រដ្ឋមន្ត្រីការពារជាតិសហរដ្ឋអាមេរិក លោក Lloyd Austin បានលើកឡើងនៅថ្ងៃពុធម្សិលមិញ ដោយហាក់សម្ដែងជាការសង្ស័យថា ការបង្កើនសកម្មភាពយោធារបស់ចិន នៅជិតច្រកសមុទ្រតៃវ៉ាន់ គឺជាសញ្ញានៃការឈ្លានពានដោយទីក្រុងប៉េកាំងនៅលើដែនកោះមួយនេះ ដែលអាចនឹងកើតមានឡើងនៅពេលខាងមុខនេះ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី១២ ខែមករា ឆ្នាំ២០២៣។
ថ្លែងក្នុងអំឡុងសន្និសីទសារព័ត៌មានមួយ ជាមួយរដ្ឋមន្ត្រីការបរទេសអាមេរិក លោក អេនតូនី ប្លីនខេន (Antony Blinken) និងសមភាគីជប៉ុន រដ្ឋមន្ត្រីការពារជាតិអាមេរិករូបនេះបន្តថា៖ «យើងបានឃើញពីការកើនឡើងនៃសកម្មភាពនៅលើដែនអាកាសនៅក្នុងច្រកសមុទ្រ [តៃវ៉ាន់] ហើយយើងក៏បានឃើញការកើនឡើងនូវសកម្មភាពនាវាលើផ្ទៃទឹក ជុំវិញកោះតៃវ៉ាន់ផងដែរ»។
ទាក់ទិននឹងករណីនេះ លោកបន្ថែមថា៖ «មិនថាតើវា [ការឈ្លានពាន] អាចកើតមានឡើងមែន ឬយ៉ាងណានោះទេ [តាមរយៈសកម្មភាពដែលធ្វើឡើងដោយចិន] វាមានន័យថា ការឈ្លានពានអាចនឹងកើតមានឡើងនៅពេលខាងមុខ។ ខ្ញុំពិតជាមានការសង្ស័យទាក់ទងនឹងករណីនេះ»។
ការលើកឡើងដោយមន្ត្រីជាន់ខ្ពស់អាមេរិករូបនេះ ក៏ត្រូវបានធ្វើឡើងបន្ទាប់ពីយោធាចិនបានធ្វើសមយុទ្ធយោធាជុំវិញកោះតៃវ៉ាន់ កាលពីថ្ងៃអាទិត្យកន្លងទៅ ដែលជាសមយុទ្ធលើកទី២ ក្នុងរយៈពេលតិចជាងមួយខែ ខណៈក្រសួងការពារជាតិតៃវ៉ាន់ បានរាយការណ៍ថា ខ្លួនបានឃើញយន្តហោះចម្បាំងចិនចំនួន ៥៧គ្រឿង និងនាវាកងទ័ពជើងទឹកចំនួន ៤គ្រឿង ដែលកំពុងប្រតិបត្តិការជុំវិញកោះនេះ។
គួរបញ្ជាក់ថា ភាពតានតឹងរវាងតៃវ៉ាន់ និងចិន បានកើនឡើងខ្លាំងក្នុងរយៈពេលចុងក្រោយនេះ ខណៈដែលចិននៅតែបន្តអះអាងថាតៃវ៉ាន់គឺជាទឹកដីរបស់ខ្លួន និងទាមទារឱ្យរដ្ឋាភិបាលនៃដែនកោះមួយនេះទទួលយកអំណាចរបស់ទីក្រុងប៉េកាំង។
ជាការឆ្លើយតប តៃវ៉ាន់ធ្លាប់បានលើកឡើងថា ខ្លួននឹងបន្តពង្រឹងការការពាររបស់ខ្លួន ដើម្បីធានាឱ្យបានថាគ្មាននរណាម្នាក់អាចបង្ខំឱ្យកោះនេះទទួលយកផ្លូវដែលចិនបានរៀបចំ ដោយមិនផ្តល់សេរីភាព និងប្រជាធិបតេយ្យនោះទេ ខណៈសហរដ្ឋអាមេរិកក៏ធ្លាប់បានអះអាងឱ្យដឹងកាលពីពេលកន្លងទៅថា ខ្លួននឹងគិតគូរអំពីការការពារដែនកោះដែលចិនអះអាងថាជាទឹកដីរបស់ខ្លួនមួយនេះ៕