មជ្ឈមណ្ឌលសកម្មភាពកំចាត់មីនកម្ពុជា (CMAC) គ្រោងបង្ហាត់ជំនាញបោសសម្អាតមីនដល់មន្ត្រីជំនាញរបស់អ៊ុយក្រែន ក្នុងខែមករានេះ ទៅលើការប្រើប្រាស់សម្ភារបច្ចេកទេសបោសសម្អាតមីន ជាពិសេសឧបករណ៍រាវមីនប្រភេទផលិតនៅជប៉ុន ក្រោមកិច្ចសហការកម្ពុជា-ជប៉ុន លើសកម្មភាពកម្ចាត់មីនមនុស្សធម៌។
នេះបើតាមសេចក្តីប្រកាសព័ត៌មានរបស់មជ្ឈមណ្ឌលសកម្មភាពកំចាត់មីនកម្ពុជា (CMAC) ចុះថ្ងៃទី១៣ ខែមករា ឆ្នាំ២០២៣នេះ ស្តីពី «កិច្ចសហប្រតិបត្តិការលើសកម្មភាពកម្ចាត់មីនមនុស្សធម៌ជាមួយប្រទេសអ៊ុយក្រែន តាមរយៈផ្តល់ការហ្វឹកហ្វឺនដល់មន្ត្រីជំនាញអ៊ុយក្រែន លើបច្ចេកវិទ្យាបោសសម្អាតគ្រាប់មីន ដែលត្រូវប្រព្រឹត្តទៅនៅកម្ពុជា»។
CMAC លើកឡើងថា រដ្ឋាភិបាលកម្ពុជា សហការជាមួយរដ្ឋាភិបាលជប៉ុន បានផ្តល់ការគាំទ្រដល់ CMAC ក្នុងការរៀបចំវគ្គហ្វឹកហ្វឺនសកម្មភាពកម្ចាត់មីនមនុស្សធម៌ ជូនដល់មន្ត្រីជំនាញបោសសម្អាតមីនប្រទេសអ៊ុយក្រែន។
ប្រភពដដែលបន្ថែមថា ផ្អែកលើបទពិសោធដែលកម្ពុជាធ្លាប់ឆ្លងកាត់សង្គ្រាមរ៉ាំរ៉ៃជាច្រើនទសវត្សរ៍ និងដោះស្រាយបញ្ហាគ្រាប់មីន និងសំណល់យុទ្ធភណ្ឌសង្គ្រាមប្រកបដោយជោគជ័យ តាមរយៈការអនុវត្តសកម្មភាពកម្ចាត់មីនមនុស្សធម៌ តាំងពីឆ្នាំ១៩៩២នោះ រដ្ឋាភិបាលកម្ពុជាមានសុឆន្ទៈក្នុងការជួយគាំទ្រ និងផ្ដល់កិច្ចសហប្រតិបត្តិការក្នុងវិស័យសកម្មភាពកម្ចាត់មីនមនុស្សធម៌ជូនប្រជាជនអ៊ុយក្រែន។
នាសម័យប្រជុំកំពូលអាស៊ានលើកទី៤០-៤១ កាលពីខែវិច្ឆិកា ឆ្នាំ២០២២ កន្លងទៅ លោកនាយករដ្ឋមន្ត្រី ហ៊ុន សែន បានពិភាក្សា និងឯកភាពជាមួយនាយករដ្ឋមន្ដ្រីជប៉ុន លោក KISHIDA Fumio ក្នុងការគាំទ្រដល់កិច្ចការបោសសម្អាតមីនមនុស្សធម៌នៅប្រទេសអ៊ុយក្រែន។
CMAC ថា៖ «ផ្អែកលើការសម្រេចចិត្តរបស់ថ្នាក់ដឹកនាំនៃប្រទេសទាំងពីរ អង្គភាព CMAC នឹងរៀបចំការហ្វឹកហ្វឺនជូនមន្ត្រីជំនាញសកម្មភាពមីននៃអង្គភាពផ្តល់សេវាកម្មរដ្ឋ ក្នុងគ្រាអាសន្ននៃប្រទេសអ៊ុយក្រែន [State Emergency Service of Ukraine] ដែលហៅកាត់ថា “SESU” នៅកម្ពុជា ក្នុងខែមករា ឆ្នាំ២០២៣ លើការប្រើប្រាស់សម្ភារបច្ចេកទេសបោសសម្អាតមីន ជាពិសេសឧបករណ៍រាវមីនប្រភេទ ALIS ផលិតនៅប្រទេសជប៉ុន»។
អង្គភាពនេះថា ក្នុងកម្មវិធីហ្វឹកហ្វឺនមាន ៤វគ្គ ក្នុងនោះមានពិធីបើកវគ្គហ្វឹកហ្វឺន, ដំណើរទស្សនកិច្ចចម្ការមីន, ដំណើរទស្សនកិច្ចសារមន្ទីរសន្តិភាព សកម្មភាពមីន និងការធ្វើប្រតិបត្តិការបង្ហាញ និងពិធីបិទវគ្គហ្វឹកហ្វឺន។
បើតាម CMAC បញ្ហាគ្រាប់មីន និងគ្រាប់យុទ្ធភណ្ឌមិនទាន់ផ្ទុះ ដោយសារសង្គ្រាមនៅលើទឹកដីនៃប្រទេសអ៊ុយក្រែន បាននិងកំពុងបង្កគ្រោះថ្នាក់យ៉ាងធ្ងន់ធ្ងរដល់ជនស៊ីវិល ហើយក៏ជាឧបសគ្គចំពោះប្រជាពលរដ្ឋអ៊ុយក្រែនដែលមានបំណងវិលត្រលប់ទៅកាន់លំនៅដ្ឋានរបស់ពួកគេវិញ។
ដូច្នេះ កិច្ចការបោសសម្អាតមីន និងសំណល់យុទ្ធភណ្ឌសង្គ្រាម ជាសកម្មភាពមនុស្សធម៌ដ៏ចាំបាច់និងបន្ទាន់ ដើម្បីធានាសុខសុវត្ថិភាពប្រជាពលរដ្ឋ និងគាំទ្រដល់ដំណើរការស្ដារឡើងវិញនូវហេដ្ឋារចនាសម្ពន្ធនានា និងដីសម្រាប់ធ្វើកសិកម្ម។
ទន្ទឹមនឹងនេះ កិច្ចការបោសសម្អាតគ្រាប់មីន និងសំណល់យុទ្ធភណ្ឌសង្គ្រាម ក៏ដូចជាការកសាងទំនុកចិត្តរបស់ប្រជាពលរដ្ឋលើសុខសុវត្ថិភាព និងការស្តារជីវភាពរស់នៅឡើងវិញ ត្រូវការពេលវេលាយូរ និងទាមទារភាពអត់ធ្មត់៕
