តុលាការកំពូល គ្រោងបើកសវនាការលើសំណុំរឿងអ្នកសារព័ត៌មានម្នាក់ឈ្មោះ កៅ ពិសិដ្ឋ នៅចុងខែមករានេះ ពាក់ព័ន្ធសំណុំរឿង «ញុះញង់ឱ្យប្រព្រឹត្តបទឧក្រិដ្ឋជាអាទិ៍» និង «រារាំងដល់ការអនុវត្តវិធានការ»។
លោក កៅ ពិសិដ្ឋ អ្នកសារព័ត៌មានរបស់គេហទំព័រ www.srbreakingnews.com ត្រូវបានសមត្ថកិច្ចខេត្តបាត់ដំបង ចាប់ខ្លួនកាលពីថ្ងៃទី១៤ ខែកក្កដា ឆ្នាំ២០២១ ក្រោយពីអ្នកសារព័ត៌មានរូបនោះបានបង្ហោះសារនៅតាមបណ្ដាញសង្គមហ្វេសប៊ុក កាលពីថ្ងៃទី១២ ខែកក្កដា ឆ្នាំ២០២១ ដោយរិះគន់រដ្ឋាភិបាលអំពីវិធានការទប់ស្កាត់ជំងឺកូវីដ-១៩ និងសុំឱ្យសហគមន៍អន្តរជាតិចាត់វិធានការលើរដ្ឋាភិបាលកម្ពុជា ដូចជា ការផ្ដាច់ជំនួយ ជាដើម។
យោងតាមលិខិតអញ្ជើញមេធាវី ចុះថ្ងៃទី៦ ខែមករា ឆ្នាំ២០២៣ ដោយមហាអយ្យការអមតុលាការកំពូល លោកព្រះរាជអាជ្ញា ប៉ែន សារ៉ាត បានកោះអញ្ជើញលោក នួន ផានិត មេធាវីការពារសិទ្ធិឱ្យអ្នកសារព័ត៌មានឈ្មោះ កៅ ពិសិដ្ឋ ចូលរួមសវនាការនៅតុលាការកំពូល នៅព្រឹកថ្ងៃទី២៥ ខែមករា ខាងមុខនេះ។
បើតាមលិខិតអញ្ជើញរបស់ព្រះរាជអាជ្ញា គឺអ្នកសារព័ត៌មានឈ្មោះ កៅ ពិសិដ្ឋ អាយុ៣២ឆ្នាំ ជាប់ចោទពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទរារាំងដល់ការអនុវត្តវិធានការប្រព្រឹត្តនៅលើបណ្ដាញសង្គមហ្វេសប៊ុក កាលពីអំឡុងខែឧសភា និងខែកក្កដា ឆ្នាំ២០២១ បទល្មើសព្រហ្មទណ្ឌដែលមានចែងឱ្យផ្តន្ទាទោសតាមបញ្ញត្តិមាត្រា៤៩៥ នៃក្រមព្រហ្មទណ្ឌ និងមាត្រា១១ នៃច្បាប់ស្ដីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។
លោក នួន ផានិត មេធាវីការពារក្ដីឱ្យអ្នកសារព័ត៌មានឈ្មោះ កៅ ពិសិដ្ឋ ឱ្យដឹងនៅថ្ងៃទី១២ ខែមករា ឆ្នាំ២០២៣នេះថា លោកនឹងចូលការពារសិទ្ធិតាមការអញ្ជើញរបស់តុលាការ។
លោកថា៖ «ខ្ញុំនឹងចូលរួម! ខ្ញុំត្រៀមលក្ខណៈរួចអស់ហើយ ព្រោះសំណុំរឿង យើងក្ដាប់ជុំ តាំងពីនៅដំណាក់កាលដំបូង សាលាឧទ្ធរណ៍។ អ៊ីចឹងខ្ញុំជាមេធាវី បានត្រៀមរួចរាល់ហើយ ដើម្បីការពារសិទ្ធិ និងផលប្រយោជន៍ឱ្យកូនក្តីនៅតុលាការកំពូល»។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) លោក ណុប វី សាទរចំពោះការពន្លឿនដោះស្រាយនូវករណីរបស់អ្នកសារព័ត៌មាន ខណៈលោកគិតថា តុលាការក៏មានឆន្ទៈក្នុងការធ្វើយ៉ាងណាជំនុំជម្រះឱ្យបានឆាប់ដើម្បីបញ្ចប់ករណី។
លោកថា៖ «ខ្ញុំនៅតែទទូចថា គោលការណ៍ច្បាប់រដ្ឋធម្មនុញ្ញយើង ដែលចែងគាំទ្រទៅដល់ការអនុវត្តសិទ្ធិ និងសេរីភាពរបស់អ្នកសារព័ត៌មាន ដែលជាច្បាប់កំពូលហ្នឹង គួរតែត្រូវបានក្លាយជាមូលដ្ឋានគ្រឹះ […] យកមកពិចារណា ដើម្បីពិនិត្យមើលគ្រប់សំណុំរឿងទាំងអស់ប្រឆាំងជាមួយអ្នកសារព័ត៌មាន ក៏ដូចជាករណីរបស់លោក កៅ ពិសិដ្ឋ។ អ៊ីចឹងហើយចំណុចនេះ ខ្ញុំគិតថា បើយោងទៅលើអ្វីដែលឈរទៅលើគោលការណ៍នៃសេរីភាពបញ្ចេញមតិ និងសេរីភាពសារព័ត៌មាន ករណីរបស់គាត់គួរតែត្រូវបានទម្លាក់ចោល»។
សម្រាប់លោក ណុប វី អ្នកសារព័ត៌មានមានលំហសេរីភាពមួយ ដែលអាចចូលរួមក្នុងការបញ្ចេញមតិ អភិវឌ្ឍសេរីភាព និងវិជ្ជាជីវៈ ដោយឈរលើខ្លឹមសារនៃរដ្ឋធម្មនុញ្ញ ព្រមទាំងគោលការណ៍ច្បាប់អន្តរជាតិផ្សេងទៀត។ លោកថា រដ្ឋាភិបាលក៏បានចាត់ទុកអ្នកសារព័ត៌មានជាដៃគូដែលមិនអាចខ្វះបាន ដូច្នេះ គ្រប់ការបញ្ចេញមតិរបស់អ្នកសារព័ត៌មាន និងសេរីភាពរបស់ពួកគាត់ គួរតែទទួលបានការការពារ និងការសម្របសម្រួលមួយ ដើម្បីឱ្យគាត់អាចអនុវត្តនូវសិទ្ធិសេរីភាពបាន។
បើតាមលោក ណុប វី ក្រៅពីករណីលោក កៅ ពិសិដ្ឋ កន្លងទៅ ក៏មានករណីផ្សេងៗទៀតដែលអ្នកសារព័ត៌មានបានរងនូវការប្តឹងផ្តល់ នៅពេលដែលពួកគាត់បានអនុវត្តនូវសេរីភាព ដោយសរសេរ បង្ហោះ ឬបញ្ចេញមតិនៅលើប្រព័ន្ធអ៊ីនធឺណិត។
បើតាមមេធាវីការពារក្ដីឱ្យលោក កៅ ពិសិដ្ឋ កាលពីថ្ងៃទី៣០ ខែធ្នូ ឆ្នាំ២០២១ សាលាដំបូងខេត្តបាត់ដំបង បានផ្ដន្ទាទោសកូនក្តីរបស់លោកឱ្យជាប់ពន្ធនាគារចំនួន២ឆ្នាំ និងពិន័យជាប្រាក់ចំនួន៣លានរៀល។ ក្រោយមក នៅថ្ងៃទី០៥ ខែកក្កដា ឆ្នាំ២០២២ ចៅក្រមសាលាឧទ្ធរណ៍បាត់ដំបង បានសម្រេចតម្កល់សាលក្រមសាលាដំបូងខេត្តបាត់ដំបង ទុកជាបានការ ដែលករណីនេះ មេធាវីការពារក្តីឱ្យលោក កៅ ពិសិដ្ឋ បន្តប្តឹងសាទុក្ខប្រឆាំងនឹងសាលក្រមនោះទៅតុលាការកំពូលបន្តទៀត។
កាលពីថ្ងៃទី២១ ខែកក្កដា ឆ្នាំ២០២១ អ្នកសារព័ត៌មានគ្មានព្រំដែន បានចេញសេចក្តីថ្លែងការណ៍មួយ ដោយទាមទារឱ្យអាជ្ញាធរកម្ពុជាដោះលែងលោក កៅ ពិសិដ្ឋ ជាបន្ទាន់និងឥតលក្ខខណ្ឌ ដោយកាលណោះ អង្គការអន្តរជាតិមួយនេះថា រដ្ឋាភិបាលកម្ពុជាកំពុងប្រើលេសទប់ស្កាត់ជំងឺកូវីដ-១៩ ទៅបំបិទសំឡេងអ្នករិះគន់តែប៉ុណ្ណោះ៕
