលរដ្ឋទាំងនោះ​​​រស់នៅលើចំណីផ្លូវ​លេខ​១៥១ ដោយខុសច្បាប់ ដែលផ្លូវនេះ រដ្ឋាភិបាលគ្រោងពង្រីកឱ្យបាន៥០ម៉ែត្រ។ លោក​បន្តថា ពលរដ្ឋទាំងនោះត្រូវតែដោះដូរទៅទីតាំងថ្មី ដែល​រៀបចំ​ដោយ​អាជ្ញាធរ ដែល​ត្រូវ​បាន​ដីឡូត៍​ទំហំ ៤ម៉ែត្រ គុណ ១៨​ម៉ែត្រ ​ក្នុង១​គ្រួសារ ដែល​ទីតាំង​ស្ថិត​ក្នុង​សង្កាត់​សំរោង​​ដូចគ្នា។

​ប្រធានគម្រោង​សិទ្ធិ​លំនៅ​ឋាន និង​ស្រាវ​ជ្រាវ​ នៃ​អង្គការ​សមាគម​ធាង​ត្នោត​ លោក ស៊ាង មួយឡៃ ធ្លាប់​លើក​ឡើង​ថា ក្រោមគម្រោង​អភិវឌ្ឍន៍​​បឹង​តាមោក​របស់​រដ្ឋាភិបាល បានបង្កឱ្យ​មាន​​ភាព​អយុត្តិធម៌សង្គម។ លោកថា ក្រុមហ៊ុន​ឯក​ជន ស្ថាប័ន​រដ្ឋ និងអ្នកមានលុយមានអំណាច មានសិទ្ធិទទួល​​បានដីបឹង​មក​ធ្វើជា​កម្ម​សិទ្ធិ ប៉ុន្តែសម្រាប់ប្រជាពលរដ្ឋក្រីក្រ ដែលរស់នៅ និងអាស្រ័យផលនៅជាប់បឹងនោះ​រាប់ឆ្នាំ បែរ​​​ជាមិន​​ទទួល​បាន​​កម្ម​សិទ្ធិ​លើដីរបស់ខ្លួន និងត្រូវរងនូវ​ការបណ្តេញចេញពីលំនៅឋាន​ទាំងបង្ខំ​ថែមទៀត។

អ្នកសម្រប​សម្រួល​គម្រោង​ធុរកិច្ច និងសិទ្ធិមនុស្ស នៃ​មជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត សង្កេតឃើញថា យន្តការដោះស្រាយទំនាស់ដីធ្លីរបស់រដ្ឋាភិបាលមួយរយៈចុងក្រោយ ហាក់មិនដំណើរការនោះទេ។ លោកថា ការពន្យារពេលមិនដោះស្រាយនេះ នឹងធ្វើឱ្យពលរដ្ឋជួបទុក្ខលំបាក និងបាម្ភពីការបណ្តេញចេញ​ទាំងបង្ខំ ដូចករណីនៅ​សហគមន៍បឹងកក់ បុរីកីឡា និងសហគមន៍ផ្សេងទៀត នា​ពេលកន្លងមក។

មន្ត្រីសិទ្ធិមនុស្សរូបនេះបានទទូចដល់អាជ្ញាធរពាក់ព័ន្ធដោះស្រាយជូនពលរដ្ឋឱ្យបានសមរម្យ ដែលពួកគេអាចទទួលយកបាន ដើម្បី​កុំប៉ះពាល់ដល់ជីវភាព និងរំលោភសិទ្ធិពលរដ្ឋ​ដែលធានាដោយច្បាប់ជាតិ និងអន្តរជាតិ។ លោកសង្កេតឃើញថា ការដោះស្រាយរបស់អាជ្ញាធរកន្លងមក ដោយបង្ខំ​ឱ្យពលរដ្ឋដោះដូរទៅទីតាំងថ្មីនោះ ភាគច្រើនបានធ្វើឱ្យប៉ះពាល់ដល់ជីវភាពរស់នៅរបស់ពលរដ្ឋ ដោយសារការបាត់បង់មុខរបរ និងចំណូល។

លោកបន្ថែមថា៖ «ក្នុងនាមអង្គការសង្គមស៊ីវិល​ យើងតែងតែសំណូម​ពរ​ទៅ​ដល់​រដ្ឋាភិបាល និងអាជ្ញាធរពាក់ព័ន្ធ គិត​ដល់សិទ្ធិមនុស្ស ជាពិសេសសិទ្ធិរស់រានមានជីវិត សិទ្ធិមានលំនៅឋាន ដីធ្លីសមរម្យ និងជីវភាពសមរម្យ ឱ្យសមយើងជាប្រទេសប្រកាន់លទ្ធិប្រជាធិបតេយ្យ និងគោរពសិទ្ធិ ដូចមានចែងក្នុងរដ្ឋធម្មនុញ្ញ និងច្បាប់អន្តរជាតិដែល​កម្ពុជា​បានផ្តល់សច្ចាប័ន»។

បឹង​តាមោក ឬ​ បឹងកប់ស្រូវ មានផ្ទៃដីសរុប៣ ២៣៩​​ហិកតា ជា​អាង​​ស្ដុក​​ទឹក​​កខ្វក់ និង​រំដោះ​ទឹក​ចេញ​ពី​រាជធានី​​​ភ្នំពេញ ហើយ​​បឹ​ងមួយនេះត្រូវ​​បាន​​រដ្ឋាភិបាល​​ចេញអនុក្រឹត្យ​កាលពីដើមខែកុម្ភៈ ឆ្នាំ២០១៦ ដោយ​​​កំណត់​យក​​បឹង​ធម្មជាតិ​មួយ​​នេះ​ជាសម្បតិ្តសាធារណៈរបស់រដ្ឋ។

បើយោងតាមអនុក្រឹត្យរបស់រដ្ឋាភិបាលដែលបានចេញជាបន្តបន្ទាប់ចាប់តាំងពីឆ្នាំ២០១៨ ដល់ចុង​ខែធ្នូ​ ឆ្នាំ​២០២១ ផ្ទៃបឹងតាមោក សរុប​ជាង២ ០០០​ហិកតា​ហើយត្រូវបានរដ្ឋាភិបាល​កាត់ឬដោះដូរ​ទៅ​ឱ្យស្ថា​ប័ន​​​រដ្ឋ ​ក្រុមហ៊ុន​​ឯកជន និង​បុគ្គលឯកជនមួយចំនួន​ដែលគេដឹងថាជាអ្នក​មាន​លុយមានអំណាច សម្រាប់​​សាង​សង់​អគារ និងហេដ្ឋារចនាសម្ពន្ធផ្សេង​ៗ ព្រម​ទាំង​ធ្វើជាកម្មសិទ្ធិផ្ទាល់ខ្លួន ជាដើម​៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ